Алтай районида қар апити давам қилмақта

• Мухбиримиз гүлчеһрәниң бу һәқтики мәлумати
• Download story audio

Әң йеңи мәлуматларға асасланғанда, давамлишиватқан қарлиқ һаварайи өзгириши түпәйли, уйғур елиниң шималини асас қилип йүз бәргән қар апити йәниму еғирлашмақта.

Йеңи йил һарписидин башлап яққан қаттиқ қар алтай тарбағатай, или районидики бәзи наһийә һәм чарвичилиқ мәйданлирида 60сантиға йетип, һава температуриси зор дәриҗидә төвәнләп еғир апәт кәлтүрүп чиқарған иди.

Нөвәттә бу кәң даиридики қар апитидә 620 миңдин артуқ амминиң апәткә учриғанлиқи хәвәр қилинмақта.

Адәмләр вә маллар зиянға учриған

Биз алтай вилайәтлик партком ишханисидин апәт әһвали һәмдә апәттин қутқузуш ишлири һәққидә мәлумат елишқа тириштуқ. Әмма телефонимизни бир нөвәтчи елип, башлиқлар һәммиси апәт болған җайларға кәткәнликини билдүрди һәмдә у алтайда қарниң тохтимай йеғиватқанлиқини, тағлиқ районларда апәтниң еғир икәнликини, һазирға қәдәр зади қанчилик зиян келип чиққанлиқини техи мөлчәрлигили болмайдиғанлиқини билдүрди.

Апәткә даир елан қилиниватқан ахбаратларда, һазирғичә қар апитидә өлүм йетим әһваллириниң келип чиққанлиқи һәққидә мәлумат болмисиму, әмма алтай вилайитиниң көктоқай, чиңгил наһийилири, алтай шәһири, қаба, бурчин наһийисидә һазирғичә 5672 адәмдә охшимиған дәриҗидә үшшүп қелиш һадисиси көрүлгән. Шундақла нәччә йүз миң туяқ чарва мал зиянға учриған. Бивастә келип чиққан иқтисадий зиян 80милйон юәнгә йәткән.

Биз қар апитиниң тәсиригә һәммидин еғир учриған алтайниң көктоқай наһийилик дохтурханисиға телефон қилип, үшшүп қалған чарвичиларниң давалашқа еришәлигән ‏- еришәлмигәнликини соридуқ.

Ташқи кесәлләр бөлүминиң бир дохтури, америкидин телефон уриватқанлиқимизни билгәндин кейин, соаллиримизға алдирап җаваб бәрди. У " үшшүп қелиш әһваллири бар, дохтурханимизда давалаватимиз, соғақ һавада униңдин башқиму кесәлләр келиватиду, һәммини һәқсиз давалаватимиз. Башқа чатақ йоқ, силәр көңүл бөлмисәңларму болиду" дәп телефонни қоювәтти.

Бәзи йоллар һазиркғичә ечилмиған

Бир қанчә күн илгири қатнаш үзүлүп қалған, алтай вилайитиниң дөләт таш йоли 216 ‏- линийиси, вә өлкә йоли 217 ‏- линийисидә қатнаш аста- аста әслигә келишкә башлиған болсиму, бәзи йол бөләклиридә тағдин көчкән қарлар давамлиқ һалда бәзи йолларни етип қоймақта икән.

Тәңритағ тор бетидә -12 январ берилгән учурға қариғанда, бир нәччә күндин буян или районидиму қаттиқ қар яққан болуп, 11 - январ күни илиниң тәлкә еғизи, алмалиқ җилғисида қар көчүш һадисиси йүз берип асаслиқ қатнаш линийилиридин 312 ‏- дөләт таш йоли тосулуп, йолучилар қапсилип қалған.

Һөкүмәт торбәтлиридә қар апитигә даир берилгән хәвәрләрдә, асасән һөкүмәтниң апәт райониға ярдәмни күчәйтиватқанлиқи мәзмун қилинған. Әмма биз апәт бир қәдәр еғир болған, алтайниң көктоқай наһийисигә телефон қилғинимизда бир қазақ чарвичи, бу җайда бәзи деһқан, чарвичиларниң өйлириниң өрүлүп чүшкәнликини һава бәк соғақ болғачқа амминиң җиддий ярдәмгә муһтаҗ болуватқанлиқини әмма һөкүмәтниң ярдиминиң техи кәлмигәнликини билдүрди.

Тәңри теғиниң шималида қар апити йүз бәргән җайларда әң төвән һава температуриси нөлдин төвән 43 селсийә градусқа чүшкән, алтай метрологийә идарисидин игилишимизчә, алтай, или қатарлиқ җайларда кейинки бир нәччә күндә қарлиқ һаварайи йәнә давамлишидикән. (Гүлчеһрә)