Méwe makani üshshükte qaldi

• Muxbirimiz gülchéhrening bu heqtiki toluq melumati
• Download story audio

Bu yil üshshük seweblik méwe makani bolghan Uyghur yurtining baghwenchilikide üch milyard yüen'ge yéqin ziyan körülidighanliqi mölcherlenmekte. Uyghur éli ormanchiliq nazaritining ashkarilishiche, bu yil 1 - aydin bashlan'ghan adettin tashqiri soghaq hawa hemde qar apiti seweblik üshshük chüshken méwilik baghlarning kölimi yette milyon modin ashidighan bolup, bu pütün Uyghur éli baghlirining %54 tin köprekini teshkil qilidiken.

Buning ichide bolupmu, Uyghur diyarining qeshqer,xoten, aqsu qatarliq jaylirini öz ichige alghan jenub qismidiki baghlarning üshshükte qélishi bir qeder éghir bolup, bu yil badam mehsulati %70 , ürük, chilan, yangaq qatarliq mehsulatlar %20 ke qeder töwenlesh éhtimalliqi küchlük iken.

Qeshqerning déhqanchiliq bilen baghwenchilikni gewde qilghan bezi nahiye hem yéziliridin igilishimizche, bu jaylarda bir aydin uzaq dawam qilghan qar apiti hem soghaq hawada déhqan charwichilar, turalghu, turmush, issinish hem ozuqlinish qatarliq jehetlerde qiyinchiliqqa uchrapla qalmay, déhqanchiliq hem baghwenchilik ishlepchiqirishta éghir ziyan'gha uchrawatqan bolup, éghir chiqim qilip mejburiy qurghan parniklirini, öylirini qélin qar bésip,emdila maysa bolghan köktatliri üshshüp weyran bolghan, siliq bilen tikken méwe köchetliri üshshüp déhqanlarni yenimu ghem basqan iken.

Bu heqte, yopurgha nahiyisining melum yézisidiki bir déhqan qar we üshshük apitide qalghan déhqanlarning halini, yéngisar nahiyisidiki bir déhqan bu nahiyide asasliq parniklarning ziyan'gha uchrash ehwalining éghirliqini, shundaqla, mekit nahiyiside olturushluq bir ayal apet ehwali heqqide anglighanliri heqqide sözlep berdi.

Qeshqer wilayetlik hökümetning ishxanisi bilen alaqilashtuq, bir xadim bizning erkin asiya radi'osi muxbiri ikenlikimizni bilgendin kéyin so'allirimizgha qisqiche jawab qildi.

Apetke uchrighan yerlik hökümet da'irilirining xelqni apettin qutquzush ishlirini qandaq orunlashturghanliqi heqqide melumat élish üchün yeken nahiyilik hökümet ishxanisigha téléfon qilghinimizda, bu nahiyige xénendin yötkep kélin'gen bir xitay kadir,téxi asasiy qatlamdin ehwal igilimigenlikini, apet ehwalidin téxi xewerdar emeslikini, yurtidin emdila qaytip kelgenlikini éytti.

Qeshqerning bir qisim apet rayonidin igiliginimizdek, gerche nöwette her qaysi nahiyiler apetke uchrighan déhqanlarni öz ‏- özini qutquzup déhqanchiliq ishlepchiqirishni ilgiri sürüsh namida apetning aldini élip kelgüsi ziyanlirini azaytish üchün heriket qiliwatqan bolsimu, emma soghaq hawa yenila dawamlishiwatqanliqi, shundaqla üshshük apitining éghir bolghanliqi seweblik ziyanning qanchilik bolidighanliqini mölcherleshke yenila baldurluq qilidiken. (Gülchéhre)