Тийәнҗиндики уйғур ишчи қизларни хитай сот хадими назарәт қилмақта


2007-06-04
Share

Хитай һөкүмити, пәйзиват наһийисиниң хитай сотчисини тйәнҗин шәһиридә ишләватқан уйғур қизлирини назарәт қилишқа қошуп әвәткән болуп, бу, чәтәлләрдики уйғур зиялийлири арисида мулаһизә қозғиди.

Шәрқий түркистан учур мәркизи өзлириниң игилигән мәлуматлириға асасән, хитай өлкилиригә ешинчи әмгәк күчи сүпитидә әвәтиливатқан уйғур қизлириниң сиясий вә иқтисадий бесимларға учраватқанлиқини һәтта мәһбуслардәк қаттиқ назарәт астида ишләватқанлиқини билдүрди.

Уйғур қиз атикәм, хорлуққа учриған

Бу арида " шинҗаң иқтисад гезитиниң " 29 ‏- май күнидики хәвиридә, хитай һөкүмитиниң тйәнҗин шәһәрлик тоқумчилиқ һәссидарлиқ ширкитидә ишләватқан уйғур қизлирини башқурруш үчүн, пәйзиват наһийилик оттура сот мәһкимиси дило турғузуш коллигийисиниң башлиқи луән зохуң исимлик бир хитай аялни биргә қошуп әвәткәнлики, сот мәһкимисиниң мәзкүр әмәлдариниң 3 йилғичә тйәнҗин шәһиридә туруп, завуттики уйғур қизларни назарәт қилиш вә башқуруш вәзиписини өтәйдиғанлиқи хәвәр қилинған.

Хәвәрдә, атикәм исимлик бир қизниң һорунлуқ қилип яхши ишлимигәнликини, буни көргән сот әмәлдари луән зохуңниң қаттиқ хапа болуп, " бундақ һорунлуқ қилсаң, саңа өч болуп қалимән җуму" дәп тәһдит салғанлиқи қәйт қилинған.

Әмма хәвәрдә атикәмниң немә үчүн яхши ишлимигәнлик сәвәби оттуриға қоюлмиған болуп, чәтәлләрдики уйғур зиялий вә паалийәтчиләр, атикәмниң бәлки көп ишләп чарчап кәткәнликини яки болмиса кесәлгә гириптар болуп қалғанлиқ сәвәблиридин яхши ишлийәлмигән болуши мумкинликини оттуриға қоюшмақта.

Уйғур қизлар еғир бесим астида ишқа селинған

" Иқтисад гезити" ниң хәвиридә йәнә, ишчи қиз гүзәлнурниң еғир кесәлгә гириптар болуп, оператсийә қилинғанлиқи ашкариланған, охшашла униңму немә сәвәбтин кесәл болуп қалғанлиқи вә қандақ кесәл билән оператсийә қилинғанлиқи тилға елинмиған.

Истансимиз мухбирлириниң йеқинда уйғур ишчи қизлар билән бивастә елип барған сөһбитидинму, ишчи қизларниң гуруппа башлиқлири тәрипидин назарәт қилинидиғанлиқи, мухбирларниң суаллириға җаваб бериш әркинликидинму мәһрум қалдурулғанлиқи мәлум болған иди.

юқирида тилға елинған мәсилиләр һәққидә шәрқий түркистан учур мәркизи " хитай һөкүмити пәйзиват наһийисиниң хитай сотчисини тйәнҗин шәһиридә ишләватқан уйғур қизлирини назарәт қилишқа қошуп әвәткән" дегән темида мәхсус мулаһизә йүргүзүп, тийәнҗиндики завутта ишләватқан уйғур қизлириға бир хитай сотчисиниң, йәнә келип сот мәһкимиси дило турғузуш коллигийисиниң башлиқиниң мәсул қилип әвәтилгәнликиниң өзила, хитай өлкилиридә ишләватқан уйғур қизлириниң ечинишлиқ һалитини муназирә тәләп қилмайдиған һалда испатлап турмақта " дәп тәкитлиди.

Америкидики уйғур мәдәнийити тәтқиқатчиси доктор қаһар барат әпәнди зияритимизни қобул қилип, "тийәнҗиндики уйғур қизлириға бир хитай сотчисиниң мәсул қилип бәлгилиниши, уйғур қизлириға қаритилған сиясий бесимниң интайин күчлүк икәнликидин дерәк бериду" деди. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт