خىتاينىڭ ئۇچۇر - ەشرىيات مەھكىمىسى 1 - ئاينىڭ 4 - كۈنى ئۇقتۇرۇش چىقىرىپ 'شەھۋانىي ئۈن-سىن مەھسۇلاتلىرىنى تەرتىپكە سېلىش' دەپ ئاتالغان ئۈچ ئايلىق ھەرىكەت باشلايدىغانلىقىنى ئېلان قىلغان ئىدى.
ب ب س نىڭ بايان قىلىنىشىچە، ئەمەلىيەتتە خىتاي ھۆكۈمىتى پۈتۈن مەملىكەتتە بۇنداق بىر ھەرىكەت قوزغاش ھەققىدىكى ئۇقتۇرۇشىنى 2007 - يىلى 12 - ئاينىڭ 25 - كۈنى تارقاتقان ئىكەن. خىتاي ھۆكۈمىتى يېڭى يىلدا قوزغىغان بۇ ھەرىكەتنى ئۈچ باسقۇچقا بۆلۈپ ئېلىپ بېرىشنى، يەنى 1 - ئاينىڭ 15 - كۈنىگىچە پەسكەش شەھۋانىي ئۈن-سىن مەھسۇلاتلىرىنى تەكشۈرۈشنى؛ 1 - ئاينىڭ 31 - كۈنىگىچە تەكشۈرۈلگەن ئەھۋالنى مەركەزگە يوللاشنى؛ 2 - ئاينىڭ 1 - كۈنىدىن 3 - ئاينىڭ 10 - كۈنىگىچە بولسا تەكشۈرۈپ تېپىلغان پەسكەش ئۈن-سىن مەھسۇلاتلىرىنى ئىشلەپچىقارغان كىشىلەرنى ۋە ئورۇنلارنى جازالاشنى ئورۇنلاشتۇرغان.
ئۇيغۇرلارنىڭ ئىنكاس قىلىشىچە، خىتاي ھۆكۈمىتى ھازىر ئېلىپ بېرىۋاتقان 'شەھۋانىي ئۈن-سىن مەھسۇلاتلىرىنى تەرتىپكە سېلىش' دېگەن ھەرىكەتنىڭ ئۇيغۇر يۇرتلىرىدا ئىجرا قىلىنىشى قۇرئان ۋە باشقا دىنىي كىتابلارنى يىغىش، قارشىلىق بىلدۈرگەن كىشىلەرنى تۇتۇپ جازالاش، شۇنداقلا ئۇيغۇرچە مىللىي ئەنئەنىلەرنى چەكلەشتىن ئىبارەت بولماقتا.
ھازىر نورۋىگىيىدە تۇرۇۋاتقان ئۆمەر ھاجىمنىڭ بايان قىلىشىچە، توقسۇ ناھىيىسىدە قۇربان ھېيتىنىڭ ئالدى -كەينىدە، خىتاي ھۆكۈمىتى يېزىلارغا ئەۋەتكەن 'ئونبېشى'، 'يۈز بېشى'، 'مىڭ بېشى' دەپ ئاتىلىدىغان 'يېڭى ئەمەلدارلار' ئۇيغۇرلارنىڭ ئۆيلىرىدىن قۇرئان ۋە دىنغا ئائىت كىتابلارنى يىغىپ كېتىشكە، نارازلىق بىلدۈرگەنلەرنى تۇتۇپ كېتىشكە باشلىغان.
نورۋىگىيىدە تۇرۇۋاتقان ئۆمەر ھاجىمنىڭ بايان قىلىشىچە، خىتاي ھۆكۈمىتى 'ئونبېشى'، 'يۈز بېشى'، 'مىڭ بېشى' دەپ يېزىلارغا ئەۋەتكەن 'يېڭى ئەمەلدارلار' ئۇيغۇرلارغا ھېيتلاشماسلىق، جامائەت بولۇپ توپلاشماسلىق، مىللىيچە توي مۇراسىمى ئۆتكۈزمەسلىكنى جاكارلىغان.
نورۋىگىيىدە تۇرۇۋاتقان ئۆمەر ھاجىمنىڭ بايان قىلىشىچە، مۇشۇ ھەرىكەت باشلانغاندىن كېيىن، تۈرمىدە يېتىۋاتقان ئۇيغۇر مەھبۇسلارمۇ قاتتىق تەن جازاسىغا ئۇچرىغان.
ھازىر نورۋىگىيىدە تۇرۇۋاتقان ئۆمەر ھاجىمنىڭ بايان قىلىشىچە، خىتاي ھۆكۈمىتى ئۇيغۇر قىزلىرىنى ئىچكىرىگە يۆتكەش ھەققىدىمۇ يېزا كادىرلىرىغا يەنە تېخىمۇ كونكرىت ۋە ئېغىر ۋەزىپە قويغان. (ۋەلى)