Қирғизистандики уйғурлар һәм түркләрниң қирғизистан вәзийити һәққидики инкаслири

Нөвәттә хәлқара мәтбуатларда, қирғизистанда өктичи күчләр һакимийәтни қолға елип, вәзийәтни асаси җәһәттин контрол қилғанлиқини елан қилған болсиму, әмма қурманбек бақийеф вәзиписидин истепа беришни рәт қиливатқанлиқи үчүн, қирғизистан вәзийити йәнила җиддий һаләттә турмақта. Бүгүн қирғизистандики уйғурлар һәм түркләр зияритимизни қобул қилип, бишкәк шәһириниң нөвәттики вәзийити һәққидә тохталди.
Мухбиримиз миһрибан
2010-04-09
Share
Otta-koyduruwetilgen-Bazar-binasi-Bishkek-Qirghizistan-305.jpg Сүрәт, қирғиз пайтәхти бишкәктә 7 - апрел күни йүз бәргән намайиш вә тоқунуш җәрйанида көйдүрүветилгән чоң базар бинасидин бир көрүнүш.
AFP Photo

Нөвәттә гәрчә қирғизистан вақитлиқ һөкүмәт мәсули роза отанбайива  қирғизистан вақитлиқ һөкүмитиниң сақчи һәм әскәрләр арқилиқ вәзийәтни контрол қилип, пайтәхт бишкәк қатарлиқ җайларда тинчлиқ әслигә кәлгәнликини җакарлиған, вәзийәт сәл тинчланған болсиму, әмма чәтәл содигәрлириниң қирғизистандики сода сарайлири булаң- талаңға учриғанлиқи һәтта бәзи дуканларға от қоюлуп көйдүрүветилгәнлики мәлум болмақта.

Биз қирғизистандики уйғур тиҗарәтчилириниң әһвали һәм қирғизистанниң нөвәттики вәзийити һәққидә техиму ениқ мәлумат елиш үчүн, қирғизистанда турушлуқ уйғурлар һәм қирғизистанда тиҗарәт қиливатқан түрк қериндашлардин телефон зиярити арқилиқ әһвал игилидуқ.

Зияритимизни қобул қилған әмма, һазирчә исмини ашкарилашни халимайдиған бир уйғур зиялийси нөвәттә қирғизистанда вәзийәтниң асасән тинчланғанлиқини, қирғизистандики хитай содигәрлириниң сода сарайлири көйдүрүветилгәнликини, әмма қирғизистанда тиҗарәт қиливатқан уйғур содигәрлириниң бу қетимлиқ вәқәдә бәк чоң зиянға учримиғанлиқини баян қилди.

Қирғизистанда тиҗарәт қиливатқан түрк содигири һүсәйин әпәнди бизгә, бу қетимлиқ вәқәдә пүткүл дуканларниң тақалғанлиқини, һазир бишкәктики түрк содигәрлириниң дуканлирини техи ачмиғанлиқини, бәзи түркләрниң дуканлири булаң- талаңға учриғанлиқи үчүн өзлириниң вәзийәтниң бундин кейинки тәрәққиятини көзитип җиддий һаләттә туруватқанлиқини баян қилди.

Зияритимизни қобул қилған бу уйғур зиялийси қирғизстаннниң нөвәттики вәзийити һәм өзлириниң һөкүмәттин күтидиған үмидини баян қилип, һазир вәзийәт асасән тинчланған болсиму, әмма өзлириниң йәнила вәзийәтниң бундин кейинки тәрәққиятиға йеқиндин диққәт қилип келиватқанлиқини, һазирқи мәсилә йеңидин қурулған вақитлиқ һөкүмәтниң бундин кейинки вәзийәтни қандақ контрол қилиши һәм хәлққә бәргән вәдисини орунлишиға бағлиқ болуп қалғанлиқини билдүрди.

Нөвәттә русийә, хитай, америка қатарлиқ дөләтләрму қирғизистан вәзийитигә диққәт қилип келиватқан болуп, түнүгүн ақсарай баянат берип, президент барак обаманиң қирғизистан вәзийитигә диққәт қилип келиватқанлиқини билдүрди.

Русийә баш министири путинниңму түнүгүн вақитлиқ һөкүмәт башлиқи роза отанбайива билән телефонда сөзләшкәнлики мәтбуатларда мәлум болмақта. Хитайниң қошниси болған қирғизистанниң вәзийитигә техиму диққәт қилип келиватқанлиқи хәлқара мәтбуатларда берилмәктә. Бирләшкән дөләтләр тәшкилати баш катипиму түнүгүн баянат берип, қирғизистан вәзийитиниң тезликтә тинчлинишини үмид қилидиғанлиқини билдүрди.

Юқиридики аваз улинишидин, бу һәқтики сөһбитимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт