Pir'onning jesiti toghriliq qarashlar


2007-07-12
Share

Pir'onning jesiti toghriliq tetqiqat qedimdin ta hazirghiche sherq we gherb tetqiqatchilirining pikirlirini aware qilip kelgen chong téma. Tetqiqatchilar bilen din ademliri otturisida pir'onning jesiti heqqidiki talash - tartishlar hazirmu mewjut.

Pir'on zadi kim?

Pir'on mundin texminen üch ming yillar ilgiri misirda ötken padishah bolup, özini dunyaning ilahi dep élan qilghan idi. Pir'on bir küni qorqunchluq bir chüsh körüp chöchüp oyghinip kétidu we pütün chüsh tebirchilirini chaqirtip kélip, körgen chüshige tebir bérishni telep qilidu. Tebirchiler uninggha, misirdiki isra'il ewladi ichidin bir oghul toghulidighanliqi we u oghulning pir'onning padishahliqini örüp tashlaydighanliqini xewer bérishidu. Shuning bilen pir'on perman chüshürüp, isra'il ewladidin toghulghan oghul balilarning birinimu tirik qoymay hemmisini öltürüshni buyruydu.

Pir'onning ademliri öymu- öy axturup yürüp tughulghanla oghul buwaqni öltürüp turidu. Bu arida musa eleyhissalam tughulidu. Uning anisi buwiqini ölümdin saqlap qélish üchün köp bash qaturidu. Axirida allah uninggha balisini bir séwetke sélip deryagha qoyup bérishini ilham qilidu -de, u allahqa bolghan ishenchisining kamilliqidin héch ikkilenmestin oghli musa eleyhissalamni deryagha qoyup béridu. Séwet pir'onning sariyigha éqip kirginide, pir'onning xizmetkarlirining qoligha chüshidu. Pir'onning ayali bu buwaqni bala qilip béqiwélish meqsiti bilen uni ölümdin tiliwalidu.

Shundin bashlap musa eleyhissalam pir'onning sariyida ösüp yétilidu. Kéyinche uninggha peyghemberlik wezipisi tapshurulghandin kéyin allah ta'ala uni pir'onni allahqa iman keltürüshke dewet qilishni buyruydu. Emma pir'on musa eleyhissalamning dewitini qobul qilmaydu we yer yüzining xudasi peqet özi ikenlikini dewa qilishqa dawam qilidu. Shundaq qilip musa eleyhissalam bilen pir'on otturisidiki ziddiyet ewjige chiqidu.

Pir'onning gherq bolushi

Musa eleyhissalam misirdiki isra'il ewladlirini bashlap pelestin'ge qarap yolgha chiqqinida, pir'on we uning leshkerliri ularni qoghlap kélip yétishiwélishqa azla qalidu.

Musa eleyhissalamning ademliri aldida déngiz , arqisida pir'on qoshunliri otturisida qalidu. Shu waqitta musa eleyhissalam allahning"hasang bilen déngizgha urghin"dégen emrige asasen hasisini déngizgha urghinida déngiz süyi ikkige bölünüp otturisidin quruqluq yol échilidu. Musa eleyhissalam ademliri bilen bu yoldin ötüp qirghaqqa chiqip bolghinida, pir'on we uning leshkerliri téxi déngiz ichide ularni qoghlawatqanda déngiz süyi qaytidin eslige kélip ularni gherq qilidu.

Bu weqelikni allah ta'ala qur'an kerimde mundaq hékaye qilghan: "biz isra'il ewladlirini déngizdin ötküzduq. Ularni pir'on we uning qoshuni zulum we zorawanliq bilen qoghlidi. Pir'on gherq bolidighan waqtida "iman éyttimki, isra'il ewladliri iman éytqan ilahtin bashqa heq ilah yoqtur. Men musulmanlardinmen" dédi.(Uninggha éytildiki,) "(hayattin ümid üzginingde) emdi ( iman éytamsen?) ilgiri allahqa asiyliq qilghan we buzghunchilardin bolghaniding. Sendin kéyinkilerge ibret bolushung üchün, bügün séning jesidingni qutquzimiz(yeni jesidingni déngizdin chiqirip qoyimiz )". Allah öz wedisige asasen pir'onning jesidini saqlap qoyidu.

Pir'onning jesidining tépilishi

Esirler ötkendin kéyin, in'gilizlar teripidin "jebeleyn" dégen jayda bir chungqurning ichidin bir jeset tépilip, en'giliyige élip kétilgen.

Bu jesetning ömrini bilish üchün, jesetlerning ömürlirini bilishte qollinilidighan hertürlük métodlarning hemmisi qollinilghanning sirtida, karbon on töt métodimu ishqa sélin'ghan. Ejeblinerlikki, bu jeset üch ming yilliq bolup chiqqan bolsimu, uning térisila chirigen, emma organliri buzulmighan.

Uning üstige, bu jeset mumiya qilinmighan iken. Chünki mumiya qilin'ghan jesetlerning ichki organliri élip tashlinidu. Buning ichki organliri jayida édi. Hazir bu jeset en'giliye paytexti londondiki tebi'et muziyida körgezmige qoyulmaqta iken.

Pir'onning jesiti toghriliq axirqi tetqiqat

Mekke mukerreme shehiride turushluq yash alim abdulhekim hajim pir'onning jesiti toghriliq élip bérilghan tetqiqat netijisi üstide toxtilip mundaq dédi: fransiyilik meshhur méditsina alimi doktor muris bukay "qur'an we ilim - pen"namliq esiride pir'onning jesiti üstide élip bérilghan tetqiqat netijisining qur'an kerimde bayan qilin'ghan buyiche chiqqanliqini bayan qilip mundaq dep yazidu:" tewratning musa eleyhissalamning misirdin chiqip ketkenliki toghriliq riwayetliri hazir shu péti saqlinip kéliwatqan pir'on jesidining musa eleyhissalamning zamanida ötken misir pir'oni ikkinchi remsisning özi ikenlikini körsitidu. Yene pir'onning jesiti üstide élip bérilghan tibbiy tetqiqatlar netijisimu pir'onning suda gherq bolup ölgenlikini ispatlap turuptu. Biraq tewrattiki riwayetler pir'onni su yutup ketkenlikini sözleshtin bashqa tepsiliy melumat bermigen bolsa, qur'an kerim su yutup ketken pir'on jesidining kéyinche qutquzulup sudin chiqiridighanliqi we kéyinkilerge ibret bolushi üchün saqlinidighanliqini bayan qilghan. Hazirqi zaman meshhur islam alimi sheyx abdulmejid zendani doktor muris bukay bilen élip barghan söhbitide, bukayning uninggha tibbiy mutexessislerning pir'onning jesiti üstide élip barghan tetqiqat netijilirini éytip bergen bolup, mundaq dégen iken:" tibbiy mutexessisler pir'onning jesidini tekshürüp chiqqandin kéyin, uningda suda gherq bolup ölgenlikning tesirini, déngiz süyide uzun muddet turghanliqtin tuzning tesirini we söngeklirining parchilinip ketmestin peqet su bésimining zerbisi bilen sun'ghanliqini bayqap chiqti".

Abdulhekim hajimning éytishiche, doktor bukay qur'an kerimning möjizisi üstide toxtilip mundaq dégen:" qur'an kerim muhemmed eleyhissalamning wasitisi bilen insanlargha yétip kelgen esirde , burun misirda ötken pir'onlarning hemmisining jesetliri misirning oqsur shehiride nil deryasi boyidiki "padishahlar qebristanliqi"da kömülgen halda mewjut idi.

Muhemmed eleyhissalamning zamanida bu jesetlerning barliqi kishilerge namelum bolup, bu jesetler peqet on toqquzinchi esirning axirliridila keshp qilinishqa bashlighan. Shuning bilen bir waqitta musa eleyhissalamning zamanida ötken pir'onning jesiti otturigha chiqqan iken. Allah ta'ala pir'onning jesidini xuddi qur'an kerimde bayan qilghinidek, kishilerge ibret bolsun üchün pütünley buzulup kétishtin saqlap qalghan iken. (Ömerjan toxti)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet