Президент пәрвез мушәррәп һәрбий һаләтни бикар қилидиғанлиқини җакарлиди


2007.12.14
Share on WhatsApp
Share on WhatsApp

Пакистан һөкүмити, пакистан президенти пәрвез мушәррәп тәрипидин елан қилинған һәрбий һаләтни шәнбә күни бикар қилидиғанлиқини җакарлиди. Лекин, пакистандики сиясий өктичиләр, һәрбий һаләтниң бикар қилиниши 8‏- январ күни пакистанда өткүзүлидиған сайламниң адаләтлик бир сайлам болушиға капаләтлик қилалмайду, дийишмәктә.

Пакистан һөкүмәт даирилири, 3‏- ноябир күни пакистан президенти пәрвез мушәррәп тәрипидин елан қилинған һәрбий һаләтниң шәнбә күни бикар қилинидиғанлиқини билдүрмәктә. Әмма, пакистандики сиясий өктичиләр, пакистанда 8‏- январ күни өткүзүлидиған парламинт сайлимиға бир нәччә һәптә қалған бир мәзгилдә, пакистанда мәтбуат вә сиясий паалийәтләр үстидики чәклимиләрниң давамлишиватқанлиқини, шуңа һәрбий һаләтниң бикар қилинишиниң, парламинт сайлиминиң адаләтлик өткүзүлүшигә капаләтлик қилалмайдиғанлиқини баян қилмақта.

Пакистанниң сабиқ баш минстирлири, бинәзәр бото вә наваз шерипниң партийилири, пакистанда президент мушәррәп тәрипидин тәйинләнгән вақитлиқ һөкүмәтниң сайлам нәтиҗисини өзгәртиветиш еһтималлиқи барлиқини илгири сүрмәктә. Улар президент мушәррәпниң пакистандики һәрбий һаләтни бикар қилиш қарарини, ғәрб дөләтлириниң, болупму америкиниң бесимидин қутулуш тәшәббуси дәп қаримақта.

Пакистандики сиясий кризисниң, бу дөләттики радикал диний гуруппиларни техиму күчәйтиветишидин әндишә қиливатқан ғәрб дөләтлири болупму, америка һөкүмити, пакистандики һәрбий һаләтни дәрһал бикар қилиши үчүн, президент пәрвез мушәррәпкә бесим ишләтмәктә иди.

Пакистандики өктичи сиясий анализчилар ейтишичә, пакистан президенти пәрвез мушәррәп, пакистанда өткүзүлидиған парламинт сайлимида өктичи партийиләр ғәлибә қилса, парламентниң қарари билән уни президент вәзиписидин елип ташлайдиғанлиқидин әндишә қилмақта. Шуңа сайламда өктичи партийиләрниң ғәлибә қилишиниң алдини елиш үчүн җиддий тиришчанлиқ көрсәтмәктә.

Гәрчә, пакистан президенти пәрвез мушәррәп, пакистандики радикал диний гуруппиларниң һуҗумлирини күчәйткәнликини, пакистанда һәрбий һаләт елан қилишиниң асаслиқ сәвәби дәп көрсәткән болсиму, лекин пакистан хәлқиниң асаслиқ қисими пәрвез мушәррәпниң өз һакимийитини қоғдап қилиш үчүн пакистан һәрбий һаләт елан қилғанлиқини тәкитлимәктә. Уларниң билдүрүшичә, пакистанда һәрбий һаләт елан қилинғандин кейин, диний радикал гуруппиларниң һуҗумлири азаймиған әксичә, техиму көпәйгән. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.