Balilarning qatnash weqeside ölüshi sewebidin gensuda hökümet emeldarliri jazalandi

16-Noyabir gensuda yüz bergen qatnash hadisiside, 20 nechche balining ölüp kétishi, xitay puqralirining hökümet da'irilirige bolghan naraziliqini qozghighan idi.
Muxbirimiz méhriban
2011.11.17
qatnash-weqesi-oqughuchi-olgen-305.jpg 9 Adem olturush belgilen'gen jip aptomobili yesli da'iriliri teripidin özgertilip, 64 neper balini niqtap olturghuzghan. 2011-Yili 16-noyabir.
“jenubiy zhongguo sheher geziti” din elinghan

Bügün gensu ölkilik hökümet uqturush chiqirip, weqede jawabkarliqi bar dep qaralghan 4 neper hökümet emeldarining xizmitidin toxtitilghanliqini jakarlidi. Radi'omiz igiligen uchurlardin melum bolushiche, weqening yüz bérishige yerlik da'irilerning xizmettiki mes'uliyetsizliki seweblik mektep aptomobiligha normidin artuq adem olturushi, shopurning bixesteliki hem tumanliq hawa rayi qatarliq köp xil amillar seweb bolghan.

Charshenbe küni gensu ölkisi jéngning nahiyiside yüz bergen, mektep aptomobilining soqulup kétishi seweblik 21 balining ölüsh weqesi, xitayda bu yil ichide yüz bergen yene bir qétimliq zor qatnash weqesi dep qarilip, weqede jawabkarliqi bar dep qaralghan hökümet emeldarlirigha chare körüldi.

Xitay metbu'atliri hem xelq'ara metbu'atlarning xewer qilishiche, shu küni weqening yüz bérishige, esli 9 adem olturush belgilen'gen jip mashinining yesli da'iriliri teripidin özgertilip, 64 neper balining niqtap olturghuzulushi, aptomobil shopurining tumanliq hawa rayida qatnash qa'idisige xilap halda, mashinini sa'itige 60 kilométirliq sür'et bilen heydigenliki seweb bolghan.

Radi'omiz igiligen uchurlardin melum bolushiche, 21 balining ölüp, 40 nechche balining yarilinishigha uchrighan bu aptomobil, gensu ölkisi jingning nahiyisidiki “Kichik doktorlar balilar baghchisi” ning aptomobili iken. Birqanche yillardin buyan yesli da'iriliri pulni téjesh üchün, yeslidiki 730 neper balini toshushqa aptomobil orunduqliri shexsler teripidin özgertilip yasalghan 4 dane ölchemsiz aptomobilni ishlitip kelgen. Balilirining bixeterlikidin ensirigen ata-anilar bu ehwalni nahiyidiki munasiwetlik organlargha köp qétim inkas qilghan bolsimu, emma nahiyilik hökümet da'iriliri “Kichik doktorlar balilar baghchisi” ning bu xil qanunsiz qilmishini körmeske salghan.

Bu qétimqi aptomobil weqeside 5 yashliq oghli yarilan'ghan wéy ependi, radi'omiz gu'angdung bölümining ziyaritini qobul qilip, weqede yarilan'ghan balilarning ehwali hem hökümet da'irilirining weqeni bir terep qilishta tutqan pozitsiyisi heqqide toxtaldi.

Wéy ependining bildürüshiche, weqe yüz bergen yeslide peyshenbe künidin bashlap ders toxtitilghan. Yarilan'ghan 40 nechche balining 18 nepiri yenila doxturxanida dawaliniwatqan bolup, bularning ichide birnechche balining hayati yenila xewp astida iken. Nahiyilik hökümet da'iriliri weqede yarilan'ghan balilarning pütkül chiqimini, hökümet üstige élip dawalitidighanliqini bildürgen bolsimu, emma weqede ölgen 21 balining ata-anisigha bérilishke tégishlik tölem puli heqqide hazirghiche éniq jawab bermigen.

Xitayning shinxu'a tor békitidiki xewerdin melum bolushiche, nöwette bu qétimqi éghir qatnash hadisiside biwasite jawabkarliqi bar dep qaralghan, jéngning nahiyisidiki ikki neper mu'awin hakim, nahiyilik qatnash saqchi etritining bashliqi hem nahiyilik ma'arip idarisining bashliqi qatarliq töt neper hökümet emeldari buyruq bilen xizmitidin toxtitilghan. Weqening yüz bérishini keltürüp chiqarghuchi yük aptomobili shopuri fen jün'gang, balilar baghchisi xojayini li jün'gang qatarliq ikkiylen jawabkarliqi bar dep qarilip, nahiyilik saqchi idarisi teripidin qolgha élin'ghan.

Radi'omiz xitay bölümi ikki kündin buyan nahiyilik hökümet da'irilirige téléfon qilip, weqening tereqqiyati heqqide ehwal igileshke tirishqan bolsimu, emma da'iriler weqe heqqide yenimu tepsiliy melumat bérishtin özini qachurup keldi.

Radi'omiz ziyaritini qobul qilghan, nahiyilik hökümette ishleydighan jang famililik ayal, yarilan'ghan balilarning ehwali heqqide toxtalghan bolsimu, emma u özining buningdin artuq melumat bérelmeydighanliqini eskertip, muxbirning yenimu tepsiliy melumatlarni xitayning hökümet metbu'atliridin igilishi kéreklikini eskertti.

Jang xanim öz bayanida, doxturxanida dawaliniwatqan balilar ichide, 10 nechche balining yarisi éghirliqini bildürüp, ularning nahiyilik doxturxanida qutquzuluwatqanliqini, nahiyidiki rehberlerningmu weqe yüz bergendin buyan doxturxanida ikenlikini bildürdi.

Nahiyilik doxturxana hem nahiyidiki saqchi da'iriliri bolsa, weqe heqqide yenimu tepsiliy melumat bérishni ret qildi.

Xitay tor béketliridiki melumatlarda bolsa, bu qétimqi qatnash weqeside mes'uliyetning pütünley hökümet terepte ikenliki heqqidiki inkaslar yézildi. Bu inkaslarda xitayda yéqinqi yillardin buyan ewj alghan parixorluq, chiriklik qilmishlirining puqralarning iqtisadiy menpe'itinila weyran qilip qalmastin belki puqralarning hayati bixeterlikini kapaletsiz haletke keltürüp qoyghanliqi bayan qilinip, xelqning xitay hökümitige bolghan naraziliqi ipadilen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.