Ottawadiki xitay bash elchixanisi aldida naraziliq namayishi élip bérildi

8‏ - Ayning 7‏ - küni yeni béyjing olimpik tenheriket yighinining échilishidin bir kün burun kanadaning paytexti ottawa shehiridiki xitay bash elchixanisi aldida béyjing hökümitining kishilik hoquq depsendichiliklirige shuningdek Uyghur we tibetlerge qaratqan basturush siyasitige qarshi keng kölemlik bir naraziliq namayishi élip bérildi.
Muxbirimiz ömer qanat xewiri
2008-08-07
Share
kanada-rukiye-pegy1-305 Kanada parlamént ezasi péggy nash xanim, hüseyin jélil mesiliside xitaygha qarita bésimni qaytidin kücheytishke ündesh namayishida.
RFA Photo / Kamil Tursun

Dunya Uyghur qurultiyi yashlar komitétining bashliqi bextiyar shemshidinning neq meydandin radi'omizgha bergen melumatigha qarighanda, kanada parlaméntning bir qisim ezaliri, kanada Uyghur birleshmisi, tibetler, xelq'ara kechürüm teshkilati falun'gung teriqiti we xitay démokratliri qatarliq teshkilat we guruppilarning orunlashturushi bilen ötküzülgen namayishqa besh yüzdin artuq adem qatnashqan bolup, namayishta kanadaning sabiq dölet ministiri déwid kalgor, kanada parlamént ezasi we sabiq edliye ministiri we Uyghurlargha wakaliten söz qilghan montiriyal uniwérsitétining oqughuchisi Uyghur qizi qelbinurning Uyghurlar, xitay hökümitining Uyghurlargha qaratqan basturush heriketliri we höseyin jélil mesilisi heqqidiki sözliri namayish qatnashquchilirining qizghin alqishigha érishken.

Bügün namayishning teshkilligüchilirining biri bolghan kanadaning sabiq dölet ministiri déwid kelgur ependi radi'omizgha bergen bayanatida bügünki namayishning meqsiti heqqide toxtilip mundaq dédi ": bügünki namayishning meqsiti xitay hökümitige 32 milyon kanada xelqining we bügünki naraziliq herikitige qatnishiwatqanlarning, kishilik hoquq mesiliside bergen wedilirige emel qilishi toghrisidiki telipini yene bir qétim eskertishtin ibaret. Lékin béyjingda turuwatqan her qandaq bir chet'ellik muxbir xitay hökümitining 2008‏ - yilliq olimpik tenheriket yighinigha sahibxaniliq qilish hoquqi béyjinggha bérilgende, xelq'ara jama'etke bergen wedilirining héchbirige emel qilmighanliqini yaxshi bilidu."
 
Bayanatida Uyghurlarning bu namayishqa qatnashqanliqidin nahayiti xursen bolghanliqini ipadiligen kélgor ependi Uyghurlar mesilisi üstide toxtilip mundaq dédi: " Uyghurlar tinchliqperwer, zorawanliq heriketlirini qollimaydighan bir xelq. Xitay hökümitining Uyghurlargha qaratqan siyasiti kishini ghezeplendürüdu. Qeshqerde 16 xitay saqchisining öltürülgenliki Uyghurlarning asasliq éqimigha wekillik qilalmaydighan bir weqe. Lékin xitay hökümiti her bir Uyghurgha térrorchidek mu'amile qilmaqta. Bu nahayitimu xata bir qarash bolup biz buninggha qet'iy qarshi turimiz ."

Ottawadiki xitay bash elchixanisi aldida ötküzülgen naraziliq namayishqa kanadaning montiriyal shehiridin kélip qatnashqan erkin ependi bügünki namayishtiki héssiyatini sözlep berdi.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet