Qaramay shehiride pinsiyige chiqqan ishchilar namayish qildi

• Muxbirimiz erkinning bu heqtiki toluq melumati
• Download story audio

Uyghur aptonom rayonining néfit shehiri qarimayda ötken hepte pinsiyige chiqqan ishchilar namayish qilip, dawalinish we turmush shara'itini yaxshilap bérishni telep qildi. Namayish jeryanida toqunush yüz bermigen bolsimu, lékin namayish qilghuchilarning sani nahayiti köp bolghan.

Küzetküchiler, Uyghur aptonom rayonida yerlik da'iriler muqumluq hemmini bésip chüshüdighan 1 - amil, dégenni bahane qilip, merkezning ijtima'iy sughurta ishlirigha salghan meblighini jayigha qollanmighanliqini, bu rayondiki xitay ishchi - xizmetlirining naraziliqini qozghawatqanliqini bildürmekte.

Pinsiye pulini östürüp bérishni telep qildi

Uyghur aptonom rayonining néfit bazisi qarimayda pinsiyige chiqqan 20 ming ishchi - xizmetchilerning wekilliri, shinjang néfit bashqurush idarisi rehberlirining pinsiyidiki ishchilargha pinsiye sughurtisi sétiwélish üchün ajritilghan mebleghni yötkep ishletkenliki shundaqla pinsiye puli turmushni qamdiyalmaywatqanliqigha narazi bolup erz qilghan.

Xewerlerge qarighanda erz qilghuchilar qarimay shehirining merkizidiki bir chong yolni tosuwalghan we néfit bashqurush idarisining rehbiri yatqan méhmanxanini qorshiwélip, uni jawap bérishke qistighan. Bu qétimqi namayishini teshkilligüchi ishchilar wekilliri, ishchilarning on nechche yildin béri öz hoquqini qoghdashqa tiriship kéliwatqanliqini shundaqla erz - shikayetlerning her küni dégüdek bolup turiwatqanliqini bildürmekte.

Shinjang néfit bashqurush idarisining pinsiyige chiqqan ishchisi shaw yisenning peyshenbe küni radi'omizgha ashkarilishiche, qarimay shehiride muddettin burun pinsiyige chiqqan 20 mingdek ishchi bar bolup, ularning köpchiliki her ayda 200 som pinsiye puli almaqta iken.

" Rehbiri kadir"ning méhmanxanisi qorshiwélindi

Ötken heptining peyshenbe küni texminen 300 dek pinsiyige chiqqan ishchi, qaramay sheher merkizidiki chong yolni tosap, néfit bashqurush idarisining bir rehbiri kadiri qon'ghan méhmanxanini qorshiwalghan we pinsiye puli mal bahasining örlishige paylimaywatqanliqini, pinsiyige chiqqan ishchilargha pinsiye sughurtisi sétiwélishqa tégishlik mebleghning bashqilar teripidin yötkep ishletkenliki hem bu pulning iz -dériki yoqap ketkenlikidin narazi bolup namayish qilghan.

Shaw yisen, " ötken hepte bir türküm yashan'ghan kishiler sheher merkizidiki chong yolni tosuwaldi. Kéyin ular bir rehbiri kadirning shu jaydiki bir méhmanxanigha chüshkenlikini anglap méhmanxanini qorshiwaldi hem bu rehberning telipimizni yuqirigha inkas qilish ümidide uninggha yetküzdi," dep körsetti.

Uning eskertishiche, shinjang néfit bashqurush idarisi buningdin on nechche yil burun qarimay shehiride nurghun ishchilarning istajini sétiwélip, ularni mudettin burun pinsiyige chiqarghandin béri, kishiler dawamliq erz - shikayet qilip kéliwatqan bolup, ular pinsiye pulini östürüsh we bala- chaqilirini xizmetke orunlashturushni telep qilmaqta iken.

Ishchilar wekillirining her waqit tutqun qilinish éhtimali bar

Shaw yisen, Uyghur aptonom rayonining sezgür rayon ikenliki, saqchilarning ishchilar wekillirini her waqit tutqun qilish mumkinchiliki barliqini, buningdin sirt Uyghur aptonom rayoni xitayning néfit - ximiye sana'et bazisi bolghanliqtin, bu yerdiki ishchilarning nahayiti asanla rak késilige giriptar bolush éhtimali yuqiri bolsimu, lékin néfit bashqurush idarisi rak késilige giriptar bolghuchilargha tibbi yardem bermeydighanliqini bildürdi.

Shinjang néfit bashqurush idarisi partikomidiki da'iriler pinsiye puli mesilisining hel qilinmighanliqini ret qilmaqta. Néfit bashqurush idarisi partikomining bir dujorni xadimi, radi'omiz muxbirigha pinsiye puli mesilisining hel qilinip bolghanliqini bildürdi. Lékin u, rak késilige giriptar bolghuchilarning tibbi yardemge érishelmeywatqanliqi heqqidiki so'allargha jawap bérishni ret qilip, bu mesilini "partkom ishxanisigha téléfon qilip sorashni" tewsiye qildi.

Térrorizm bahane, meqset chöntekni toldurushmu ?

Uyghur aptonom rayonidiki weziyettin xewerdar zatlarning ashkarilishiche, xitay merkizi hökümiti xéli burunla ishchi - xizmetchilerning ma'ashini tengshesh toghrisida höjjet chüshürgen bolsimu, lékin Uyghur aptonom rayoni partkomi ghezinide puli yoqliqini, pulning muqumluqni qoghdashqa kétiwatqanliqini bahane qilip, merkezning höjjitini hazirghiche ijra qilmighan. Amérika milwaki uniwérsitétining doktor kandidati, qilich qanat, "milli bölgünchilik"ke qarshi turush rayondiki hoquqdar küchlerning yuqirida merkezni, töwende puqralarni aldashtiki kozur bolup qalghanliqini bildürmekte.

Qarimay, jungghar oymanliqining gherbiy qirghiqigha jaylashqan Uyghur aptonom rayonidiki eng kona néfit bazilirining biri bolup hésablinidu. Qarimay néfitliki 1952 - yili resmi échilishqa bashlighan bolup, nöwette rusiye bilen qazaqistanning xitayni néfit we teb'iy gaz bilen teminlesh ötkili bolup qaldi. Yéqinda xitayning bir néfit shirkiti qarimaydin zapas miqtari 30 milyard kup métirdin ashidighan zor kölemlik teb'iy gaz qatlimi bayqighanliqini jakarlighan.(Erkin)