Amérika - pakstan munasiwetliri we uning kelgüsi toghrisida guwahliq bérish yighini chaqirildi


2007.07.26

25- Iyul charshenbe küni amérika kéngesh palatasi tashqi munasiwetler komitéti guwahliq bérish yighini chaqirip pakistanning kelgüsi: démokratiye qurulushimu yaki esebiylikni ulghaytishmu dégen téma astida söhbet élip bardi.

Yighin massachuséts wekili démokrat jon keriyning riyasetchilikide dawam etti. U soz béshida, "pakistanning hazirqi ehwali intayin halqiliq nuqtida turmaqta" dep körsetti we amérika iraqtiki urushigha milyonlap pul serp qiliwatqan we iran munasiwetlirige intayin köngül bölüwatqan bir peytte , amérika jasusluq organlirining pakistanda elqa'ide we taliban küchlirining tereqqiy qilip amérika bixeterliki üchün biwasite tehdit tughduruwatqanliqi toghrisida agahlandurush bergenlikini eskertip ötti.

Nikolas burns": sherqiy jenubi asiyadiki térrorluqqa qarshi kürishimizning ghelibisi intayin muhim"

Bu nöwetlik yighinda asasliq guwahliq bergüchi nikolas burns bolup u amérika hökümiti pakistan we hindistan ishliri üchün alahide teyinligen elchi we mu'awin tashqi ishlar ministiri.

Nikolas burns, amérikining elqa'ide bilen küresh qilishta pakistanning amérika qoshma shtatlirining térrorluqqa qarshi küresh qilishtiki eng muhim shériki ikenlikini eskertip ötti we pakistandiki qebile rayonida edep kétiwatqan elqa'ide qoralliq küchlirige ünümlük zerbe bérishte yenila pakistan hökümitige éhtiyaji chüshidighanliqini körsitip " elqa'ide we taliban küchliri pakistan zéminida bir küch süpitide mewjud bolup turmaqta . Bu düshmenlerni meghlup qilish bizning sherqiy jenubi asiyada térrorluqqa qarshi kürishimizning ghelibisi üchün intayin muhim" deydu.

Jon keriy": pakistandiki hazirqi istratégiyimiz netije bermidi"

Guwahliq bérish yighini jeryanida, bir nechche démokratlar pakistan prézidénti musherrepning térrorchilar bilen küresh qilish rohigha nisbeten shübhilinidighanliqini otturigha qoyup, nurghun térrorchilarning, afghanistan chégrisidin ötüp pakistan'gha bériwalghanliqi hemde bush hökümitining pakistan hökümitige 2001- yili 11- séntebir weqesidin kiyin 10 milyard dollar yardem puli bergenlikidin anche razi emeslikini ipadileshti.

Jon keriy amérikining afghanistandiki herbiy ilgirileshlirining amérikining kütkinidek bolmighanliqini otturigha qoyup "bizning pakistandiki hazirqi istratégiyimiz, bolupmu bizning asasliq nishanimiz bolghan térrorchilargha qarshi turush kürishimiz netije bermidi" dédi we buning pakistan üchün we amérika ‏- pakistan munasiwetliri üchün bek muhim ikenlikini eskertip, bu xil munasiwetning bek zor istratégiyilik ehmiyiti barliqini tekitlidi.

Emma, burns musherrepning térrorchilar bilen jeng qilish rohidin guman qilmaydighanliqini ipadilep: "pakistan térrorchilar bilen jeng qilishta nurghun eskiridin ayrildi" deydu.

Jumhuriyetchi palata ezasi richard lugar amérika ‏- pakistan munasiwetlirining intayin murekkep ikenlikini körsitip ötti we amérikining pakistan'gha bergen yardimi choqum pakistanning térrorluqqa qarshi küreshliridiki ilgirilesh we herbiy idare qilishtin mustesna bolghan démokratiye yönilishige qarap ilgirilesh sherti asasida élip bérilishi kéreklikini otturigha qoydi.

Amérika mutexessisi ": sherqi jenubiy asiya istratégiyisini qayta tertipke sélish pursiti keldi "

Guwahliq bergüchi burns amérika bilen pakistanning diplomatiye tarixini eslep ötüp gerche pakistan bilen amérika munasiwetliride melum üzükchilik sadir bolghan bolsimu, bundin kéyin undaq bolmaydighanliqini otturigha qoyup: " biz amérikiliqlar uchun, pakistan bilen bolghan hemkarliqimizni téximu izchillashturup pakistanda xeyirlik ishlarni qilishqa özimizni atashtin, u döletning téximu muqim bolushigha yardem bérishtinmu muhim ish bolmisa kérek "deydu.

Palata ezasi jim web xitay bilen pakistan munasiwetlirini eslep ötüp: "eger xitayning yardimi bolmighan bolsa , pakistan yadro qorallirigha érishelmigen bolatti" dédi we bu heqte burun amérika hökümitige agahlandurush bergenlikini, pakistan bilen bolghan munasiwetning yenila murekkep bir mesile ikenlikini otturigha qoydi.

Axirida doktur fikolen, pakistanning nurghun sinaqlargha duch kéliwatqanliqini, pakistanning kelgüsi démokratiyige qarap méngishi üchün, xitayning pakistanda xéli kop menpe'eti bar bolghanliqi üchün, xitay we hindistan bilen téximu ilgiriligen halda söhbet élip bérishi kéreklikini, hemde xitay we hindistanning pakistanning bir radikal döletke aylinip qélishini xalimaydighanliqini , mushu nuqtidin éytqanda amérika üchün hindistan bilen pakistan'gha yardemliship sherqi jenubiy asiya istratégiyisini qayta tertipke sélish pursiti keldi , ‏- dédi. (Jüme)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.