Altay rayonida qar apiti dawam qilmaqta


2006.01.12

Eng yéngi melumatlargha asaslan'ghanda, dawamlishiwatqan qarliq hawarayi özgirishi tüpeyli, Uyghur élining shimalini asas qilip yüz bergen qar apiti yenimu éghirlashmaqta.

Yéngi yil harpisidin bashlap yaqqan qattiq qar altay tarbaghatay, ili rayonidiki bezi nahiye hem charwichiliq meydanlirida 60santigha yétip, hawa témpératurisi zor derijide töwenlep éghir apet keltürüp chiqarghan idi.

Nöwette bu keng da'iridiki qar apitide 620 mingdin artuq ammining apetke uchrighanliqi xewer qilinmaqta.

Ademler we mallar ziyan'gha uchrighan

Biz altay wilayetlik partkom ishxanisidin apet ehwali hemde apettin qutquzush ishliri heqqide melumat élishqa tirishtuq. Emma téléfonimizni bir nöwetchi élip, bashliqlar hemmisi apet bolghan jaylargha ketkenlikini bildürdi hemde u altayda qarning toxtimay yéghiwatqanliqini, taghliq rayonlarda apetning éghir ikenlikini, hazirgha qeder zadi qanchilik ziyan kélip chiqqanliqini téxi mölcherligili bolmaydighanliqini bildürdi.

Apetke da'ir élan qiliniwatqan axbaratlarda, hazirghiche qar apitide ölüm yétim ehwallirining kélip chiqqanliqi heqqide melumat bolmisimu, emma altay wilayitining köktoqay, chinggil nahiyiliri, altay shehiri, qaba, burchin nahiyiside hazirghiche 5672 ademde oxshimighan derijide üshshüp qélish hadisisi körülgen. Shundaqla nechche yüz ming tuyaq charwa mal ziyan'gha uchrighan. Biwaste kélip chiqqan iqtisadiy ziyan 80milyon yu'en'ge yetken.

Biz qar apitining tesirige hemmidin éghir uchrighan altayning köktoqay nahiyilik doxturxanisigha téléfon qilip, üshshüp qalghan charwichilarning dawalashqa érisheligen ‏- érishelmigenlikini soriduq.

Tashqi késeller bölümining bir doxturi, amérikidin téléfon uriwatqanliqimizni bilgendin kéyin, so'allirimizgha aldirap jawab berdi. U " üshshüp qélish ehwalliri bar, doxturxanimizda dawalawatimiz, soghaq hawada uningdin bashqimu késeller kéliwatidu, hemmini heqsiz dawalawatimiz. Bashqa chataq yoq, siler köngül bölmisenglarmu bolidu" dep téléfonni qoyuwetti.

Bezi yollar hazirkghiche échilmighan

Bir qanche kün ilgiri qatnash üzülüp qalghan, altay wilayitining dölet tash yoli 216 ‏- liniyisi, we ölke yoli 217 ‏- liniyiside qatnash asta- asta eslige kélishke bashlighan bolsimu, bezi yol bölekliride taghdin köchken qarlar dawamliq halda bezi yollarni étip qoymaqta iken.

Tengritagh tor bétide -12 yanwar bérilgen uchurgha qarighanda, bir nechche kündin buyan ili rayonidimu qattiq qar yaqqan bolup, 11 - yanwar küni ilining telke éghizi, almaliq jilghisida qar köchüsh hadisisi yüz bérip asasliq qatnash liniyiliridin 312 ‏- dölet tash yoli tosulup, yoluchilar qapsilip qalghan.

Hökümet torbetliride qar apitige da'ir bérilgen xewerlerde, asasen hökümetning apet rayonigha yardemni kücheytiwatqanliqi mezmun qilin'ghan. Emma biz apet bir qeder éghir bolghan, altayning köktoqay nahiyisige téléfon qilghinimizda bir qazaq charwichi, bu jayda bezi déhqan, charwichilarning öylirining örülüp chüshkenlikini hawa bek soghaq bolghachqa ammining jiddiy yardemge muhtaj boluwatqanliqini emma hökümetning yardimining téxi kelmigenlikini bildürdi.

Tengri téghining shimalida qar apiti yüz bergen jaylarda eng töwen hawa témpératurisi nöldin töwen 43 sélsiye gradusqa chüshken, altay métrologiye idarisidin igilishimizche, altay, ili qatarliq jaylarda kéyinki bir nechche künde qarliq hawarayi yene dawamlishidiken. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.