Amérikidiki islam dini ölimaliri térrorchiliqqa qarshi petiwa chiqardi


2005-07-29
Share

Islam dini ölimaliri mezkur petiwa toghrisida washin'gtonda mexsus muxbirlarni kütüwélish yighini oyushturup, petiwa mezmunlirini tonushturdi hemde muxbirlarning so'allirigha jawab berdi. Ölimalar yighinda islamning térrorchiliq, diniy radikal we zorawanliqni eyibleydighanliqini bildürdi.

Mmil: xelqni nishanlighanliki her qandaq térrorluq heriket- haramdur.

Bu kéngeshning nami shimaliy amérika fiqhi kéngishi bolup, bu orun islam sheri'etlirini tonushturidighan ölimalar jem'iyitidur. Mezkur kéngesh mes'uli muzammil sidiqi (Muzammil Siddiqi) petiwa mezmunlirini oqup, "xelqning hayati we mal-mülkini nishanlighan özini olturuwélish xaraktérlik partlash we bashqa her xil shekildiki hujumlar, islamda cheklinidu. Shundaqla buni sadir qilghuchilar bolsa jinayetchi hésablinidu. Ular hergizmu shéhit bolmaydu. Xelqni nishanlighanliki her qandaq térrorluq heriket- haramdur. Bu islamda cheklinidu. Shundaqla yene, zorawanliq we térrorluq heriketlirini élip baridighan her qandaq shexs we teshkilatqa hemkarlishish we yardemlishishmu haramdur we islamda cheklen'gendur", dédi.

Mezkur petiwada yene, hökümetning qanun-belgilimilirige masliship xelqning hayatini qoghdashning, musulmanlarning diniy mejburiyiti ikenliki tekitlen'gen. Islam ölimalirining chiqarghan bu doklati, en'gliye musulmanlar kéngishining londondiki 7 - iyul térrorluq hujumidin kéyin chiqarghan belgilimisi bilenmu asasiy jehettin oxshash bolghan.

D: qur'anni yaki peyghembirimizni neqil qilip, xelqqe ziyankeshlik qilishqa qet'iy bolmaydu.

Amérikidiki musulman guruppiliri térrorluq heriketlirini köp qétim eyiblep kelgen bolsimu, lékin amérika islamiy munasiwetler kéngishining bashliqi nihad awad petiwa chiqirishning, islam jem'iyiti teripidin chiqirilidighan bir küchlük bayanat ikenlikini eskertti. U mundaq dédi:

"Méning bundaq déyishimidiki seweb, islam namida térrorluq qiliwatqanlar islam sheri'etlirini xata chüshendürüshke hemde uningdiki bezi belgilimilerni xata ishlitishke uruniwatidu. Elwette, ularning bundaq qilishta özlirining gheziwidin bashqa héchqandaq yol yoruqi yaki ruxsiti yoq. Mana mushundaq bir qisim musulmanlar özlirini birdin-bir islam sheri'etlirini qandaq chüshendürüshni belgileydighan kishiler dewatidu. Shunga méningche, her qandaq kishining gunahsiz xelqqe ziyankeshlik qilish yaki ularni öltürüsh qilmishlirini heqliqleshtürüsh üchün qur'anni yaki peyghembirimizni neqil keltürüshige qet'iy bolmaydu".

Amérikidiki islam dini ölimaliri yene, bu petiwani jüme küni amérikining her qaysi jayliridiki meschidliride oqushqa chaqirdi. Amérikidiki musulmanlar ammiwiy ishlar kéngishining mes'uli salam el-marayati, bu petiwada körsitilgen mezmunlarning pütün dunyagha tesir körsitishini ümid qilidighanliqini bildürdi. U mundaq dédi:

"Biz buning pütün dunyaning her qaysi jaylirighiche tesir körsitishini ümid qilimiz. Lékin bu yerde hemmidin muhim bolghini, biz bularni balilirimiz we bizning kelgüsimiz üchün qiliwatimiz. Bizning balilirimiz bu mesililerni ochuq bilishi kérek, bu yerde hergizmu qaymuqush yaki ayding bolmighan uqum bolmasliqi kérek. Biz musulman amérikiliqlar teshkilatliri we hemmimiz birlikte, bizning kelgüsi ewladlirimizgha we balilirimizgha özini öltüriwélish xaraktérlik partlitish we térrorchiliqning, islam qet'iy yol qoymaydighan ehwal ikenlikini jakarlaymiz".

M kéngishi: islam nami bilen zorawanliq qilghuchilar, özlirining étiqadigha xa'inliq chilardur

Buningdin sirt yene, amérika islamiy munasiwetler kéngishi téléwizor we radi'olarda én'gliz, ereb we ordu tillirida ammiwiy bayanat jakarlap, islamning térrorchiliqni chekleydighanliqini hemde islam nami bilen zorawanliq qilishning özlirining étiqadigha xa'inliq qilghanliq bolup hésablinidighanliqini élan qildi.

Bu arida 30 nechche yildin buyan en'gliye bilen qarshiliship kelgen irlandiye jumhuriyet armiyisi qoralliq qarshiliq körsitishni toxtitidighanliqini jakarlidi. En'gliye bash minisitiri toni bléyr bilen amérika prézidénti jorj w bush bu qararni tebriklep, irlandiye jumhuriyet armiyisining axiri zorawanliqning ornigha tinchliq yolini tallighanliqini hemde buning irlandiyining yéqinqi tarixida zor ehmiyetke ige bir weqe ikenlikini bildürdi. Irlandiye jumhuriyet armiyisi siyasiy gorohining rehbiri adams bu qararning baturluq bilen chiqirilghanliqini hemde buning tinchliq weziyitini eslige keltürüshke paydiliq bolidighanliqini éytip, "bu adilliq bilen uzun mezgillik tinchliqni qolgha keltürüshning halqiliq peyti" dep bildürdi. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet