Xitay hökümiti Uyghur musulmanlirining pasportini omumyüzlük yighiwélishqa bashlidi

2007-06-19
Élxet
Pikir
Share
Print

Chet'ellerdiki Uyghur muhajirlarning yetküzgen uchurlirigha asasen muxbirimiz gülchéhrening igiligen melumatliridin ,xitay hökümitining 18 - iyun künidin bashlap pütün Uyghur éli miqyasida peqetla Uyghur musulmanlirining pasportini yighish herikitini bashlighanliqi pash boldi . Ashkarilinishiche bu Uyghur aptonom rayonluq hökümet hemde jama'et xewpsizlik orgini, xelq ishliri we diniy ishlar organlirining hemkarliqida, Uyghurlarning tarqaq hej qilishini tosushni asasliq meqset qilip, élip bériwatqan omumiy yüzlük herikiti iken.

Düshenbe küni ,amérika hemde yawrupa elliride yashawatqan bezi Uyghurlar radi'omizgha téléfon qilip Uyghur élidiki ata ‏- ana uruq ‏- tughqanlirining pasportlirining xitay da'iriliri teripidin mejburiy yighiwélin'ghanliqini , buning bilen Uyghurlarda türlük endishe hemde teshwish peyda qilghanliqini inkas qildi.

Biz seweb ‏- netijisi toluq bolmighan bu melumatlargha asasen tepsiliy xewer élish meqsitide Uyghur élidiki munasiwetlik da'irilerdin ehwal sürüshte qilduq.

Shexsi pasportlar buningdin kéyin hökümet orunlirining igidarchiliqida bolidu

Deslep ürümchi sheherlik jama'et xewpsizlik idarisining pasport béjirish hemde bashqurush ishlirigha mes'ul ishxanigha téléfon qilduq. Téléfonni alghan xitay xadim pasport yighiwélish ishliri heqqide héchqandaq uchur bermey, "bizning bu ish bilen alaqimiz yoq "depla téléfonni qoyuwetti. Ürümchi shehiri tengritagh rayonluq jama'et xewpsizlik idarisigha téléfon ulandi.

Peqet Uyghurlarning, musulmanlarning pasporti yighiwélinmaqta

Bu Uyghur saqchining bergen jawabliridin ,ürümchide pasport yighishqa mehelle komitétlirining mes'ul bolghanliqini bilgendin kéyin , Uyghurlar ahalining % 90 tin köprekini igileydighan qeshqer sheherlik melum mehelle komitétining xelq ishlirini bashqurush ishxanisigha qaratqan téléfon ziyaritimizdin , Uyghur musulmanlirining pasportini yighish herikitining pütün Uyghur éli miqyasida Uyghur musulmanlarni nishan qilip omumyüzlük élip bérilishqa bashlighanliqi melum boldi.

Biz Uyghur élida yuqiri derijilik hökümet hemde jama'et xewpsizlik orunlirining oqturushi bilen élip bériliwatqan, Uyghur musulmanlirining pasportini yighiwélish herikiti heqqide xitay da'irilirining munasiwetlik höjjet yaki axbaratlirini izdeshke tirishtuq , netijide gerche bu toghriliq mexsus uqturush yaki höjjet ashkara élan qilinmighan bolsimu , emma xitay hökümitining Uyghur élidiki asasliq teshwiqat wastiliridin munasiwetlik melumatlar ashkarilandi.

Wangléchu'endin yéngi tedbir qollinip tarqaq hej qilishni tosush buyruqi

Xitay hökümitining bashqurushidiki tengritagh torida 19 - iyun élan qilin'ghan " hej qilishni bashqurushni kücheytip, ammining menpe'etini qoghdash kérek" namliq xewerde , xitay kompartiyisining Uyghur élige qoyghan sékritari wang léchu'enning 18 - iyun chüshtin burun xitay diniy ishlar bashqurush guruppisining yighinida qilghan sözi neqil keltürülgen bolup , wangléchu'en: -- hej qilishni bashqurushni kücheytip, hej qilishni qanunsiz teshkilligüchilerge qattiq zerbe bérip küchlük tedbir qollinip tarqaq hej qilish herikitini cheklep , yéngi tedbirlerni tetqiq qilip tüzüp qollinip bu mesilini heqiqiy hel qilish kérek" dep qattiq tekitligen.

Uyghur élide bashlan'ghan pasport yighish herikiti del wang léchu'en mushu sözlerni qilghan waqit bilen teng bashlandi. Xitay da'irilirining Uyghurlarning pasportini bérishni müshkülleshtürüshtin bashqa nöwette, pasportlarni qara- qoyuq mejburiy halda yighiwélishi, Uyghur élidiki musulman ammini narazi qilipla qalmay , ularning chet'ellerde hijran azabi tartiwatqan perzent hem uruq ‏- tughqanlinimu endishige salmaqta.

Gerche xitay da'iriliri bu pasport yighishning asasen tarqaq hej qilishni tosushni meqset qilghan tedbir ikenlikini ipadiligen bolsimu, emma Uyghurlar buningda bashqa seweblerningmu barliqidin gumanlanmaqta.

Biz xitay da'irilirining Uyghur élide omumyüzlük élip bériwatqan Uyghur musulmanlirining pasportini yighish herikiti heqqide, kéyinki programmimizda dawamliq melumat bérimiz. (Gülchéhre)

Pikirler (0)
Share
Toluq bet