Tiyenjindiki Uyghur sodigerler,"- Uyghur qizlirimizni qutquzup qélinglar...."

• Muxbirimiz gülchéhrening bu heqtiki toluq melumati
• Download story audio

Xitay hökümitining yéqinqi yillardin buyan Uyghur éli yéziliridiki éshincha emgek küchlirini yötkesh bahanisida, toy qilmighan Uyghur qizlirini türkümlep xitay ölkilirige türlük wasitiler bilen yötkishi, Uyghur jama'itide türlük qiyas hem inkaslarni qozghawatqan murekkep bir mesilige aylandi.

Bezi ghururluq Uyghurlirimiz, qizlarni qutuldurushqa urunmakta

Xitay da'irilirining Uyghur qizliri yötkelgen zawut adrislirini toluq bermesliki, ishchiliqqa apirilghan qizlarning türlük bésimlargha uchrap heq ‏- hoquqlirining kapaletke ige bolmasliqidek mesililer Uyghurlarning xitay hökümitining mezkur pilanigha bolghan gumanini téximu ashurmaqta.

Uyghur qizlirining xitay ölkiliride duch kéliwatqan weziyiti, shu jaylarda soda we bashqa ishlar bilen shughulliniwatqan bezi Uyghurlarningmu diqqitini tartqan bolup, beziler hetta Uyghur qizlirining emeliy ehwalini igilesh, ularni qutquzush üchünmu urunup körgen iken.

Uyghur jama'itige murajet

Yéqindin buyan, xitayning tyenjin shehiri we bashqa ölke, sheherliridiki Uyghurlar türlük alaqe wastiliri arqiliq bizning xitay ölkilirige ishqa orunlashturush bahanisida yötkep kétilgen Uyghur qizlirining emeliy ehwalini igilep béqishimizni hemde buni xelq'araliq munasiwetlik organlargha yetküzishimizni ötünmekte.

Nöwette, xitay ölkilirige ishqa orunlashturush bahanisida pilanliq yötkiliwatqan Uyghur qizlirining teqdiri, heq ‏- hoquqliri mesilisi Uyghur kishilik hoquq herikiti rehbiri rabiye qadir xanim bashliq bu mesilige köngül bolüwatqan kishilerning tirishchanliqi bilen xelq'araliq kishilik hoquq teshkilatlirimu köngül bölüwatqan mesilige aylandi.

Gerche Uyghur qizlirining barghan xitay zawutlirida türlük bésimlargha duch kéliwatqanliqi heqqide inkas we pikirlerni anglap kéliwatqan bolsaqmu, biraq xitay hökümitining Uyghur qizlarni ishlitiwatqan xitay zawutlirining resmiy adrislirini mexpiy tutup kéliwatqanliqi hemde zawutlarning Uyghur ishlemchi qizlarning sirt bilen alaqe ornitish yollirini qattiq kontrol qiliwatqanliqidek sewebler tüpeyli,bu heqte yenimu ishenchlik hemde toluq uchur igilesh tosalghugha uchrap kelmekte.

Muxbirimiz gülchéhre, tyenjinde soda ishliri bilen shughulliniwatqan bir ayal sodigerdin bu heqte melumatlargha ige boldi we köpchilikning xarlan'ghan qizlargha yardem qolini sunishini ündeydu.

Biz mezkur mesilidin xewerdar kishilerning radi'omiz heqsiz téléfon liniyisi arqiliq melumatlar yetküzüshini qayta soraymiz. Rehmet. (Gülchéhre)