Д у қ 2- нөвәтлик иҗраийә комитети йиғини ечилди

2007-07-27
Елхәт
Пикир
Share
Принт

2 - Нөвәтлик д у қ ниң 1 - қетимлиқ иҗраийә комитети йиғини 5 - айда голландийиниң дәнһаг шәһридә чақирилған иди. 7 - Айниң 22 - күни германийиниң һамбург шәһридә сиясий паалийәтлирини ахирлаштуруп, мюнхен шәһригә йетип кәлгән д у қ рәиси, уйғур миллий һәрикитиниң рәһбири рабийә қадир ханимниң тәшәббуси билән, д у қ ниң баш шитабида 26 - июл күни кәч саәт 6 билән 2 - нөвәтлик иҗраийә комитети йиғини җидди чақирилди.

Муддәттин бурун чақирилған бу қетимқи пәвқуладдә йиғинға америка вә явропа әллиридики д у қ иҗраийә комитети тәркибидики һәр қайси бөлүмләрниң мәсуллири вә „олимпиккә қарши комитет" ниң әзалири иштирак қилди.

Бу қетимқи йиғинниң 1 - күни қолға кәлтүргән нәтиҗиләрдин мәмнун болған рабийә қадир ханим өз пикрини изһар қилип өтти. Рабийә қадир ханим йәнә бу йиғинда хитай һөкүмитиниң д у қ ға болған бузғунчилиқ һәрикәтлиригә үнүмлүк хатимә бәргәнликини алаһидә тәкитләп өтти. Йиғинниң 1 - күнидә, дуқ иҗраийә комитетиниң қурулмисида ислаһат елип берилди.

Һазирға қәдәр һәр хил сәвәбләр билән қурултай хизмәтлириниң сиртида қалған вәтәнпәрвәр затлар қурултай тәркибигә таллап киргүзүлди вә тегишлик вәзипиләргә тәйинләнди. Сабиқ шәрқий түркистан (уйғурстан) миллий қурултийиниң рәиси әнвәрҗан әпәнди д у қ иҗраийә комитетиниң қурултай баш шитабидики толуқ һоқуқлуқ вәкаләтчиликигә, явропа шәрқий түркистан бирлики тәшкилатиниң муавин рәиси аблимит турсун әпәнди дуқ фондиниң ярдәмчи мәсуллиқиға вә йәнә онлиған зиялийлар қурултай иҗраийә комитети әзалиқиға толуқлап сайланди. Бу қетимқи йиғинда йәнә америка, канада, шветсийә, норвегийә қатарлиқ көплигән дөләтләрдә қурултай вәкаләтчилирини вә иҗраийә комитети хадимлирини көпәйтип тәйинләш һәққидә қарар елинди.

Рабийә қадир ханим йиғинниң ахирида йиғин әһлини, хитай һөкүмити вә униң җасуслириниң д у қ ға болған суйиқәстлик һәрикәтлиридин һәр заман һушяр болушқа чақирди вә һәр бир вәкилдин өз зиммисигә алған вәзипиләрни биҗанидил орунлашни тәләп қилди.(Әкрәм)

Пикирләр (0)
Share
Толуқ бәт