Ereb döletliridiki xelq inqilabliri keskinleshmekte

Tunis bilen misirdiki namayishlar méwe bérip, namayishchilar telep qilghanlirining köplirige érishkendin kéyin, bashqa döletlerde bash kötürgen xelq namayishliri nisbeten janlinishqa bashlighan idi.
Ixtiyariy muxbirimiz ömerjan
2011.04.19
ottura-sherq-birleshme-305.jpg Ottura sherqtiki fransiye herbiy ayropilani. 2011-Yili 17-aprél.
AFP

Bolupmu yemen, liwiye qatarliq döletlerdiki namayishchilar eng qisqa waqit ichide ghelibe qilishni mölcherligen bolsimu, bu ikki dölettiki namayish uzun'gha sozulghan xelq inqilabigha aylinip, ichki urush haligha yétip qalmaqta. Tehlilchiler yemen bilen liwiye weziyitining téximu yamanliship kétishidin ensirimekte iken. Bu ikki dölettiki kélishmeslikni az dégendek, süriyide chiqqan xelq namayishi qoralliq basturulushtin qetli'amgha ötmekte.

Yemen weziyiti yamanlashmaqta

Yemen weziyiti kündin-kün'ge yamanliship kétip barmaqta. Ereb döletliridiki teshwiqat wasitiliri yemen re'isi éli abdulla salih texttin chüshüp béridighanliqigha alliburun wede qilghan bolsimu, aqiwitining misir re'isi hösni mubarekke oxshash sotlinish derijisige yétip qélishidin qorqqanliqtin, inqilabchi xelqtin özining we a'ilisining qoghdilishi heqqide kapalet telep qilghanliqini we inqilabchilarning bu shertni ret qilghanliqini sözlimekte.

Qatarning “El jezire” téléwiziye qanilining 2011-yili 19-aprél seyshenbe künidiki xewirige köre, ereb qoltuqi döletliri hemkarliq kéngishige eza döletler chong yighin chaqirip, yemendiki inqilabchilarni yemen re'isining texttin chüshüp bérishi üchün u we uning a'ilisi üstidin erzdar bolmaydighanliqi heqqide kapalet bérishini telep qilghan. Emma yemendiki namayishchi xelq éli abdulla salihning héchqandaq bir shertini qobul qilmaydighanliqini burunla jakarlighan idi.

Yemendiki namayishchilarning wekili 2011-yili19-aprél küni “El jezire”téléwiziye qaniligha bergen bayanatida mundaq dédi:“ Biz yemenni démokratik medeniy bir dölet qilip qurup chiqish üchün yolgha chiqtuq, éli abdulla salihning héchbir shertini qobul qilmaymiz, uning tizdin textni boshitishini telep qilimiz. Biz axirqi ghelibimizge érishmigiche toxtimaymiz.”

Süriyide namayishchilar oqqa tutuldi

Tehlilchilerge köre, süriyidiki namayish bashqa döletlerge qarighanda kéyin bashlan'ghan bolsimu, eng köp qurban bergen bir namayish bolmaqta. Süriyining hems shehiri eng chong kölemlik xelq namayishigha sehne bolmaqta.

Qatarning “El jezire”téléwiziye qanilining süriyidiki muxbiri emmar qurebi 2011-yili19-aprél seyshenbe küni süriyining hems shehiridin bergen bayanatida mundaq dédi: “Süriyidiki basturush qorqunchluq élip bérilmaqta. Süriye saqchiliri namayishchilargha ashkara oq chiqirip bir qanchisining jénigha zamin boldi we nurghunlirini yaridar qildi. Hazir süriyining hems shehiri qanliq basturushqa shahit bolmaqta. Bügün seherde 4 kishi hayatidin ayrildi. Tünügün hems xelqi saqchilar teripidin étip öltürülgen 7neper namayishchini depne qilghan idi. Yaridarlarning sanini élish qiyin bolmaqta. Chünki süriye saqchiliri namayishchilarni tarqitiwétish üchün oqqa tayanmaqta. Hazir süriyidiki basturush oq chiqirishtin tereqqiy qilip qetli'amgha ötmekte.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.