Kiliyang yézisidiki namrat déhqanlar qar apitide qaldi

• Muxbirimiz gülchéhrening bu heqtiki tepsili xewiri
• Download story audio

17 - Féwraldin bashlap 21 - féwralghiche Uyghur élidiki qeshqer hem xotenni asas qilip toxtimay yaqqan qar, bu jaylarda qar apitini keltürüp chiqarghan. Nöwette melum bolghan istatistikiliq melumatqa qarighanda, jem'iy 19000 ming nopus bu qar apitige uchrighan.

Xotenning guma nahiyisi qatarliq bezi jaylarning taghliq rayonlirida yighilghan qarning qélinliqi 70 santimétirgha yetken. Uyghur éli axbaratliri bu qétimliq apette ölüm - yétim ehwali bolmighanliqini élan qilghan bolsimu, emma apette 14 mingdin artuq charwa -mal ölgen.

20 Nechche yildin buyanqi eng

Guma nahiyilik mété'orologiye idarisining bildürüshiche 1976 - yilidin buyan bu rayonlarda bundaq chong qar yéghip baqmighan. Nöwette qar qélin yaqqan charwichiliq meydanlirida yenila nurghun charwa mal yollar étilip qalghanliqi sewebidin qishlaqlarda qapsilip qalghan.

"Shinjang téléwiziye istansisi" ning seyshenbe bergen xewirige qarighanda, bu qétimliq qar apitige eng éghir uchrighan jay, xoten wilayiti guma nahiyisining kiliyang yézisi bolup, bu yézining her qaysi kentliride örülgen öyler 260 tin ashqan. Gumining kiliyang yézisigha qaratqan bir nechche qétimliq téléfon ziyaretlirimizdin, apet eng éghir bolghan kiliyangning her qaysi kentliride nechche minglighan namrat déhqanlar, issinish, yimeklik, kiyim kéchek, waqitliq turalghu hetta sugha oxshash asasliq turmush boyumlirigha éhtiyajliq bolup turmaqta iken.

Bezilerning issinishta qalashqa otunimu yoq

Kiliyangdiki bir déhqan bilen bu qétimliq qar apitining déhqanlargha qaysi tereplerdin qiyinchiliqlarni élip kelgenliki heqqide söhbetleshtuq. Söhbitimizni qobul qilghan bir kishi, qarning 45-santémétir etrapida yaghqanliqi, bir qisim öylerning örulüp chüshkenlikini, charwa – mallarning ölgenlikini, déhqanlarning qalashqa otuni yoqliqini, bezi déhqanlarning hetta yatidighan yotqan – körpisi yoqliqini bildürdi.

Téléfon ziyaritimizni qobul qilghan bir yash déhqan, qar qélin yaqqanliq sewebi bilen hashardin baldur yénip kelgenlikini, hazirgha qeder bu yézida déhqanlarning mejburi hashar emgikige qatnishidighanliqini, bu yézining hemmmidin namrat yéza sanilidighanliqini, hetta su hem tok mesilisiningmu hel bolmighanliqini éytip berdi.

Yardemge muhtaj

Biz kiliyangning apet ehwali hemde hökümet orunlirining qar apitide qalghanlargha qaratqan yardemliri heqqide uchur élish üchün, kiliyang yéziliq partkom sékritari yanggha téléfon qilduq emma u “ téléfonni kimge ursanglar urunglar” dep ziyaritimizni qopalliq bilen ret qildi.

Biz yene yéza bashliqi tursunjan bilen alaqilashtuq. U kishi apettiki kiliyangning ehwallirini chüshendürüp, qarning toxtighanliqigha ikki kün bolghanliqini, tok normal bolsimu, suning üzülüp qalghanliqini, turubilarning yérilip, su teminleshke amal bolmighanlqini, bir qisim namrat déhqanlargha yardem bérilgenlikini éytti.

Yéza bashliqi yene, nöwette apette qalghan kiliyang déhqanlirining qaysi jehetlerdin yardemge jiddi muhtaj ikenlikini, 5000 din artuq charqining taghliq rayonda qapsilip qalghanliqini, charwa – mallargha yem-xeshekning kemlikini bildürdi.

Kiliyangdiki ammidin igilishimizche, bu namrat yézida hetta nöwette dawam qiliwatqan soghaqta kiygüdek qélin kiyimimu yoq déhqanlar nahayiti köp iken. Bu qétiqi qar apitige uchrighan jaylardiki amma her xil qutquzush buyumlirigha jiddi éhtiyajliq bolghandin sirt, yene nechche on ming tuyaq mal - charwilarmu qutquzushqa muhtaj. (Gülchéhre)