Xitay hökümiti xitay ölkiliride oquydighan Uyghur oqughuchilar sanini hessilep köpeytmekchi

• Muxbirimiz eqidening bu heqtiki topluq melumati
• Download story audio

Xitayning Uyghur élidiki hökümet orgini, xitay ölkiliride oquydighan oqughuchilarni qobul qilish salmiqini yildin - yilgha zoraytmaqta. Tengritagh torining bügün élan qilghan xewiridin ashkarilinishiche, kéler yilidin bashlap xitay ölkiliridiki toluq ottura siniplirigha 5000 oqughuchi qobul qilinip, 2010 - yiligha barghanda xitay ölkiliridiki asasliqi Uyghurlardin terkip tapqan oqughuchilarning sani 20 minggha yetküzülidiken.

Xewerde, xitay hökümet xadimlirining sözi neqil keltürülgen bolup, uningda mundaq diyilgen: "az sanliq millet ixtisas igilirini yétishtürüsh qedimini tézlitish we az sanliq millet oqughuchilirining xenzu tilini öginish aktipliqini ilgiri sürüsh üchün, aptonom rayonimiz 2000 ‏- yilidin bashlap béyjing qatarliq 25 chong sheherdiki 35 nuqtiliq ottura mektepte "shinjang toluq ottura sinipliri" ni tesis qildi. Aptonom rayonluq partkom we xelq hökümiti bu xizmetlerge yüksek derijide ehmiyet bérip keldi. Aptonum rayon rehberliri köp qétim ichkiri ölkilerge bérip oqughuchilarni yoqlap turdi. Maliye qiyinchiliqi shara'itida 70 milyon yü'endin artuq pul chiqirip, oqughuchilarning öginish, turmush, dawalinish qatarliq ishlirigha ishletti. 2004 ‏- We 2005 ‏- yilliri 2000 din artuq oqughuchi mektep püttürüp, shu jaylarda aliy mektep imtihanigha qatnashti. Buning ichide 85 % oqughuchi nuqtiliq aliy mekteplerge qobul qilindi. Toluq kursqa qobul qilin'ghan oqughuchilarning nisbiti 90 % ke yetti".

Xewerde yene, bu yil xitay ölkiliridiki toluq ottura siniplargha 3990 oqughuchi qilin'ghan bolup, sinip tesis qilin'ghan sheher 26 ge, sinip tesis qilin'ghan mektep 45 yetkenliki bayan qilin'ghan. Xitay da'iriliri, weten sirtidiki Uyghur teshkilatlirining xitayning mezkur oqutush ma'aripigha qarita küchlük naraziliqlirigha qarimastin, bu xil oqutushni izchil dawamlashturush we burunqidin hessilep köpeytish toghrisida layihe we pilanlarni tüzmekte.

Dunya Uyghur qurultiyining bayanatchisi dilshat réshit ependining éytishiche, nöwette élip bériliwatqan Uyghur siyasiy dawasining muhim bir nuqtisi del Uyghur perzentlirini xitay ölkiliride oqutush mesilisi bolup, bu xitayning tep - tartmastin élip bériwatqan ochuq - ashkara asmiliyatsiye siyasitining bir usuli hésablinidiken.