Пакистан йәнә 9 нәпәр уйғурни хитайға қайтуруп бәрди

Пакистанниң қәбилиләр районида бир түркүм уйғур мустәқилчилириниң қораллиқ тәрбийә көрүватқанлиқи олимпиктин буянқи хәвәрләрдә пат - пат тилға елинмақта. Нөвәттә уларниң сани, тәшкилий мунасивити һәққидә ениқ мәлумат йоқ.
Мухбиримиз шөһрәт һошур
2009-04-27
Share
xu-zardari-beyjingda-305.jpg 15 - Өктәбир, хитайни зийарәт қиливатқан пакистан президенти асиф зардари билән ху җинтав, хитай һөрмәт қаравуллириниң алдида.
AFP Photo

Әмма интернеттики толуқсиз мәлуматларда, уларниң шәрқи түркистан ислам партийиси нами астида тәшкилләнгәнлики, шәрқи түркистандики хитай һакимийитигә хатимә бериш үчүн қораллиқ күрәш йолини таллиғанлиқи мәлум. Бүгүн пакистанда чиқидиған күндилик хәвәрләр гезити әнә әшу уйғурлардин 9 кишини пакистан һөкүмитиниң хитайға қайтурғанлиқини хәвәр қилди.

Хәвәрдә пакистан ички ишлар министирлики тәминлигән учурға асасән, "бу 9 нәпәр уйғур бихәтәрлик күчлиригә һуҗум қилиш қатарлиқ террорлуқ һәрикәтлири билән шуғулланған" дәп йезилған. Әмма қайси дөләтниң бихәтәрлик күчлиригә вә қачан, қәйәрдә һуҗум қилғанлиқи баян қилинмиған.

Һазирға қәдәр пакистанниң қәбилиләр районида уйғурларниң бар - йоқлуқи вә кимлики һәққидә уйғур тәшкилатлири арисида пәрқлиқ қарашлар мәвҗут; бәзиләр қәбилиләр районида уйғурлар йоқлуқини билдүрсә, бәзиләр бу җайда бир түркүм уйғурларниң панаһлиниватқанлиқини билдүргән; йәнә бәзиләр болса, шәрқи түркистан мәсилисидә тинчлиқ йолидин үмид үзгән бир түркүм яшларниң пакистан вә афғанистан чегриси арисида һәрбий мәшиқ елип бериватқанлиқини вә хитайға қарши қораллиқ қаршилиқ көрситиш үчүн тәйярлиниватқанлиқини билдүрмәктә.

Һазирға қәдәр мәзкур җайларда паалийәт елип бериватқан уйғурларға аит тәшвиқат материяллирида, мәзкур гуруппиниң нами һәққидә шәрқи түркистан ислам һәрикити, түркистан ислам партийиси вә яки шәрқи түркистан ислам партийиси қатарлиқ үч хил нам мәвҗут. Мәзкур тәшкилатниң әң йеқинқи баянатида тәшкилатиниң нами шәрқи түркистан ислам партийиси дәп аталған.

Мәзкур тәшкилатқа аит тәшвиқат материяллирида, уларниң әлқаидә вә талибан билән тәшкилий мунасивити йоқлуқи әскәртилгән. Болупму шәрқи түркистан ислам һәрикитиниң сабиқ башлиқи һәсән мәхсум, 2003 ‏ - йили радиомизға бәргән баянатида, әлқаидә вә талибан болған мунасивитини ашкара рәт қилған иди.

Пакистан һөкүмитиниң бу  қилмишиға д у қ вә һәрқайси мәмликәтләрдики уйғур тәшкилатлири қаттиқ наразилиқ билдүрди вә пакистанни әйиблиди.

Канада уйғур җәмийитиниң рәиси руқийә турдуш ханим пакистан һөкүмитиниң 9 нәпәр уйғурни хитайға өткүзүп бәргәнликини радиомиз арқилиқ қаттиқ әйибләп баянат елан қилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт