D u q 2- nöwetlik ijra'iye komitéti yighini échildi

2007-07-27
Élxet
Pikir
Share
Print

2 - Nöwetlik d u q ning 1 - qétimliq ijra'iye komitéti yighini 5 - ayda gollandiyining denhag shehride chaqirilghan idi. 7 - Ayning 22 - küni gérmaniyining hamburg shehride siyasiy pa'aliyetlirini axirlashturup, myunxén shehrige yétip kelgen d u q re'isi, Uyghur milliy herikitining rehbiri rabiye qadir xanimning teshebbusi bilen, d u q ning bash shitabida 26 - iyul küni kech sa'et 6 bilen 2 - nöwetlik ijra'iye komitéti yighini jiddi chaqirildi.

Muddettin burun chaqirilghan bu qétimqi pewquladde yighin'gha amérika we yawropa elliridiki d u q ijra'iye komitéti terkibidiki her qaysi bölümlerning mes'ulliri we „olimpikke qarshi komitét" ning ezaliri ishtirak qildi.

Bu qétimqi yighinning 1 - küni qolgha keltürgen netijilerdin memnun bolghan rabiye qadir xanim öz pikrini izhar qilip ötti. Rabiye qadir xanim yene bu yighinda xitay hökümitining d u q gha bolghan buzghunchiliq heriketlirige ünümlük xatime bergenlikini alahide tekitlep ötti. Yighinning 1 - künide, duq ijra'iye komitétining qurulmisida islahat élip bérildi.

Hazirgha qeder her xil sewebler bilen qurultay xizmetlirining sirtida qalghan wetenperwer zatlar qurultay terkibige tallap kirgüzüldi we tégishlik wezipilerge teyinlendi. Sabiq sherqiy türkistan (Uyghurstan) milliy qurultiyining re'isi enwerjan ependi d u q ijra'iye komitétining qurultay bash shitabidiki toluq hoquqluq wekaletchilikige, yawropa sherqiy türkistan birliki teshkilatining mu'awin re'isi ablimit tursun ependi duq fondining yardemchi mes'ulliqigha we yene onlighan ziyaliylar qurultay ijra'iye komitéti ezaliqigha toluqlap saylandi. Bu qétimqi yighinda yene amérika, kanada, shwétsiye, norwégiye qatarliq köpligen döletlerde qurultay wekaletchilirini we ijra'iye komitéti xadimlirini köpeytip teyinlesh heqqide qarar élindi.

Rabiye qadir xanim yighinning axirida yighin ehlini, xitay hökümiti we uning jasuslirining d u q gha bolghan suyiqestlik heriketliridin her zaman hushyar bolushqa chaqirdi we her bir wekildin öz zimmisige alghan wezipilerni bijanidil orunlashni telep qildi.(Ekrem)

Pikirler (0)
Share
Toluq bet