Qadir baqining kündilik xatirisi


2006.01.30
Share on WhatsApp
Share on WhatsApp

Bir nechche kündin buyan armiyini himaye qilish ülgisi qadir baqi isimlik 72 yashliq bir bowayning süretliri Uyghur élining xewer tor betlirini qaplidi. Igilishimizche " armiyini himaye qilish nemunisi qadir baqidin öginish " toghrisidiki teshwiqatlar yene téléwiziye istansiliridimu bérilmekte iken.

Xu jintawning rexmiti

Tengritagh tor bétide meydisige yoghan qizil gül taqalghan qadir baqining xu jintaw bilen qol éliship körüshüp turghan süriti bilen bérilgen xewer mezmunigha qarighanda, bu 72 yashliq qadir baqi kucha nahiyisi aghi yézisi lengger kentide olturushluq déhqan bolup u, 39 yildin buyan, shu jayda turushluq xitay armiyisining ish izlirini medhiyilep kündilik xatire qaldurghan imish.

Xewerde éytilishiche, xu jintaw uning bilen körüshkende " 39yildin buyan 1000 parchidin artuq xatire yézip azadliq armiyining xelqni söyüsh himaye qilishning ish izlirini heqiqiy xatirilepsiz, bu xelq ammisining partiyini, wetenni, xelq azadliq armiyisini qizghin söyidighan semimiy muhebbitini toluq namayen qilip, armiye bilen xelqning ittipaqliqi, milletler ittipaqliqini kücheytishte aktip töhpe qoshti, sizdin öginimiz" dep rehmet éytqan.

Partiye qilghan yaxshiliq köp, déhqanlar yenila namrat

U béyjingdin qaytip kelgende yene wang léchu'enningmu kütüwélishigha érishken. Hayajanlan'ghan qadir baqi " partiyige rehmet, méning qilghanlirim az, partiyining bizge qilghan yaxshiliqlirini ewladlirimmu qayturup bolalmaydu, men ewladlirimgha armiye heqqide kündilik xatire yézishni dawamlashturushni tewsiye qildim, biz menggü partiyige egiship mangimiz, armiyini söyimiz" dep wede bergen. Qadir baqi yene dölet rehberliri hemde Uyghur aptonum rayon rehberliri bilen körüshkende, partiyining yaxshi siyasiti bilen yézimizdiki déhqan ammining turmushi yaxshilandi, bay, bayashat yashawatimiz dep ulargha rehmet éytqan. Emma qadir baqi turushluq kuchar nahiyisi aghi yézisidin igilishimizge qarighanda, lengger kenti taghliq chet yaqidiki bir kent bolup asasiy nopusi Uyghurlar iken, bu jayda déhqanlar asasen kirim qilalmaydiken. Bu yézining etrapida bir herbiy meshiq bazisi bar iken. Bu yéza hemde qadir baqi heqqide yenimu tepsili melumat élishqa tirishqan bolsaqmu emma bu kentke hetta télifonmu ornitilmighan bolghachqa, aghi yézisidin bu kent heqqide uchur élishqa urunduq. Téléfonimizni alghan kishiler qadir baqi heqqide téléwizorlarda körgenlirini, biraq bu heqte köp bilmaydighanlqi'ini éytishti.

Igiliginimizdek hazir qadir baqi isimlik 72 yashliq bu déhqan nöwette armiyini söyüsh ülgisi, milletler ittipaqi nemunichisi dégen nam bilen pütün Uyghur élide teshwiq qiliniwatqan, hemme bilidighan qurban tulumgha oxshash bir shexske aylan'ghan.

Peqetla teshwiqat

Yéngidin chiqqan bu ghelite öginish ülgisi chet'ellerdiki ziyaliylargha nisbeten yéngi tuyulmidi. Ular bu "xitay kompartiyisining ülge tiklesh en'enisi boyiche tiklep chiqirilghan bichare déhqan, peqet maw zédonggha qoghun aparghan qurban tulum, xu jintawgha xet yazghan memet sawurlargha oxshash siyasiy teshwiqat qorali qiliniwatqan kishilerdur", dep xitay kompartiyisining néme sewebtin armiyini söyüsh teshwiqatini kücheytkenliki heqqide mulahiziler yürgüzmekte.

Bu heqte chet'elde yashawatqan Uyghur ziyaliyliridin ilshat ependi köz qarashlirini ipadilep, xitay kompartiyisining her yili qadir baqigha oxshash kishilernining obrazini yaritip, yerlik xelqning xitay armiyisini qollaydighanliqining ispati qatarida körsitidighanliqini, emeliyette yerlik xelq bilen Uyghur élidiki xitay xelqi we armiyisining otturisidiki munasiwetning bir birini himaye qilish munasiwiti emeslikini bildürdi. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.