Пиронниң җәсити тоғрилиқ қарашлар


2007-07-12
Share

Пиронниң җәсити тоғрилиқ тәтқиқат қәдимдин та һазирғичә шәрқ вә ғәрб тәтқиқатчилириниң пикирлирини аварә қилип кәлгән чоң тема. Тәтқиқатчилар билән дин адәмлири оттурисида пиронниң җәсити һәққидики талаш - тартишлар һазирму мәвҗут.

Пирон зади ким?

Пирон мундин тәхминән үч миң йиллар илгири мисирда өткән падишаһ болуп, өзини дуняниң илаһи дәп елан қилған иди. Пирон бир күни қорқунчлуқ бир чүш көрүп чөчүп ойғинип кетиду вә пүтүн чүш тәбирчилирини чақиртип келип, көргән чүшигә тәбир беришни тәләп қилиду. Тәбирчиләр униңға, мисирдики исраил әвлади ичидин бир оғул тоғулидиғанлиқи вә у оғулниң пиронниң падишаһлиқини өрүп ташлайдиғанлиқини хәвәр беришиду. Шуниң билән пирон пәрман чүшүрүп, исраил әвладидин тоғулған оғул балиларниң бириниму тирик қоймай һәммисини өлтүрүшни буйруйду.

Пиронниң адәмлири өйму- өй ахтуруп йүрүп туғулғанла оғул бувақни өлтүрүп туриду. Бу арида муса әләйһиссалам туғулиду. Униң аниси бувиқини өлүмдин сақлап қелиш үчүн көп баш қатуриду. Ахирида аллаһ униңға балисини бир севәткә селип дәряға қоюп беришини илһам қилиду -дә, у аллаһқа болған ишәнчисиниң камиллиқидин һеч иккиләнмәстин оғли муса әләйһиссаламни дәряға қоюп бериду. Севәт пиронниң сарийиға еқип киргинидә, пиронниң хизмәткарлириниң қолиға чүшиду. Пиронниң аяли бу бувақни бала қилип беқивелиш мәқсити билән уни өлүмдин тиливалиду.

Шундин башлап муса әләйһиссалам пиронниң сарийида өсүп йетилиду. Кейинчә униңға пәйғәмбәрлик вәзиписи тапшурулғандин кейин аллаһ таала уни пиронни аллаһқа иман кәлтүрүшкә дәвәт қилишни буйруйду. Әмма пирон муса әләйһиссаламниң дәвитини қобул қилмайду вә йәр йүзиниң худаси пәқәт өзи икәнликини дәва қилишқа давам қилиду. Шундақ қилип муса әләйһиссалам билән пирон оттурисидики зиддийәт әвҗигә чиқиду.

Пиронниң ғәрқ болуши

Муса әләйһиссалам мисирдики исраил әвладлирини башлап пәләстингә қарап йолға чиққинида, пирон вә униң ләшкәрлири уларни қоғлап келип йетишивелишқа азла қалиду.

Муса әләйһиссаламниң адәмлири алдида деңиз , арқисида пирон қошунлири оттурисида қалиду. Шу вақитта муса әләйһиссалам аллаһниң"һасаң билән деңизға урғин"дегән әмригә асасән һасисини деңизға урғинида деңиз сүйи иккигә бөлүнүп оттурисидин қуруқлуқ йол ечилиду. Муса әләйһиссалам адәмлири билән бу йолдин өтүп қирғаққа чиқип болғинида, пирон вә униң ләшкәрлири техи деңиз ичидә уларни қоғлаватқанда деңиз сүйи қайтидин әслигә келип уларни ғәрқ қилиду.

Бу вәқәликни аллаһ таала қуран кәримдә мундақ һекайә қилған: "биз исраил әвладлирини деңиздин өткүздуқ. Уларни пирон вә униң қошуни зулум вә зораванлиқ билән қоғлиди. Пирон ғәрқ болидиған вақтида "иман ейттимки, исраил әвладлири иман ейтқан илаһтин башқа һәқ илаһ йоқтур. Мән мусулманлардинмән" деди.(Униңға ейтилдики,) "(һаяттин үмид үзгиниңдә) әмди ( иман ейтамсән?) илгири аллаһқа асийлиқ қилған вә бузғунчилардин болғанидиң. Сәндин кейинкиләргә ибрәт болушуң үчүн, бүгүн сениң җәсидиңни қутқузимиз(йәни җәсидиңни деңиздин чиқирип қойимиз )". Аллаһ өз вәдисигә асасән пиронниң җәсидини сақлап қойиду.

Пиронниң җәсидиниң тепилиши

Әсирләр өткәндин кейин, ингилизлар тәрипидин "җәбәләйн" дегән җайда бир чуңқурниң ичидин бир җәсәт тепилип, әнгилийигә елип кетилгән.

Бу җәсәтниң өмрини билиш үчүн, җәсәтләрниң өмүрлирини билиштә қоллинилидиған һәртүрлүк методларниң һәммиси қоллинилғанниң сиртида, карбон он төт методиму ишқа селинған. Әҗәблинәрликки, бу җәсәт үч миң йиллиқ болуп чиққан болсиму, униң терисила чиригән, әмма органлири бузулмиған.

Униң үстигә, бу җәсәт мумия қилинмиған икән. Чүнки мумия қилинған җәсәтләрниң ички органлири елип ташлиниду. Буниң ички органлири җайида еди. Һазир бу җәсәт әнгилийә пайтәхти лондондики тәбиәт музийида көргәзмигә қоюлмақта икән.

Пиронниң җәсити тоғрилиқ ахирқи тәтқиқат

Мәккә мукәррәмә шәһиридә турушлуқ яш алим абдулһәким һаҗим пиронниң җәсити тоғрилиқ елип берилған тәтқиқат нәтиҗиси үстидә тохтилип мундақ деди: франсийилик мәшһур медитсина алими доктор мурис букай "қуран вә илим - пән"намлиқ әсиридә пиронниң җәсити үстидә елип берилған тәтқиқат нәтиҗисиниң қуран кәримдә баян қилинған буйичә чиққанлиқини баян қилип мундақ дәп язиду:" тәвратниң муса әләйһиссаламниң мисирдин чиқип кәткәнлики тоғрилиқ ривайәтлири һазир шу пети сақлинип келиватқан пирон җәсидиниң муса әләйһиссаламниң заманида өткән мисир пирони иккинчи рәмсисниң өзи икәнликини көрситиду. Йәнә пиронниң җәсити үстидә елип берилған тиббий тәтқиқатлар нәтиҗисиму пиронниң суда ғәрқ болуп өлгәнликини испатлап турупту. Бирақ тәвраттики ривайәтләр пиронни су ютуп кәткәнликини сөзләштин башқа тәпсилий мәлумат бәрмигән болса, қуран кәрим су ютуп кәткән пирон җәсидиниң кейинчә қутқузулуп судин чиқиридиғанлиқи вә кейинкиләргә ибрәт болуши үчүн сақлинидиғанлиқини баян қилған. Һазирқи заман мәшһур ислам алими шәйх абдулмәҗид зәндани доктор мурис букай билән елип барған сөһбитидә, букайниң униңға тиббий мутәхәссисләрниң пиронниң җәсити үстидә елип барған тәтқиқат нәтиҗилирини ейтип бәргән болуп, мундақ дегән икән:" тиббий мутәхәссисләр пиронниң җәсидини тәкшүрүп чиққандин кейин, униңда суда ғәрқ болуп өлгәнликниң тәсирини, деңиз сүйидә узун муддәт турғанлиқтин тузниң тәсирини вә сөңәклириниң парчилинип кәтмәстин пәқәт су бесиминиң зәрбиси билән сунғанлиқини байқап чиқти".

Абдулһәким һаҗимниң ейтишичә, доктор букай қуран кәримниң мөҗизиси үстидә тохтилип мундақ дегән:" қуран кәрим муһәммәд әләйһиссаламниң васитиси билән инсанларға йетип кәлгән әсирдә , бурун мисирда өткән пиронларниң һәммисиниң җәсәтлири мисирниң оқсур шәһиридә нил дәряси бойидики "падишаһлар қәбристанлиқи"да көмүлгән һалда мәвҗут иди.

Муһәммәд әләйһиссаламниң заманида бу җәсәтләрниң барлиқи кишиләргә намәлум болуп, бу җәсәтләр пәқәт он тоққузинчи әсирниң ахирлиридила кәшп қилинишқа башлиған. Шуниң билән бир вақитта муса әләйһиссаламниң заманида өткән пиронниң җәсити оттуриға чиққан икән. Аллаһ таала пиронниң җәсидини худди қуран кәримдә баян қилғинидәк, кишиләргә ибрәт болсун үчүн пүтүнләй бузулуп кетиштин сақлап қалған икән. (Өмәрҗан тохти)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт