Wang léchu'en qatarliq kishiler Uyghurlargha wekillik qilmaydu

• Muxbirimiz welining bu heqtiki toluq melumati
• Download story audio

Xitay uchur wastilirining xewer qilishiche, béyjingde her yili bir qétim échilidighan ikki chong yighin buyil 3 ‏- ayning 5 ‏- küni bashlinidiken. Mushundaq bir peytte, shinjang xewer torida ashkarilinishiche, xitay partiye merkizi komitét siyasiy byurosining ezasi wang léchu'en Uyghur aptonom rayonidin 60 neper wekilni bashlap béyjingge méngish aldida ulargha ramka belgilep 'bu qétimqi ikki chong yighinda 11 ‏- besh yilliq pilan layihisi tekshürüp körilidu, biz wekiller yighinda muqimliqni saqlap sotsiyalizm qurush üchün chare- tedbir teqdim qilishimiz lazim' dégen. Bu heqte dunya Uyghur qurultiyining bayanatchisi dilshat réshit ependi wang léchu'en qatarliq aptonom rayun wekillirining wekillik salahiti qatarliq mesililerni tehlil qildi.

Ikki chong yighin bashlinish aldida teshwiqat ministirliki 20 türlük cheklime chiqarghan

Béyjingde her yili bir qétim échilidighan ikki chong yighin bashlinish aldida turghanda, xitay kommunist partiye merkizi komitétining teshwiqat ministirliki metbu'atlarda némini ashkarilimasliq heqqide ramka belgilep, 50 yildin buyanqi ongchilargha qarshi turush herikitige da'ir weqelerni ashkarilimasliq, xitay -yapon munasiwitige da'ir weqelerni ashkarilimasliq, jonggo armiyisining qoral-yaraghlirini maxtimasliq, kishilik hoquqni qoghdash ehwalini we jonggoning siyasiy -qanun organlirining ichki ehwalini ashkarilimasliq qatarliq 20 türlük cheklime chiqarghan. Dilshat rishit ependining qarishiche, xitay hökümiti bu belgilimilerni muhim tarixi mesililerdin özini qachurush üchün bundaq belgilimilerni chiqarghan.

Tyen'enmén aniliri teshkilati jiddi heriket qiliwatqanda, wang léchu'en ayallarni sotsiyalizim üchün özini béghishlashqa chaqirghan

Béyjingde her yili bir qétim échilidighan ikki chong yighin bashlinish aldida, 1989 ‏- yili béyjingdiki tyen'enmén meydanida baliliri öltürülgen anilar teshkilati xitay rehberlirige uchuq xet yézip, bu weqeni ashkarilashqa qistawatqanda, wang léchu'en Uyghur aptonom rayonida ayal wekillerge söhbet yighini échip, ularni sotsiyalizm üchün özini béghishlashqa chaqirghan. Dilshat réshit ependining qarishiche, xitay hökümitining xitaylar bilen Uyghurlargha qiliwatqan mu'amilide perq bar. Wang léchu'enning ayal wekillerge qilghan chaqiriqi Uyghur aptonom rayonida xitaygha qarshiliq bildürgen yash ewladlarning ata-anilirigha qarita téximu qattiq basturush élip baridighanliqidin dérek béridu. (Weli)