Xitay saqchi da'iriliri nurmuhemmet yasinning qolgha élin'ghanliqini étirap qildi


2005-01-14
Share
orkishi.jpg

Merkizi gérmaniyidiki sherqiy türkistan uchur merkizining ashkarilishiche, xitay dölet bixeterlik organliri teripidin üch ayning aldida qolgha élin'ghan qeshqerliq yazghuchi nurmuhemmet yasinning maralbéshidiki bir türmide tutup turuliwatqanliqi ashkarilandi.

Qeshqer sheherlik jama'et xewpsizlik idarisining siyasi amanliq bölümi, nurmuhemmet yasinning "qeshqer edebiyati" diki bir edebiy esiri sewebidin qolgha élin'ghanliqini étirap qildi. Sherqiy türkistan uchur merkizi, buningdin ilgiri nurmuhemmet yasinning qeshqer wilayetlik dölet bixeterlik idarisidiki mexpiy saqchilar teripidin, döletni parchilashqa urunush jinayiti bilen qolgha élin'ghanliqini élan qilghan.

Qolgha alghanliqini étirap qildi

Uchur merkizining ashkarilishiche, xitay hökümiti nurmuhemmet yasinning "qeshqer edebiyati" zhornilidiki " kök kepter" namliq edebiy esiri milliy bölgünchilikni teshwiq qilghan dep eyiplep, "qeshqer edebiyati" ning 2004 - yilliq 5 - sanini yighiwalghan. Biz nurmuhemmet yasinning ehwali heqqidiki uchurlarni igilesh üchün, maralbéshi nahiyilik saqchi idarisigha téléfon qilduq. Nahiyilik saqchi idarisining bir xadimi, nurmuhemmet yasinning qolgha élin'ghanliqini ret qilmidi. Biraq u, bu ishlar hazirche bizge qarangghu, dep jawap berdi.

Biz qolgha élin'ghan yazghuchining ehwali heqqidiki uchurlarni igilesh üchün, qeshqer wilayetlik saqchi idarisidiki da'iriler bilen dawamliq alaqilashtuq. Axiri qeshqer sheherlik saqchi idarisi amanliq etritining bir xadimi, muxbirimizning nurmuhemmet yasin heqqidiki su'allirigha jawab bérip, yazghuchining qolgha élin'ghanliqini étirap qildi. U mundaq dédi: "u qeshqer wilayitining maralbéshi nahiyisidin, u "qeshqer edebiyati" zhorniligha maqale yézip, eksiyetchil sözlerni qilghan."

"Bölgünchilik" ke da'ir délolar intayin köp

Bölgünchilikke da'ir délolar intayin köp, nechche yüzge yétidu. Uyghurlarning bölgünchilikke da'ir déloliri intayin köp,

Saqchi xadimi, nurmuhemmet yasinning üch ayning aldida qolgha élin'ghanliqini bildürdi.U, nurmuhemmet yasinning qolgha élin'ghinigha üch yérim aydek bolup qalghanliqini, uning téxi sotlanmighanliqi, délosi ürümchidiki yuqiri sotqa yollan'ghanliqini shundaqla hazir uning maralbéshidiki türmide tutup turiliwatqanliqini bildürdi.

Xitay saqchi da'irilirining ashkarilishiche, nurmuhemmet yasinning délosigha qeshqer wilayetlik saqchi idarisi mes'ul bolghan. Bu munasiwet bilen radi'omiz muxbiri aptonom rayonluq yuqiri sotqa téléfon qilip, nurmuhemmet yasinning délosini sürüshtürdi. Yuqiri sotning délo ishlargha mes'ul bir xadimi, " bölgünchilikke da'ir délolar intayin köp, nechche yüzge yétidu. Uyghurlarning bölgünchilikke da'ir déloliri intayin köp," dep körsetti.

Zhornal yighiwélinmaqta

Qeshqer sheherlik saqchi idarisidiki da'irilerning ashkarilishiche, qeshqer wilayetlik saqchi idarisi nurmuhemmet yasinning " kök kepter" namliq esiri bésilghan "qeshqer edebiyati" ning 2004 - yilliq 5 - sanini yighiwélish buyruqi chüshürgen. Qeshqer sheherlik saqchi idarisidiki saqchi xadim, zhornalni yighiwélishqa qeshqer wilayetlik saqchi idarisi , sheherlik saqchi idarisi shundaqla medeniyet idarisining seperwer qilin'ghanliqini bildürdi. "Qeshqer edebiyati" ning 5 - sani jem'iy 2000 nusxa tarqitilghan bolup, yuqiriqi saqchining ashkarilishiche, hazirgha qeder zhornalning köp qisimi yighiwélin'ghan. U, yighiwélin'ghan zhornallarning qeshqer sheherlik saqchi idarisi amanliq etriti bashliqining ishxanisida saqliniwatqanliqini bildürdi.

Sherqiy türkistan uchur merkizining xewer qilishiche, "örkishi" texellusi bilen tonulghan nurmuhemmet yasin, 1974 -yili qeshqerning maralbéshi nahiyiside tughulghan. U, hayatini edebiy ijadiyitidin alghan qelem heqqi bilen qamdaydighan erkin qelemkesh idi. Uning " oynaydighan bala barmu" , " tunji muhebbet" , " yürek yighlaydu" qatarliq kitapliri neshr qilin'ghan, 40 parchidin artuq esiri bir qanche toplamgha kirgüzülgen idi.(Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet