Uyghur baliliri 2-nöwetlik xelq'ara balilar uchrishishigha qatnashti


2006-06-12
Share
xelqara-osmurler.jpg
Pa'aliyetke qatnashqan Uyghur ösmürliri sehnide.

Türkiye insaniy yardem wexpining uyushturushi bilen istanbulda 2 - nöwetlik xél kara balilar uchrishishi ötküzüldi. Bu pa'aliyetke, tebi'iy apet, urush we diktatorluq tüzümi bilen bashquruluwatqan döletlerdiki zulum tüpeylidin yétim qalghan balilar qatnashti. Bu yil 2 - si ötküzülgen bu pa'aliyetke i'ordaniye, pelestin, iraq, somali, sudan, chécheniye, bosniye we afghanistan qatarliq 15 dölettin 550 etrapida bala qatnashti.

Uyghurlargha wakaliten sherqiy türkistan medeniyet we hemkarliq jem'iyitidin betul suydungli, asena suydunglu we aslinur tumtürk qatarliq 3 qiz ösmür qatnashti. Betul suydunglu "insan heqliri qeyerde?" dégen shé'irni oqudi. Shé'irning axirida qolidiki ayyultuzluq kök bayraqni körsitip turup, türkiyining bu bayraqni ésishni men'i qilghanliqini bilemsiler? dep sehnidin ayrildi, bu sozi onminglarche tamashibinlarning alqishlishigha sazawer boldi. Bu uchrishishta herqaysi döletlerdin kelgen balilar yash ösmürlerning derdini, qéyinchiliqlirini anglatqan sen'et nomurliri körsetti we shé'irlar oqudi. Biz neq meydan'gha téléfon bilen baghlinip turup ziyaret élip barduq.

Bu uchrishishning échilish nutiqini türkiye insaniy yardem wexpi bashliqi bulent yildirim ependi qildi. U mundaq dédi:

Dunyaning herqaysi jaylirida tebi'iy apet, urush we bezi döletlerning bésim siyasiti tüpeylidin yétim qalghan nurghun yash-ösmürler bar. Biz ulargha ige chiqishimiz kérek. Eger bu yash ösmürlerge ige chiqmisa, bu balilar organ tijariti, pahishilikke, chékishke oxshash yaman yollargha chüshüp kétidu. Biz insanlargha dunyadiki yétim balilarning we bésim astida yashawatqan döletlerdiki balilarning derdini anglitish üchün bu pa'aliyetni uyushturduq. Bugünki bu pa'aliyitimizge 10 ming etrapida kishi qatnishiwatidu, bu bizni téximu söyündürdi. Bugünki bu pa'aliyitimizni türkiyining eng chong téléwiziyiliri neq meydandin körsitiwatidu, bugünki pa'aliyitimizge sherqiy türkistandin bosniyegiche bolghan keng jughrapiyidin 15 etrapida dölettin kelgen balilar qatnashmaqta. Men türkiye insaniy yardem wexpi bashliqi bolush supiti bilen insanliq alimini dunyadiki yétim balilarni unutmasliqqa chaqirimen.

Bulent yildirim ependi Uyghur baliliri heqqide sorighan so'alimizgha jawap bérip mundaq dédi:

Sherqiy türkistan mesilisi uzun yillardin beri könglimizni yérim qiliwatqan bir mesilidur. Uzun yillardin beri sherqiy türkistanliq balilargha yardem qilish üchün déyishiwatimiz emma mumkin bolmaywatidu. Biz türkiyide sherqiy türkistan heqqide kitablar neshir qildurduq, sherqiy türkistan mesilisini türkiyining kun tertipige ekelduq. Türkiyidiki sherqiy türkistan ammiwiy teshkilatliri bilen dawamliq halda alaqe qurup, sherqiy türkistanning weziyiti heqqide melumat élip turuwatimiz. Sherqiy türkistandin kelgen oqughuchilargha oqush puli bérishni oylawatimiz. Sherqiy türkistandiki zulumni azaytish üchün türkiyining sherqiy turkistan'gha ige chiqishi kérek, buning üchün jama'et pikri toplash kérek. Bizning bu pa'aliyitimizde sherqiy türkistanliq balilargha yer bérishimizdiki sewep sherqiy türkistan mesilisige turk jama'etchikining diqqet étibarini tartishtin ibaret.

Bu qétimqi pa'aliyet heqqide tepsili melumat igilesh üchün, ixtiyari muxbirimiz erkin tarim yene xelq'ara balilar uchrishishigha téléfon qilip neq meydandin bu pa'aliyetke qatnishiwatqan heyrullah efendigil bilen téléfon ziyariti élip bardi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet