Xelq'araliq qedimki Uyghur tili tetqiqati muhakime yighini enqerede axirlashti

2011-Yili 6-ayning 4-künidin 6-künigiche türkiyining enqere shehiridiki xilton méhmanxanisida xelq'araliq qedimki Uyghur tili tetqiqati ilmiy muhakime yighini chaqirildi.
Ixtiyariy muxbirimiz erkin tarim
2011.06.07
ablet-semet-soz-qilmaqta-305.jpg Doktor ablet semet özining qedimki Uyghur tili heqqidiki maqalisini oqup chiqti. 2011-Yili 4-iyun. Türkiye.
RFA/Erkin Tarim

Yighinni türkiye til tetqiqat idarisi chaqirghan bolup, yighin'gha gérmaniye, wén'griye, yaponiye, koriye, türkiye we xitay qatarliq döletlerdin kelgen 31 dangliq türkshunas we Uyghurshunaslar qatnashti. Yighin 6-ayning 4-küni bashlan'ghan bolup, yighinda proféssor doktor osman fikri sertqaya ependi “Uyghurche tékistler heqqide türkiyide élip bérilghan tetqiqatlar”, dangliq némis türkshunasi, proféssor doktor pétir zi'émens “Singqu séli tutung kim?”, proféssor dr. Kla'us röhrborn “Shü'enzangning terjimihalining terjimisidiki bezi xususiyetler” témilirida söz qildi. Bulardin bashqa yene tonulghan türkshunas proféssor dr. Marsel erdal ependi “Qedimki Uyghur tilining léksikologiyisi”, yapon Uyghurshunasi proféssor da'imatsuyi ependi “Qedimki Uyghur tili tékistliridiki qanun atalghusi borun-luq sözi heqqide”, proféssor jewat qaya ependi “Qedimki Uyghur tilidiki sozuq tawushlarning maslishishidiki mesililer” témisidiki maqalilirini oqup ötti.

Uyghurlardin béyjingdiki merkiziy milletler uniwérsitéti oqutquchiliridin proféssor litip toxti ependi, proféssor metréhim sayit ependi, hazir gérmaniyide ishlewatqan doktor abduréshit yaqup, doktor ablet semet we doktor aysima mirsultan qatarliqlar özlirining qedimki Uyghur tili heqqidiki maqalilirini oqup chiqti.

Bulardin bashqa yene béyjing merkizi milletler uniwérsitétining oqutquchiliridin proféssor erkin awgali, doktor dilana israpil xanim we doktor raziye nuri xanim qatarliqlar qedimki Uyghur tili we qedimki Uyghur tilshunasi singqu shéli tutung heqqidiki maqalilirini oqup ötti. Türkiye béykent uniwérsitétining oqutquchisi doktor meghpiret kamal xanim bolsa singqu séli tutungning terjime uslubi heqqide söz qildi.

6-Ayning 4-künidin 6-künigiche türkiyining enqere shehiride ötküzülgen xelq'araliq qedimki Uyghur tili tetqiqatliri ilmiy muhakime yighini türkiyide qedimki Uyghur tili heqqide ötküzülgen mexsus yighin bolup, Uyghurlarning dunya medeniyitige shundaqla türk medeniyitige qoshqan töhpisini yorutush üchün intayin muhim ehmiyetke ige dep teriplenmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.