Хитай сақчи даирилири нурмуһәммәт ясинниң қолға елинғанлиқини етирап қилди


2005-01-14
Share

Мәркизи германийидики шәрқий түркистан учур мәркизиниң ашкарилишичә, хитай дөләт бихәтәрлик органлири тәрипидин үч айниң алдида қолға елинған қәшқәрлиқ язғучи нурмуһәммәт ясинниң маралбешидики бир түрмидә тутуп туруливатқанлиқи ашкариланди.

Қәшқәр шәһәрлик җамаәт хәвпсизлик идарисиниң сияси аманлиқ бөлүми, нурмуһәммәт ясинниң "қәшқәр әдәбияти" дики бир әдәбий әсири сәвәбидин қолға елинғанлиқини етирап қилди. Шәрқий түркистан учур мәркизи, буниңдин илгири нурмуһәммәт ясинниң қәшқәр вилайәтлик дөләт бихәтәрлик идарисидики мәхпий сақчилар тәрипидин, дөләтни парчилашқа урунуш җинайити билән қолға елинғанлиқини елан қилған.

Қолға алғанлиқини етирап қилди

Учур мәркизиниң ашкарилишичә, хитай һөкүмити нурмуһәммәт ясинниң "қәшқәр әдәбияти" жорнилидики " көк кәптәр" намлиқ әдәбий әсири миллий бөлгүнчиликни тәшвиқ қилған дәп әйипләп, "қәшқәр әдәбияти" ниң 2004 - йиллиқ 5 - санини йиғивалған. Биз нурмуһәммәт ясинниң әһвали һәққидики учурларни игиләш үчүн, маралбеши наһийилик сақчи идарисиға телефон қилдуқ. Наһийилик сақчи идарисиниң бир хадими, нурмуһәммәт ясинниң қолға елинғанлиқини рәт қилмиди. Бирақ у, бу ишлар һазирчә бизгә қараңғу, дәп җавап бәрди.

Биз қолға елинған язғучиниң әһвали һәққидики учурларни игиләш үчүн, қәшқәр вилайәтлик сақчи идарисидики даириләр билән давамлиқ алақилаштуқ. Ахири қәшқәр шәһәрлик сақчи идариси аманлиқ әтритиниң бир хадими, мухбиримизниң нурмуһәммәт ясин һәққидики суаллириға җаваб берип, язғучиниң қолға елинғанлиқини етирап қилди. У мундақ деди: "у қәшқәр вилайитиниң маралбеши наһийисидин, у "қәшқәр әдәбияти" жорнилиға мақалә йезип, әксийәтчил сөзләрни қилған."

"Бөлгүнчилик" кә даир делолар интайин көп

Бөлгүнчиликкә даир делолар интайин көп, нәччә йүзгә йетиду. Уйғурларниң бөлгүнчиликкә даир делолири интайин көп,

Сақчи хадими, нурмуһәммәт ясинниң үч айниң алдида қолға елинғанлиқини билдүрди.У, нурмуһәммәт ясинниң қолға елинғиниға үч йерим айдәк болуп қалғанлиқини, униң техи сотланмиғанлиқи, делоси үрүмчидики юқири сотқа йолланғанлиқини шундақла һазир униң маралбешидики түрмидә тутуп туриливатқанлиқини билдүрди.

Хитай сақчи даирилириниң ашкарилишичә, нурмуһәммәт ясинниң делосиға қәшқәр вилайәтлик сақчи идариси мәсул болған. Бу мунасивәт билән радиомиз мухбири аптоном районлуқ юқири сотқа телефон қилип, нурмуһәммәт ясинниң делосини сүрүштүрди. юқири сотниң дело ишларға мәсул бир хадими, " бөлгүнчиликкә даир делолар интайин көп, нәччә йүзгә йетиду. Уйғурларниң бөлгүнчиликкә даир делолири интайин көп," дәп көрсәтти.

Жорнал йиғивелинмақта

Қәшқәр шәһәрлик сақчи идарисидики даириләрниң ашкарилишичә, қәшқәр вилайәтлик сақчи идариси нурмуһәммәт ясинниң " көк кәптәр" намлиқ әсири бесилған "қәшқәр әдәбияти" ниң 2004 - йиллиқ 5 - санини йиғивелиш буйруқи чүшүргән. Қәшқәр шәһәрлик сақчи идарисидики сақчи хадим, жорнални йиғивелишқа қәшқәр вилайәтлик сақчи идариси , шәһәрлик сақчи идариси шундақла мәдәнийәт идарисиниң сәпәрвәр қилинғанлиқини билдүрди. "Қәшқәр әдәбияти" ниң 5 - сани җәмий 2000 нусха тарқитилған болуп, юқириқи сақчиниң ашкарилишичә, һазирға қәдәр жорналниң көп қисими йиғивелинған. У, йиғивелинған жорналларниң қәшқәр шәһәрлик сақчи идариси аманлиқ әтрити башлиқиниң ишханисида сақлиниватқанлиқини билдүрди.

Шәрқий түркистан учур мәркизиниң хәвәр қилишичә, "өркиши" тәхәллуси билән тонулған нурмуһәммәт ясин, 1974 -йили қәшқәрниң маралбеши наһийисидә туғулған. У, һаятини әдәбий иҗадийитидин алған қәләм һәққи билән қамдайдиған әркин қәләмкәш иди. Униң " ойнайдиған бала барму" , " тунҗи муһәббәт" , " йүрәк йиғлайду" қатарлиқ китаплири нәшр қилинған, 40 парчидин артуқ әсири бир қанчә топламға киргүзүлгән иди.(Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт