Qirghizistan parlamént saylimi xelq'arada her xil bahagha érishmekte

Qirghizistanda ötküzülgen parlamént saylimi amérika we yawrupa hökümet erbabliri teripidin ochuq ‏- ashkara we adaletlik élip bérildi dep bahalan'ghan bir peytte, bir qisim xelq'ara közetküchilerning neziride mezkür saylamning qanunsizliqlardin mustesna bolmighanliqi otturigha qoyulmaqta. Töwende bu heqte muxbirimiz eqide melumat béridu.
Muxbirimiz eqide
2010.10.13
Share on WhatsApp
Share on WhatsApp
Qirghiz-parlament-saylimi-bilet-tashlash-305 Süret, 10 ‏- öktebir, qirghizistanda ötküzülgen parlamént saylimida bilet tashlawatqan qirghiz er - ayal.
AFP Photo

Qirghizistanda 10 ‏- öktebir yekshenbe küni ötküzülgen parlamént saylimi, hazirqi waqitliq hökümet prézidénti roza otunbayéwa teripidin qizghin alqishlandi, u bu heqte toxtilip, "bu qétimqi saylamda puqralar özliri xalighan partiyilerge bésimsiz we buyruqisiz awaz berdi" dédi.

Otunbayéwaning neziride saylam, ochuq - ashkara, démokratik we erkin halette élip bérilghandin sirt, qirghizistanning ilgiriki saxta saylam en'enisige xatime bergen.

Yawrupa bixeterlik we hemkarliq teshkilatining saylam közetküchiliri, saylam jeryanigha ijabiy baha bergen bolup, norwégiyilik députad martin, saylamning erkinlik, ittipaqliq we pikir bildürüsh hoquqlirigha boysun'ghan asasta élip bérilghanliqini tekitligen hemde mundaq dégen: "bir qanche yillardin béri ottura asiyada élip bérilghan bir qatar saylamlarni közettim, qirghizistanning bu qétimqi saylimini, xelq öz iradisini ipade qilalighan bir saylam boldi dep qaraymen."

Amérika prézidénti barak obamamu, saylamning muweppeqiyetlik bolghanliqigha baha bérip, qirghizistan waqitliq hökümitini tebriklidi hemde qirghizistandiki saylam qatnashquchilirining tarixi peytte, hakimiyetni tinch we démokratik shekilde yéngilash üchün hesse qoshqanliqini tebrikleydighanliqini bildürdi.

Bu qétimqi parlamént saylimi, 500 ge yéqin xelq'ara közetküchi teripidin nazaret qilin'ghan, gerche saylam jeryani muhim shexsler teripidin yuqiriqidek ijabiy bahalargha érishken bolsimu, lékin nurghun tenqidlerge hem uchrighan.

Saylamda parlaméntqa kirelmigen "qirghizistan birlik partiyisi" we bashqa bir qanche partiyilerning 1000 din artuq qollighuchisi 12 ‏- öktebir küni béshkek, osh, jalal'abad qatarliq sheherlerde keng kölemlik naraziliq namayishi qozghap, saylam bélitini qayta sanap chiqishni telep qilghan we béshkek bilen oshtiki qatnash yollirini qamal qiliwalghan.

Saylamda 84. 4 Pisent awazgha ériship, nahayiti az nisbet bilen parlaméntqa kirelmigenlikini ipadiligen "qirghizistan birlik partiyisi" yene, waqitliq hökümetning, birlik partiyisining rusiye küchliri bilen ittipaq tüzüp, bu arqiliq parlaménttiki ornining küchiyip kétishidin endishe qilghanliqini shu seweblik qesten mezkür partiyining awazgha érishish nisbitini töwenlitip qoyghanliqini bildürgen.

Rusiye istratégiye mesililiri tetqiqat merkizi ottura asiya bölümining mutexessisi ku'értufning bildürüshiche, saylamda yéngilgen siyasiy küchler, hergiz meghlubiyetni undaq asan qobul qilmaydiken. Uning mölchirige qarighanda, qirghizistanda téximu köp siyasiy naraziliqlar meydan'gha kélidiken.

Ku'értuf bu heqte yene: "méning qarishimche, bu qétimqi saylam héchqandaq yaxshi bir netije élip kelmeydu, qirghizistan yenila shangxey hemkarliq teshkilati, xitay we rusiyining hemde bashqa qoshna döletlerning bash aghritidighan nuqtiliq mesilisi bolup qalidu " deydu.

Qirghizistanning parlamént saylimi, buningdin kéyinki siyasiy weziyiti, bolupmu shangxey hemkarliq teshkilatida tutqan orni mesilisi qatarliqlar üstide toxtalghan amérikidiki George Washington uniwérsitétining doktor aspiranti perhad bilgin ependi, qirghizistan omumiy weziyiti we uning xelq'aradiki tesiri heqqidiki qarashlirini bildürdi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet