Xitay armiyisi xuddi en'giliye mutexessisliri dégendek qeghez ejdiharmu?

Xitay dölet mudapi'e ministirliqi uchur - axbarat idarisining bashliqi géng yenshéng 4 - ayning 26 - künidiki axbarat yighinida, muxbirlarning so'allirigha jawab bergen, u jawab bergen birinchi mesile - xitay armiyisi qeghez ejdiharmu dégen mesile.
Muxbirimiz weli
2012.04.27
aq-tashliq-kitab-xitay-herbiy-305.jpg Itay hökümiti aq tashliq kitabini élan qilghan mezgilde, xitay qoralliq küchlirining béyjing sirtida yighilghan körünüsh. 2006-Yili 29-dékabir.
EyePress News

Xitayning “Téngshün” tor gézitida bayan qilinishiche, xitay dölet mudapi'e ministirliqi uchur - axbarat idarisining bashliqi, azadliq armiyining pishqedm kolonél derijilik qomandani géng yenshéng 4 - ayning 26 - küni muxbirlargha, “Amérika herbiy mutexessisliri xitayni filippin'ge qarshi cheklik urush qozghighan idi, wéytnammu xitay bilen étiship tirkeshken idi, netijide xitay pütün sep buyiche keynige chékindi deptu؛ en'giliye mutexessisliri bolsa xitay armiyisini, 30 yildin buyan urush qilip baqmidi, hazir yenila qeghez ejdihar deptu؛ bu geplerning héchqandaq pakiti yoq, xitay héchqachan qoshna döletlerni xitaygha teng kéleleydu dégen köz qarashta emes, xitay hazir rusiye bilen munasiwetni yaxshilash üchün, jenubiy déngizda birleshme herbiy meshq ötküzüwatidu” dep jakarlighan.

Xitay dölet mudapi'e ministirliqi uchur - axbarat idarisining bashliqi géng yenshéngning “Xitay armiyisi qeghez ejdihar” dégen köz qarash heqqidiki bayanatini, xitayning “S n a” tor géziti, “Maliye” tor géziti, “Béyjing yashliri” tor géziti, “Jenub” tor géziti qatarliq uchur wastiliri köchürüp basti. Xongkongda chiqidighan “Wénxuy” tor géziti, amérikida chiqidighan “Xitaygha nezer” tor géziti qatarliq uchur wastiliri bu heqte obzor élan qildi.

“Xitaygha nezer” tor gézitining yazghuchisi jaw yungchi xitay dölet mudapi'e ministirliqi uchur - axbarat idarisining bashliqi géng yenshéngning, xitay armiyisi qeghez ejdihar dégen köz qarash ispatsiz gep dégen köz qarishini töwendiki üch jehettin ret qildi:

“Xitaygha nezer” tor gézitining yazghuchisi jaw yungchining qarishiche, xitay armiysi ötken esirde, héndistan bilen chégra mesilisni hel qilalmighan “Chégra urushi” we wéytnam bilenki chégra toqunushini hel qilalmighan“Qoghdinish urushi”gha qatnashqandin buyanqi yérim esirge yéqin waqit ichide héchqandaq zamaniwiy urushqa qatniship baqmidi. Xitay armiyisi hazirmu ötken esirdiki xata köz qarashta. Hélimu “Meghlup bolmaydighan düshmen yoq”, hetta “Hemme eksiyetchiler qeghez yolwas” dep quruq gep sétip özini aldaydighan rohi halette. Xitay armiyisi yillardin buyan qolida qoral yoq xelqqe qirghinchiliq qilalighan bilen, xitay “Jenubiy tibet tarixtin buyan bizning zéminimiz” dewatqan jayda turuwatqan hindistan qisimlirigha, xitay “Tarixtin buyan bizning zéminimiz” dewatqan arallarda turuwatqan filippin herbiy paraxotlirigha, hetta jenubiy déngizdin xitayni qoghlighan wéytnamghimu inkas qayturalmidi. Chünki ular xitaydiki qoralsiz xelq emes, ularningmu qolida qoral bar. Zamanimizda quruq gep bilen urush qilghili bolmaydu. Eng muhimi, xelq kommunist partiyidin jaq toydi, kommunist xitay armiyisi bashqa dölet bilen urush qilsa, xitay xelqi uni qollimaydighanliqini bilidu.

“Xitaygha nezer” tor gézitining yazghuchisi jaw yungchining qarishiche, xitay armiyisi qomandanliri chérikleshken - xiyanetchilik patqiqigha pétip qalghan armiye. 2006 - Yili ashkarilan'ghan xitay déngiz armiye qomandani wang shuyéning 160 milyon yu'en xiyanet qilghan we shehwaniliq délosi peqet xitay armiyisidiki chériklik - xiyanetchilik mesililirining bir tamchisi. Xitaydiki eng chong chériklik délolirining herbiy qisimlargha chétilmighanliri yoq. Azadliq armiye arqa sep teminat siyasiy komissari général lyu yu'en bu yilqi bahar bayrimi sen'et kéchilikige qatnashqan 600 neper généralning aldida, qandaq chong qomandan bolushidin qet'iynezer, herbiy qisimlardiki chérik - xiyanetchilerni teltürüsh jazalashtin bash tartmaymen dep qesemyad qilghanliqi, herbiy qisimlardiki chériklikning neqeder éghir ikenlikidin dérek béretti.

“Xitaygha nezer” tor gézitining yazghuchisi jaw yungchining qarishiche, xitay armiyisi hazir “Oyun qoyidighan armiye” ge aylinip qaldi. Her qaysi qisimlarning öz aldigha quruwalghan sen'et ömekliri bek chong, xitay armiyisde artis qomandaq bek köp. Xitay güzel sen'et jem'iyitining bashliqi lyu dawéy xitay armiyisining général létinant unwanliq qomandani. Ressam jang dawshing déngiz armiye siyasiy bölümning général létinant unwanliq qomandani. Azadliq armiye bash siyasi bölümning dölet derijilik artisi péng liyu'en xitay armiyisining général létinant unwanliq qomandani. Azadliq armiye sen'et mektipining usul mu'ellimi lyu méy xitay armiyisining général létinant unwanliq eng yash qomandani. Uyghurlar zamanimizda yenila ishek minidu dégen nomurdin bashqini orunlimaydighan usulchi artis kérem abdugul xitay armiyisining général létinant unwanliq, korpus bashliqi derijilik qomandani.... Sen'et cholpini qomandanliri bu qeder köp xitay armiyisi hazir urush qilidighan emes, hemme ishni peqet oyun qoyup hel qilidighan armiyige aylinip qaldi. Urush bolup qalsa, oyun qoyup quruq gep satidighan “Rohi atom bomba” kérekke kelmeydu. Özlirimu jengde oyun qoyup ghelibe qilidu dégen'ge ishenmesliki mumkin.

Bügün bu maqale élan qilin'ghan sehipige yollan'ghan birmunche qisqa obzorlar bar. Uning béride, adette quruqluqta ademler xadigha baghlap kütürse polanglaydighan qeghez ejdihar, déngizda kérekke kelmeydu. “Xitayning armiyisi qeghez ejdihar” dégen oxshitish emeliyetke uyghun dep bayan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.