Eqliy mülk hoquqigha tajawuz qilish, xitay - amérika soda munasiwitidiki " zor ixtilap"


2005-02-16
Share

Eqliy mülk hoquqigha tajawuz qilish amérika - xitay soda munasiwitidiki washin'gtonning béshini aghritiwatqan zor ixtilaplarning biri. Amérika hökümitining soda wekili robért zolék, seyshenbe küni amérika kéngesh palatasidiki sözide amérika - xitay soda munasiwiti heqqide toxtilip, eqliy mülk hoquqigha tajawuz qilish ikki dölet soda munasiwitidiki izchil awarichiliq yaritiwatqan mesile, dep körsetti. Robért zolék, xitayning eqliy mülk hoquqigha tajawuz qilghanlarni jazalash shundaqla aldini élish yolida bashlan'ghuch xaraktérlik bezi chare - tedbirler alghanliqini mu'eyyenleshtürgen. Amma u, bu mesilining yenila xitay - amérika soda munasiwitidiki " zor ixtilap" bolup kéliwatqanliqini tekitlidi.

Amérika, dunya soda teshkilati arqiliq béyjing da'irilirige bésim ishlitishni oylashqan

Xitayning dölimitimizdiki keshpiyatchilar, yéngiliq yaratquchilar shundaqla ijadiyetchilerning eqliy mülk hoquqini dawamliq oghurlishigha bolmaydu,

Zolék, amérika tashqi ishlar ministirliqining orunbasar ministir namzati, u seyshenbe küni kéngesh palatasi tashqi munasiwetler komitétida guwahliq berdi. Zolékning bildürüshiche, ular dunya soda teshkilati arqiliq béyjing da'irilirige bésim ishlitip, xitayning eqliy mülk hoquqigha tajawuz qilish mesilisini bir terep qilishni muzakire qilghan. Zolék mundaq deydu: " bu yerde dunya soda teshkilatining patént hoquqini qoghdash yolida " ünümlük tedbir élish" toghrisidiki belgilimisi bar. Biraq bu hazirgha qeder yolgha qoyulmidi. Méning his qilishimche shu nuqta éniq bolsunki, eger biz bu yolni sinap körmekchi bolsaq, bizning küchlük pakitimiz bolushi kérek, dep qaraymen."

Amérika, patént hoquqigha yatidighan mesililer heqqide uchur yighmaqta

Zolékning bildürüshiche, amérika soda wekilining ishxanisi üch ayning aldida dölet mejlisidiki zatlargha xet we uxturush yollap, amérika shirketliridin xitayning eqliy mülk hoquqigha tajawuz qilghanliqi toghrisida pakit yighishni telep qilghan. Robért zolék, hazirgha qeder neshr hoquqi sahesidikiler teminligen emeliy uchurlargha igiliqini, biraq bashqa sahedikiler teminligen uchurlarning yéterlik emeslikini körsetti. Zolékning ashkarilishiche, amérika soda wekilining ishxanisi, hemmibap aptomobil shirkiti (General Motor) shundaqla dorigerlik sana'itidiki patént hoquqigha yatidighan bezi konkért dilolarni sürüshtürüshke bashlighan.

Jorji allén: xitayning patént hoquqini oghrilishigha yol qoyulmaydu

Yighinda kéngesh palata ezasi jorji allén, xitayning eqliy mülk hoquqigha dawamliq we keng kölemde tajawuz qiliwatqanliqini bildürdi. Jorji allén, " patént hoquqini oghrilash kompyutér yumshaq détalidin tartip kino filimi, muzika shundaqla barliq nersilerni öz ichige alghan. Xitayning dölimitimizdiki keshpiyatchilar, yéngiliq yaratquchilar shundaqla ijadiyetchilerning eqliy mülk hoquqini dawamliq oghurlishigha bolmaydu," dep körsetti.

Amérika xitayni dunya iqtisadi we bixeterlik méxanizmining ichide tutushqa tirishidu

Robért zolék, mu'awin tashqi ishlar ministirliqini üstige alghandin kéyin, xitayni dawamliq dunya iqtisadi we bixeterlik méxanizmining ichide tutushqa tirishidighanliqini bildürdi. U mundaq dédi:

" Ularni bizning yardimimiz bilen qurulghan iqtisadi we bixeterlik méxanizmigha qatnashturush bizning menpe'etimizge uyghun kélidu. Xitayni dunya soda teshkilatigha élish bu térishchanliqimizning bir qisimi. Bixeterlik jehette shimali koriye mesilisini bir terep qilish yolida qurulghan 6 terep söhbiti kelgüsidiki intayin muhim méxanizm bolup qélishi mumkin."

Amérika xitayning dunyadiki eng chong soda shériki. Amérikining xitay - amérika sodisidiki qizil reqimi 2004 - yili 162 milyard dollar bolup, aldinqi yilgha sélishturghanda 30 ٪ ashqan. Xitay - amérika sodisidiki qizil reqem dölet mejlisidiki démokratlarning tenqidige uchrimaqta. Robért zolék, xitay - amérika sodisidiki mesililerni bir terep qilish, wezipige olturghandin kéyin qilidighan tunji muhim xizmiti bolidighanliqini bildürdi.

Zolék: "döletni parchilashqa qarshi turush qanuni" weziyetke paydisiz

Zolék, teywen mesilisi heqqide toxtilip, amérikining bu mesilidiki izchil siyasitini aqlidi. U, " döletni parchilashqa qarshi turush qanuni" heqqide toxtilip mundaq deydu: " xitay hökümitining " döletni parchilash qanuni" chiqirish herikiti, teywen boghuzi ikki qirghiqi arisidiki ixtilaplarni tinch yol bilen hel qilish üchün paydisiz."

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet