Xelq'ara qelemkeshler jem'iyiti tutqun mehbube ableshning teqdirige köngül bölmekte

Merkizi london'gha jaylashqan xelq'ara qelemkeshler jem'iyiti, tutqun mehbube ablesh heqqide ötken hepte b d t ning munasiwetlik organlirigha doklat yollidi.
Muxbirimiz shöhret hoshur
2008.10.14
Mehbube-Ablesh-305.jpg Mehbube ableshning waqti éniq bolmighan bir parche süriti. Bu süretni radio anglighuchilirimizdin biri radiomizgha ewetken.
Photo: RFA

Doklatta, xitayning mehbube ableshni qolgha élish bilen xelq'ara kishilik we siyasi hoquq ehdinamisining 19 ‏ - maddisigha xilapliq qilghanliqi körsitildi we xitayning mezkur ehdinamige qol qoyghanliqi eskertildi.

Mehbube ablesh intérnétte élan qilghan tenqidiy maqalisi seweblik 8 ‏ - ayning béshida qolgha élin'ghan idi. Nöwette xelq'ara jama'et mehbube ableshning teqdiridin endishe qilmaqta, xitay terep bolsa mehbube ablesh heqqide melumat bérishni izchil ret qilip kelmekte.

Xelq'ara qelemkeshler jem'iyiti ötken ayda jenubiy amérikining kolumbiye jumhuriyitide 74 ‏ - qétimliq omumyighini achqan, yighinda Uyghur qelemkeshler merkizi tutqun mehbube ablesh heqqide doklat sun'ghan, qurultay mehbube ablesh heqqide mexsus qarar chiqarghan idi. Bu qarargha asasen nöwette xelq'ara qelemkeshler jem'iyitining alaqidar tarmaqliri pa'aliyitini bashlidi. Xitaydiki boshün torida xewer qilinishiche, xelq'ara qelemkeshler jem'iyitining türmidiki qelemkeshler komitéti ötken hepte yene bayanat élan qilghan.

Bayanatta, xitayning mehbube ableshni derhal qoyuwétishi we yaki mehbube ableshning adwokat tutup özini aqlishigha adil purset bérishi telep qilin'ghan. Uyghur qelemkeshler merkizining bash katibi qeyser abdurusulning bildürüshiche, xelq'ara qelemkeshler merkizi mehbube ableshke adwokat tutush üchün 1000 yawru pul ajratqan, Uyghur qelemkeshler merkizi nöwette mehbube ableshke adwokat tépishning yolini izdimekte.

Xelq'ara qelemkeshler merkizining b d t gha yollighan doklatida tilgha élin'ghan xelq'araliq ehdinamida munular bildürülgen: " bu ehdinamige qol qoyghan döletler puqralarning dunyaning her qandaq yéridin héchqandaq cheklimige uchrimastin erkin uchur igilesh, erkin pikir bayan qilish, oxshimighan pikirlerni meyli yéziq, meyli aghzaki bolsun ipadilesh hoquqigha hörmet qilidu we kapaletlik qilidu."

Xitay mana bu kélishimge imza qoyghan döletlerdin biridur. Xelq'ara qelemkeshler jem'iyiti yene, öz ezalirining we qollighuchilirining, xitay prézidénti xu jintaw we Uyghur rayonining re'isi nur bekrige, mehbube ableshni qoyuwétishni telep qilip ochuq mektup yézishqa, mektupni özliri turuwatqan döletlerdiki xitay elchixanisigha tapshurushqa chaqirghan.

Qeyser abdurusulning bildürüshiche, xelq'ara qelem merkizining b d t gha yollighan doklatida, mehbube ableshtin bashqa yene toxti muzat, nurmuhemmet yasin, abdughéni memtimin qatarliq Uyghur qelemkeshlerning heqsizliqqa uchrighanliqi mesilisi we Uyghur rayonining nöwettiki omumiy siyasiy weziyiti tonushturulghan. Mehbube ablesh mesilisi nöwette xelq'ara qelemkeshler jem'iyiti jümlidin Uyghur qelemkeshler merkizining xizmet kün tertipide aldinqi orunni igiligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.