Хитайда бала қуллар һәққидә чиққан йеңи нахша


2007-06-22
Share

Хитайниң сәнши өлкисидики бир көмүр канда балиларни қул қилиш вәқәси ашкариланғандин кейин, коммунист хитайниң дөләт кабинити омуми ахбарат чиқирип, вәқәни тәкшүрүш доклатини елан қилди вә бу һәқтә сәншиниң өлкә башлиқи йүюҗүнни өзини тәкшүрүшкә буйриди. Б б с ниң баян қилишичә, коммунист хитай һөкүмитиниң баш министири вен җябав дөләт кабинитида қилған сөзидә сәншидики көмүр кан вәқәсиниң характерини бекитип 'сәншидики қара көмүр кан вәқәси қанунсиз ишчи яллаш мәсилисила әмәс, бәлки адәм әткәсчилики мәсилиси' дәп җакарлиди. Шундақла, пүтүн мәмликәт буйичә йезиларда, канларда, карханиларда адәм яллаш җәһәттә чоң тәкшүрүш елип бериш һәққидә буйруқ чүшүрди.

Хәвәрдә баян қилинишичә, хитайниң учур вастилири 'сәншидә сақчилар бала қулларни қутқазди' дәп хәвәр қилғандин кейин, 400 нәпәр бала қулниң ата-анилири имза қоюп мәркәзгә әрз йоллап, бала қулларни давамлиқ қутқузуш лазимлиқини тәләп қилди. Әрз дә ейтилишичә, сәншидә паш қилинған бала қул вәқәси пәқәт пүтүн мәмликәттики 'бала қул делолириниң бирла парчиси', қисқиси, хенәндин сәншигә тутуп келингән 'бала қуллар' ниң һәммиси техи толуқ азад қилинғини йоқ, бәлки уларниң көпинчиси башқа җайға йөткәп кетилгән. Башқа өлкиләрдики бала қулларму һазир йөткәп юшурулмақта.

Һөкүмәткә әрз сунған ата-аниларниң қаришичә, 'пүтүн җуңгони қаттиқ силкиндүргән бала қул вәқәсини чуқум пүтүн мәмликәт буйичә интернеттә паш қилиш, җинайәтчиләрни җазалап, балиларни тәлтөкүс қутқузуш лазим'.

Сәншидә йүз бәргән вәқә инсанийәтни қул қилидиған 'җуңгочә сотсялизм'

'Бошүн тор бети'дә елан қилинған "коммунист һөкүмитиниң бандит билән сақчи бирләшкән қара җәмийити" дегән мулаһизидә ' җуңхуа мәмликәтлик баш ишчилар оюшмиси сәншигә хизмәт гурупписи әвәтип, вәқәни тәкшүрүп бир тәрәп қилғанлиқи яхши болди, буниң үнүмиму көрүлди, әмма мәлум бесимлар түпәйлидин һәл қилғуч нуқтиларға зәрбә берилмиди' дәп көрситилди.

Мулаһизидә баян қилинишичә, һөкүмәт вәқәниң характерини тоғра бекитәлмиди. Әмәлий пакитларға һөрмәт қилғанда, сәншидә йүз бәргән бу вәқәдә дөләт пуқралирини гөрөгә еливелиш, сетиш, қул қилиш, қириш, қоғдаш һәққи елиш, вәқәгә сүкүт қилиш, җинайәтчиләрни юшуруш, вәқәниң муһим пакитлири йоқ қилиш қатарлиқ еғир қануний мәсилиләр мәвҗут. Буниң өзи хәлқни қул қилидиған 'җуңгочә сотсялизм'.

Сәншидә балиларни қул қилиш вәқәлири 10 йилдин буян мәвҗут

'Бошүн тор бети'дә елан қилинған "коммунист һөкүмитиниң бандит билән сақчи бирләшкән қара җәмийити" дегән мулаһизидә баян қилинишичә, сәншидә балиларни қул қилиш вәқәлири 10 йилдин буян мәвҗут. Коммунист әмәлдарлири буни көрмигән яки сәзмигән әмәс, бәлки улар бу җәрянда 'үчкә вәкиллик қилиш', 'коммунист партийиниң илғарлиқини сақлаш' ваһаказа дегән җуңгочә сотсялизм нәзирийилирини өгинип , дөләтниң қанун органлирини қараңғу җәмийәткә айландуруш билән шуғулланди. Бу қетим җинайәтчиләрниң чоңлири қечип болғанда, андин һәр дәриҗилик парткомлар , партийиниң интизам тәкшүрүш комитетлири пәйда болуп, мәһәллиләрдики муавин башлиқларни җазалашқа башлиди.

Сақчиларниң бу қетимқи қулларни қутқузуш һәрикитидә бир қисим җинайәтчиләрниң қандақ қачқанлиқи, сақчиларниң қанчилик мудапиә қилиш һәққи алғанлиқи, қулларниң бир қисми қандақ қилип башқа җайларға йөткәп кетилгәнлики қатарлиқ мәсилиләр һазир кишиләр үчүн йәнә бир сир болуп қалди.

Йеңи иҗад қилинған 'җуңго балилири' дегән нахшни аңлидиңизму?

'Йеңи әсир журнили'да баян қилинишичә, сичуәндики җу йүнфең исимлик бир әма шаир, композитор йеқинда, сәншидики бала қуллар һәққидә бир нахша иҗад қилған. Рән йүнфең исимлик бир киши бу нахшиниң текистини торда елан қилған.

Шаир бу нахшида 1994 ‏- йили 12 ‏- айниң 8 ‏- күни қарамайда бир кулубта от һадисиси йүз бәргәндә, 'алди билән рәһбәрләр чиқип болғичә' отта көйүп өлгән 228 нәпәр өсмүрни әслигән; 2005 ‏- йили 6 ‏- айниң 10 ‏- күни саләнҗен базиридики бир мәктәпни кәлкүн басқанда, қутқузуш тәдбири қоллинилмиғанлиқитин өлүп кәткән 88 нәпәр яш ‏- өсмүрни әслигән; 2003 ‏- йили 6 ‏- айда, чеңду шәһиридә сақчилар бир анини хероин чәкти дәп бир һәптә қамап қоюп, өйдә ачлиқтин өлгәндә 3 яшлиқ қизни әслигән. Бу шаир иҗад қилған 'җуңго балилири' дегән нахша текистидә " қарамай балилири болмаңлар, анаңларниң йүриги йерилип кетиду.

Саләнҗенниң балилири болмаңлар, анаңларму тунҗуқуп қалиду. Чеңдулуқниң балилири болмаңлар, сақчилар анаңларни әмгүзмәйду. Хенән балилири болмаңлар, әйдиз вируси қениңлардин кәтмәйду. Сәнши балилири болмаңлар, атаңларниму көмүр қилип қалайду " дәп йезилған. Бу нахшиниң нәқирати "җуңго балилири болмаңлар, коммунист әмәлдарлар йәп кетиду, ғалча җуңголуқниң балиси болмаңлар, хоҗайинлири сетиветиду ' дегән мисралар бар. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт