Ottura sherqte weziyet jiddiyleshmekte

Xewerlerge qarighanda, liwandiki hizbulla militanliri isra'iliye chégra qoghdash qisimlirigha hujum qilip , 8 isra'iliye eskirini öltürüp, ikki isra'iliye eskirini görüge alghandin kéyin, isra'iliye herbiy qisimlirining peyshenbe küni quruqluq, déngiz we hawadin liwandiki nishanlargha qarshi élip barghan hujumlirida azdégende 55 kishi ölgen.

Toqunushtiki éghir chiqim

Liwandiki hizbulla militanlirining, isra'iliyining shimaliy rayonigha qarshi rakéta bilen élip barghan qaytarma hujumida bir isra'iliyilik ayal ölgen.

Bu arida isra'iliye herbiy qisimlirining ötken ay pelestinlik militanlar teripidin görüge élin'ghan bir isra'iliye eskirini qutquzush meqsitide pelestin tupraqlirida bashlatqan herbiy herikitimu dawamlishiwatidu. Isra'iliye urushchi ayropilanliri peyshenbe küni ghezzediki pelestin tashqi ishlar ministirliqi binasini bombardiman qilghan. Fransiye agéntliqning xewer qilishiche, bu bombardiman netijiside 10 pelestinlik bala yarilan'ghan.

Pelestin milliy hakimiyet orginining prézidénti mehmud abbas, bu toqunushlarning pütün ottura sherq rayonigha kéngiyip kétish xewpi toghrisida agahlandurdi.

Siyasiy mulahizichiler, isra'iliyining ghezzege herbiy qisimlirini ewetip, liwan'gha qarshi herbiy heriket bashlighanliqi, peqet pelestinlik we hizbulla militanliri teripidin görüge ilin'ghan eskerlirini qutquzush üchünla emeslikini , ular eskerlirini qayturup élish bilen birge, pelestinde hakimiyet béshigha kelgen xamas we liwandiki hizbulla herikitige qattiq zerbe bérip, ottura sherq rayonida oyunning usulini özgertishke tirishiwatqanliqini bildürmekte.

Hizbulla herikitining rehbiri sheyx hesen nesrulla, hizbulla ezalirining pelestinliklerge yardem qilish üchün, isra'iliyige qarshi heriket élip barghanliqini, görüge élin'ghan isra'iliye eskerlirini qayturup bérish üchün söhbetke teyyar ikenlikini jakarlidi.

Emma isra'iliye bash minsitiri, xamas militanlirining tekliplirini ret qilghandek, hizbulla rehbirining bu teklipinimu ret qildi.

Ottura sherq rayonida tinchliqni qaytidin ornitish üchün birlikte pa'aliyet élip bériwatqan amérika, yawrupa ittipaqi, rusiye we b d t bu toqunushlarning chong bir urushqa aylinip kétishining aldini élish üchün öz‏- ara söhbetler élip barmaqta. Lékin bu döletler toqunushlargha perqliq köz qarashlar bilen mu'amile qiliwatidu.

Döletlerning oxshash bolmighan qarashliri

Amérika hökümiti urushning kéngishining aldini élishni we tinchliqni tekitlewatqan bolsimu, emma hizbullani liwandiki toqunushlarning bashlinishigha sewbchi qilip körsetti.

Gérmaniyini ziyaret qiliwatqan amérika prézidénti jurj bush bu heqte bergen bayanatida, isra'iliyining özini qoghdash hoquqi barliqini tekitlep, hizbulla tinchliqni xalimaydu, xamasning militanliri tinchliqni xalimaydu. Biz tinchliqni xalaydighanlar bilen hemkarliqimizni dawamlashturimiz, dédi. U isra'iliye hökümitini liwandiki soniyura hökümitining hakimiyettin chüshishige seweb bolidighan heriketlerdin özini qachurushiqa chaqirdi.

Amérika prézidénti shundaqla, suriyidin isra'iliyining eskerlirini qoyup bérishi üchün hizbulla herikitige bésim ishlitishini telep qildi.

Lékin yawropa ittipaqi we rusiye toqunushlardin endishilen'genlikini tekitlep, isra'iliyining herikitini tenqid qildi. Yawrupa ittipaqining nöwettiki re'is döliti bolghan finlandiye, isra'iliyining liwandiki hizbulla militanlirining hujumlirigha qarshi bundaq chong keng kölemlik herbiy heriket élip barghanliqini tenqid qildi. Yawrupa ittipaqining muhim ezalirining béri bolghan fransiye isra'iliyining liwan'gha qaratqan herbiy herikitini qattiq tenqid qilip, liwan hökümitining b d t bixeterlik kéngishining mesilige arilishishi toghrisidiki telipini qollaydighanliqini bildürdi.

Rusiye hökümiti isra'iliyining pelestinlik we hizbulla militanliri teripidin görüge élin'ghan eskerlirini qutquzush üchün liwan we pelestin tupraqlirigha qaratqan hujumlirini qattiq eyiblidi. Rusiye tashqi ishlar minstirliqining bayanatchisi mixa'il kaminin moskwada bergen bayanatida, isra'iliyini liwanning .Milliy igilik hoquqigha hörmet qilishqa chaqirdi. (Qanat)