Benezir buttoning pakistan xelq partiyisi eng köp orun'gha érishti

• Muxbirimiz jümening bu heqtiki toluq melumati
• Download story audio

18- Féwral düshenbe küni pakistanda élip bérilghan saylam netijisidin qarighanda, nöwettiki pakistan prézidénti perwiz musherrepni qollighuchi radikal islamchi partiye pakistan musulmanlar ittipaqi partiyisi( q) 15 pirsent awazgha ériship éghir zerbige uchridi. Mezkur partiye parlaménttiki 268 orunning 42sige érishken bolup, melum bolushiche, perwiz musherrepning 19 neper ministiri parlaménttiki orunliridin ayrilip qalghan.

Buttoning pakistan xelq partiyisi yuqiri awazgha érishti

Bu nöwetlik saylamda eng kop awazgha érishken partiye 2007-yili 17- dékabir suyiqestke uchrap ölüp ketken sabiq bash ministir benezir buttoning partiyisi: pakistan xelq partiyisi bolup, 88 orun'gha we ayallar, az sanliq milletler üchün qaldurulup qoyulghan 44 orun ichidiki 25 orun'gha ériship birleshme hökümet qurushta yétekchilik orun'gha ötken.

Hazir pakistanda ikki xil musulmanlar ittipaqi partiyisi bar bolup, bularning birsi 1999- yili perwiz musherrep teripidin aghdurulup sürgün qilin'ghan sabiq bash ministir nawaz sherif bashchiliqidiki pakistan musulmanlar ittipaqi (nawaz) yaki nawaz ittipaqi, yene birsi perwiz musherrepni qollaydighan partiye qu'a'ide ezem yaki padishah partiyisi dep atalghan pakistan musulmanlar ittipaqi ( q) qatarliqlar.

Nawaz sherip partiyisi ikkinchi boldi

Bu nöwetlik parlamént saylimida, nawaz sherif yétekchilikidiki pakistan musulmanlar ittipaqi( nawaz) parlaménttiki 268 orunning 65 ige we wasitilik saylan'ghan we bashqa qollighuchiliridin bolup 20 orun'gha ériship ikkinchi orun'gha ötti.

Melum bolushiche, peyshenbe küni yuqirida parlaménttiki eng köp orun'gha érishken ikki partiye yeni pakistan xelq partiyisi bilen pakistan musulmanlar ittipaqi ( nawaz) yaki nawaz ittipaqi rehberliri esif zerdari bilen nawaz sherif uchriship, perwiz musherrepni texttin chüshürüsh üchün birleshme hökümet qurush toghrisida söhbet élip barghan.

Benezir butto xanimning yoldishi asif eli zerdarining royétirs agéntliqigha bildürüshiche, u lar hazir pakistan duch kéliwatqan mesililerni hel qilish charisi üstide izdiniwatqanliqi we bu nöwetlik parlaméntning roli üstide toxtilip mundaq dégen: " parlamént qaysi prézidént bilen birge ishligini bolidighan we yaki qaysi bilen birge ishligini bolmaydighanliqini qarar qilidu" dégen.

Nawaz sherif:" musherrepning küni axirlashti"

Ötken yili 3- noyabir pakistanda herbiy halet yürgüzülüp, pakistan aliy soti bikar qilinip bash sodiye nezerbend astigha élin'ghan idi.

Ötken yili 11 ‏- aydin buyan öyige nezer bend qilin'ghan bash sodiye chawdhryning öyige qarap yol alghan nawaz sherif ependi 150 dek adwokatlar topigha nutuq sözlep: " hazir bash sodiye iftixar chawdhry we bashqa solchilarni mehkimilirige qayturidighan waqit keldi" dégen.

U yene, musherrepning derhal istépa bérish kéreklikini bildürgen we: " musherrepning küni axirlashti.. Musherrep bolsa bir qanunsiz yollar bilen hoquqqa érishken qanunsiz prézidént" dep musherrepni eyibligen.

Aq saray yéngi hökümetning musherrep bilen ep ötüshini xalaydu

Emma pakistan prézidénti musherrepning wal- sitrit zhurniligha bildürüshiche, u hazirche istépa bérishni téxi oylashmighan. Melum bolushiche, amérika hökümiti hazir pakistanda meydan'gha kélish aldida turghan yéngi hökümetni pakistan prézidénti perwiz musherrep bilen ep ötüp ishleshke righbetlendürgen.

Aq saray bayanatchisining bildürüshige qarighanda, amérika prézidénti bush seyshenbe küni perwiz musherrepke téléfon qilghan bolup, emma bayanatchi ularning némilerni déyishkenliki heqqide tepsiliy toxtalmighan.

Analizchilar: xelq partiyisi bilen pakistan musulmanlar ittipaqi hemkarliship kételmesliki mumkin

Gerche pakistan xelq partiyisi bilen nawaz sherfining pakistan musulmanlar ittipaqi birleshme hökümet qurush üchün söhbetleshken bolsimu, roytérsta körsitishiche, analizchilar bu ikki partiyining hemkarliship kételishige guman bilen qaraydighanliqini bildürgen.

Roytérsta xewer qilinishiche, pakistan xelq partiyisi bilen pakistan musulmanlar partiyisi arisida uzun mezgillik adawet bolghachqa, hazir musherrepmu bu ikki partiyining birleshme hökümet qurushta pikir birliki hasil qilalmasliqini kütüwatqan iken.

Wehalenki, pakistan xelq partiyisining rehbiri asif eli zerdari, pakistandiki bashqa ushshaq partiyilerning rehberliri bilen we étnik pashtunlar awam xelq partiyisi rehberliri bilen körüshken bolup melum bolushiche, ular "aliy parlamént" qurushta hemkarlishidighanliqini bildürüshken.

Étnik pashtunlar partiyisi parlaméntta 9 orun'gha érishken idi. (Jüme)