Хитайниң 2010 - йиллиқ қаттиқ зәрбә бериш һәрикити

Хитай тор бәтлириниң 6 - айниң 14 - күнидики хәвиридә көрситилишичә, хитай җамаәт хәвпсизлик министирлиқи 6 - айниң 13 - күни телевизор вә телефун йиғини чақирип, мәмликәт бойичә 7 ай давамлишидиған 2010 ‏- йиллиқ қаттиқ зәрбә бериш һәрикитигә сәпәрвәрлик қилиш чақириқини оттуриға қойған.
Мухбиримиз әкрәм
2010-06-14
Share
7-iyul-kuni-at-beyge-mehellisida-tutulghan-yash-Uyghur-osmur-305.jpg Сүрәт, 7 - ийул күнидики айаллар вә балилар намайишида тутқун қилинған йаш өсмүрләрдин бириниң хитай сақчилири тәрипидин тутуп елип кетиливатқан көрүнүш.
RFA Муштирилиримиз әвәткән сүрәт.

Хитай җамаәт хәвпсизлик министирлиқи муавин министири җаң шинфиң бу қетимқи йиғинда сөз қилип, пүтүн мәмликәт миқясида елип берилидиған бу қетимқи һәрикәттә нөвәттики мурәккәп сиясий вәзийәткә тақабил туруш үчүн, барлиқ җамаәт хәвпсизлик органлириниң қаттиқ зәрбә бериш мәйданида мустәһкәм туруши, омумйүзлүк  түзәш, тәртипкә селиш паалийитини техиму чуңқурлаштуруп қанат яйдуруши,  һәрхил җинайи һәрикәтләргә қаттиқ зәрбә берип, омумйүзлүк муқимлиқни узун мәзгиллик әмәлгә ашуруш, бу арқилиқ шаңхәй дуня йәрмәнкиси һәм гуаңҗуда өткүзилидиған асия тәнһәрикәт йиғини үчүн яхши муһит яритишни оттуриға қойған.
 
Бу қетимқи йиғинға пүтүн хитайдики җ х органлири қатнашқан болуп, 2010 - йиллиқ қаттиқ зәрбә бериш һәрикити  даирисидә иҗтимаий, иқтисадий җинайәтләргә зәрбә бериштин бәкрәк, сиясий җинайәтләргә зәрбә бериш бәлгилик салмақни игилигән.
 
Уйғур сиясий паалийәтчилириниң қаришичә,  уйғур вәтинидә 2009 - йили 7 - айниң 5 - күни йүз бәргән "5 - июл вәқәси" дин буян, "қаттиқ зәрбә бериш" һәрикити изчил давамлишип келиватқан болуп, хитай бихәтәрлик министирлиқиниң бу қетимқи чақириқи бу раюнниң вәзийитини техиму мурәккәпләштүрүши мумкин икән.
 
Д у қ  баш катипи долқун әйса әпәнди, хитай һөкүмитиниң 2010 - йиллиқ қаттиқ зәрбә бериш һәрикитиниң шәрқий түркистанда техиму дәһшәтлик бир рәвиштә иҗра қилинидиғанлиқини, "5 - июл вәқәси" дин буян онмиңлиған уйғурларниң қолға елинғанлиқини, бу хил наһәқ қолға елиш, җазалаш һәрикәтлириниң шәрқий түркистанда бир күнму тохтап қалмиғанлиқини тилға елип өтти. У йәнә, хитай һөкүмитиниң бир тәрәптин "шинҗаңға ярдәм бериш" шуари астида шәрқий түркистанда йәниму илгирилигән талан - тараҗ сияситини йолға қойса, йәнә бир тәрәптин "қош тиллиқ маарип" чақириқи астидики хитай маарипини раваҗландуруш үчүн көпләп мәбләғ аҗритип, ассимилиятсийә қәдимини тизлитиватқанлиқини, буниңға қарши идийидики кишиләрни һәр хил баһанә - сәвәбләр билән йоқитиватқанлиқини тәкитлиди.

Д у қ ниң муавин баш тәптиши нурмуһәммәд розахун әпәнди, хитайниң 2010 - йиллиқ қаттиқ зәрбә бериш һәрикитиниң уйғур миллити үчүн техиму зор бәхтсизлик елип келидиғанлиқини ейитти.

Муавин министир җаң шинфиңниң сөзигә асасән ейитқанда, 2010 - йиллиқ қаттиқ зәрбә бериш һәрикити пүтүн хитай тәвәсидә бирла вақитта қанат яйдурилидиған болуп, бу һәрикәт мәркәзниң қоманданлиқида тәшкилләнгән гуруппиларниң ортақ күч чиқириши билән иҗра қилинидикән.

Асаслиқ зәрбә нишани партийә - һөкүмәткә қарши вәқәләр, топилаңлар, җәмийәткә тәсири интайин яман болған зораванлиқ һәрикәтлири, хәлқ аммисиға тәһдит кәлтүрүватқан һадисиләр, зораванлиқ гуруһлири қатарлиқлар болидиғанлиқи тилға елинған.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт