Türk dunyasi ortaq élipbesi tüzülmekchi


2007-12-13
Share

Türkiye jumhuriyiti pütün türkiy milletler ortaq ishlitidighan 34 herptin terkip tapqan bir élipbe tüzüp chiqishni pilanlimaqta. Türkiyining yéngi re'is jumhuri abdullah gül 9- 10- öktebir künliri türkmenistan'gha élip barghan ziyaritide turkologlarnimu élip barghan bolup, ziyariti jeryanida ulardin türk dunyasi ortaq élipbesi heqqide melumat alghan.

Mutexessisler, re'is jumhuri abdullah gülge, türkiy milletler otturisidiki til mesilisini hel qilish üchün latin élipbesi asasida ortaq bir yéziq tili yaritish kéreklikini, bu tilni yaritish uchun aldi bilen 34 herptin terkip tapqan bir élipbe tüzüp chiqish kéreklikini éytqan.

Bu türkologlar yene herqaysi türkiy jumhuriyetliri we türkiye re'is jumhurliqi tarmiqida türk dunyasi sékértarliqining qurulushigha abdullah gülning yétekchilik qilishi kéreklikini dégen. Türkologlar re'is jumhuri abdullah gülge türk dunyasi ortaq élipbesini tüzüp chiqish üchün türkiyining ottura asiya türkiy jumhuriyetlirige bésim ishlitishi kéreklikini éytqan. Abdullah gülning türkmenistan ziyaritige ortaq élipbe mesilisini muzakire qilish uchun fatih uniwérsitéti hazirqi zaman türkiy tilliri we edebiyatliri fakultéti mudiri prof. Dr. Memet qara, izmir ege uniwérsitéti türk dunyasi tetqiqat merkizi mudiri prof. Dr. Fikret türkmen we enqere uniwérsitéti til we tarix jughrapiye fakultéti mudiri Uyghurshunas prof. Dr. Sema barutchu özönder xanimmu qatnashqan.

Türkiyining burunqi re'is jumhurliri chet döletlerge ziyaretke barghanda hey'et ichige turkologlarni qoshmaytti. Bu qétimqi türkmenistan ziyaritige türkiy tilliri mutexessisliridin 3 kishini qoshushi, uning türk dunyasigha qanchilik ehmiyet béridighanliqining bir ipadisi iken. Bu ziyaretke qatnashqan türkolog prof. Dr. Fikret türkmen ependi bu ziyaret heqqide toxtilip mundaq dégen: "re'is jumhurimizning ilim ademlirinimu yénigha élip türkmenistan'gha bérishi nahayiti yaxshi bir bashlan'ghuch. Türkiy jumhuriyetliri bilen peqetla siyasi, iqtisadiy jehettinla emes, medeniy ma'arip jehettimu munasiwitimizni kücheytishimiz kérek. Mesilen türkmenistan bilen ortaq bolghan dedeqorqut, oghuznamigha oxshash dastanlirimiz bar. Ottura asiya türkiy jumhuriyetliri otturisidiki wizini emeldin qaldurup ortaq ilmiy muhakime yighinlirini échishimiz kérek." Türkiye re'is jumhuri abdullah gül, hazir qazaqistan'gha resmi ziyaret élip barmaqta. U ottura asiya ziyaritidin burun 10-ayda ezerbeyjan bilen gruziyege resmi ziyaret élip barghan idi.

Uyghurlarning türk dunyasidiki orni néme? Uyghurlar bu ortaq élipbedin qandaq paydilinishi kérek? xitay hökümiti buninggha ruxset qilarmu? (erkin tarim)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet