Ashkarilan'ghan sirlar ‏- yerkendin xitay ölkilirige yötkelgen qizlarning heqiqiy ehwali (2)

2007-06-21
Élxet
Pikir
Share
Print

Uyghur aptonom rayonining yeken nahiyisidin ichkirige yötkelgen bezi Uyghur qizlar yéqinda sendungdiki emgekke séliniwatqan zawuttin qéchip chiqip, "hüner öginish" we iqtisadi jehette "qeddini kötirish" teshwiqatining türtkiside ichkirige barghan Uyghur qizlar duch kéliwatqan ehwallarni pash qildi. Biz yerlik da'irilerning Uyghur qizlarni mejburiy halda ijtima'iy parawanliqi, ma'ash we jismaniy bixeterlik kapaliti shundaqla xizmet orni melum bolmighan jaylargha ewetishke tewekkülchilik qilishtiki seweblirini éniqlash meqsidide, asasi qatlam kadirlirini we yerlik déhqanlarni iz qoghlap ziyaret qiliwatimiz. Qéchip chiqqan Uyghur qizlar néme üchün yurtigha baralmaywatidu ?

Yerlik kadirlar qéchip chiqqan qizlarning ata - anisidin öch éliwatqanliqini ret qilsa, yerlik dihqanlar isyanchi qizlarning ata - anisi hashargha tutulghanliqini bildürmekte.

"Silerni bizge ötküzüp bergen kishige pulunglarni bérip bolghan, silerge ma'ash bérilmeydu"

Yeken nahiyisi bu yil 3 - ayda 213 neper Uyghur qizni xitay ölkiliride " hüner öginish " ke seperwerlik qilghanda, yeken nahiyisi kachung yézisining 8 - kenti mezkur kenttiki qizlarni bu sepke qoshqan bolup, bu 13 qizning ichidiki qurbannisa nurmemet téxi toluqsiz otturini püttürmigen, risalet turdimet bolsa emdila 15 yashtiki sékilek qizlar idi. Qéchip chiqqan qizlarning Uyghur aptonom rayonidiki tor betliride élan qilin'ghan ziyaret xatiriliride, yerlik da'iriler qizlarni ichkirige "öginish basquchida her éyigha 500 yüen, kéyinche 900 yüendin 1100 yüen'giche ish heqqi bérimiz we ma'ashinglar her ayda del waqtida bérilidu " dégen wediler bilen yolgha salghanliqini pash qilmaqta. Lékin sendungdiki yerkenlik qizlar ishleydighan fabrika, qizlarning deslepki ma'ashini ular 5 - ayning 28 - küni qéchip chiqqan'gha qeder bermigen.

Qéchip chiqqanlar ichidiki 8 - kentlik patigül yunus, "biz ulargha ma'ashimizning gépini qilsaq, biz silerni bizge ötküzüp bergen kishige pulunglarni bérip bolghan, silerge ma'ash bérilmeydu" dégen jawap alghanliqini bildürdi.

Aynisaning taghisi: " hökümetning bir terep qilishini kütiwatimiz "

Qéchip chiqqan qizlarning istiqbali nöwette yerkenlik qizlarning teqdirige köngül bölgüchilerni qiziqturuwatqan mesililerning biri. Biz qéchip chiqqan qizlar nimishqa yurtigha qaytalmaydu ? dégen mesilini sürüshtürüsh meqsitide yeken nahiyisi kachung yézisining 8- kentige téléfon qilghinimizda, kent bashliqi tursun barat su'allirimizgha jawab berdi.

Biz ichkiridin qachqan qizlarning ata - anisi nimishqa hashargha tutulghanliqini éniqlash meqsitide kachung yézisining su kadiri exed hoshurgha téléfon qilip, ata - anilarni hashargha tutushning qachqan qizlardin öch élish herikiti yaki emeslikini sorighan bolsaqmu, lékin u, su'alimizgha jawab bérelmeydighanliqini bildürdi.

Aynisa toxti, "hüner öginish," meqsitide ichkirige yötkelgen 8 - kentlik qizlarning biri. U, yéqinda kachungdiki ata - anisigha téléfon qilip, késel bolup qalghanliqini uqturghandin béri, toxtaxunlar a'ilisi qizining ehwalidin nahayiti qayghuruwatqan bolsimu, lékin qizini qayturup kélishke jür'et qilalmaywatqan a'ililerdindur. Aynisaning taghisi bu heqtiki ziyaritimizni qobul qilghanda " hökümetning bir terep qilishini kütiwatimiz " deydu.

Rayondiki Uyghurche tor betliride ichkiridiki ishlemchi qizlarning ehwali kishilerning könglini ghesh qilidighan xewerler bilen tolghanliqini bes munazire qiliwatqan bir peytte, xitay hökümitining rayondiki resmiy metbu'atliri ichkiridiki Uyghur qizlarning ata - bowilirigha oxshash yashashni xalimaydighanliqini we bu, ularning ichkirige kélishtiki meqsidi ikenlikini ilgiri sürdi. Bu metbu'atlar Uyghur qizlarni ishlitiwatqan bezi fabrikilarning öchke soyup sin'alghugha alghanliqini, qizlarni "bizge yaxshi qarawatidu" dégüzgenliki, lékin göshni qizlargha bermigenliktek köz boyamchiliqlar yüz bergenlikidin xewersizdek qilatti. (Erkin)

Pikirler (0)
Share
Toluq bet