Béyjingning mu'awin sheher bashliqi lyu jixu'a wezipisidin élip tashlandi

Béyjingda échilidighan olimpik insha'atigha mes'ul bolup kéliwatqan béyjingning mu'awin sheher bashliqi lyu jixu'a yéqinda, béyjing sheherlik xelq qurultiyi komitéti teripidin " turmushta chirikliship ketken " dégen seweb bilen wezipisidin élip tashlandi.

Bu heqtiki uchurlar choqum jem'iyetke ashkarilinidu

Xitay shinxu'a agéntliqi teripidin bérilgen xewerdin melum bolushiche, béyjing sheherlik xelq qurultiyi komitétining lyu jixu'ani wezipisidin qalduriwétishi uning " gunahi éghir, xataliq ütküzüsh jeryanidiki ispat toluq, xataliq ötküzüsh ehwali éghir, tesiri rezil" bolghanliqtin iken. Lékin mezkur xewerde lyu jixu'aning zadi néme gunah ötküzgenliki üchün wezipisidin qaldurulghanliqi éniq yézilmighan.

Biz bu heqte béyjing shehirining heqsiz téléfon léniyisige téléfon qilip, heqiqiy sewebni sürüshtürmekchi bolduq. Ziyaritimizni qobul qilghan nöwetchilik qiliwatqan bir xadim gerche lyu jixu'aning wezipisidin élip tashlan'ghanliqigha iqrar bolghan bolsimu, heqiqiy seweb heqqide hazirche éniq bir néme dep bérelmeydighanliqini bildürdi:

"Toghra, bu heqtiki uqturushni bizmu téxi emdi tapshuruwalduq. Lékin zadi néme sewebtin bundaq bolghanliqi heqqide téxi héchqandaq éniq melumat bérilmidi. Lékin men ishinimenki, yene bir nechche kündin kéyin, bu heqtiki uchurlar choqum jem'iyetke ashkarilinidu".

Munasiwetlik melumatlarda körsitilishiche, bu yil 57 yashqa kirgen lyu jixu'a wezipisidin élip tashlinishtin burun, béyjing shehirining sheher pilani, yer-zémin bashqurushi we tenterbiye ishlirigha mes'ul bolup kelgen hemde 2008 ‏- yili échilidighan olimpik yighin meydanining qurulush ishlirigha mes'ul bolghan.

Analizchilar: lyu jixu'aning xizmettin élip tashlinishini olimpik insha'ati bilen zich munasiwetlik

Xongkongda neshr qilinidighan mingbaw gézitide élan qilin'ghan obzorda " xitay kompartiyisining yuqiri derijilik emeldarliri uzundin buyan tashqi dunyagha köp qétim bayanat élan qilip, olimpik insha'atining mutleq pak bolushigha wede qilghan. Lékin hazir olimpik insha'atining eng yuqiri derijilik emeldari bolghan lyu jixu'aning turmushtiki chiriklik mesilisi tüpeylidin xizmitidin élip tashlan'ghanliqi ademni chongqur oygha salidu. Yeni olimpik insha'atining süpitige guman bilen qarashqa toghra kélidu " dep körsitilgen.

Biz bu heqte béyjing olimpik yighinining guruppa derijilik komitétigha téléfon qilghinimizda, ziyaritimizni qobul qilghan mezkur guruppa xizmetchisi "lyu jixu'a mu'awin sheher bashliqi bolsimu, uning olimpik insha'ati bilen biwaste munasiwiti yoq, shunga uning xizmettin élip tashlan'ghanliqi olimpik insha'atigha héchqandaq tesir körsitelmeydu" dep lyu jixu'aning olimpik inshi'atigha mes'ul ikenlikini inkar qildi:

"Éniq qilip éytqanda, u olimpik insha'atigha mes'ul emes, hemde olimpik komitétining ezasimu emes, u peqet sheher bashliqi, uning xizmiti sheher qurulushliri bilen munasiwetlik, elwette buning ichide olimpik yighin meydani bilen munasiwetlik qurulushlarmu bolushi mumkin, lékin bundaq bolushi bilen, uni olimpik insha'atigha tesir yetküzidu dések bolmaydu".

Ziyaritimizni qobul qilghan béyjing shehiri heqsiz liniyisining xadimi gerche lyu jixu'aning olimpik inshi'atigha mes'ul ikenlikini inkar qilmighan bolsimu, bu ishning peqet uning shexsi turmushi bilen munasiwetlik ikenlikini tekitlidi:

"Xatirjem bolung, hergiz tesiri bolmaydu. Uni xizmettin élip tashlashtiki seweb peqet uning shexsi mesilisi bilen munasiwetlik, bu ish hergizmu olimpik insha'atigha tesir körsitelmeydu ".

Lékin köpligen analizchilar, lyu jixu'aning xizmettin élip tashlinishini olimpik insha'ati bilen zich munasiwetlik dep qarimaqta.

Ularning bildürüshiche, béyjing shehirining bashliqi bolghan hemde olimpik inshi'atigha mes'ul bolup kelgen ademning chiriklik mesilisi tüpeylidin texttin chüshüshi olimpik inshi'atidiki chiriklikning heqiqeten éghir ikenlikini körsitip béridiken. (Méhriban)