Уйғур аптоном районида әҗәллик қуш зуками байқалди


2005-06-09
Share

Хитай һөкүмити пәйшәнбә күни уйғур аптоном райониниң чөчәк шәһиридики бир ғаз фермисида, қуш зукам вироси байқалғанлиқини елан қилди. Бу йеқинқи бир ай ичидә әҗәллик қуш зукам вироси тарқилиш вәқәсиниң хитайда 2 - қетим байқилиши болуп һесаблиниду.

Хитай йеза игилик министирлиқи өткән айда уйғур аптоном райониға чегридаш чиңхәйдә қуш зукам вироси байқалғанлиқини җакарлап, 1000 ларчә қушниң мәзкур зукам виросида өлгәнликини елан қилған.

Вирос байқалған җай қамал қилинди

Хитай йеза игилик министирлиқиниң ашкарилишичә, чөчәктики ғаз фермисида әҗәллик зукам вироси билән юқумланған ғазларниң сани 1500 әтрапида болуп, буниң 406 си өлгән. 1042 Сида кесәллик аламити байқалған.

Әҗәллик зукам виросиниң кеңийип кетиш хәвпидин әнсиригән даириләр, мәзкур фермидики 13000 данә ғазни өлтүрүвәткән. Хитай йеза игилик министирлиқиниң баянатчисиниң билдүрүшичә, йәрлик даириләр кесәллик байқалған җайни қамал қилип, дезинфиксийиләш елип барған шундақла әтраптики өй һайванлириға кесәлниң алдини елиш ваксинилирини урған.

Өй һайванлири базири тақалған

Биз мушундақ бир вәқәниң барлиқини аңлидуқ, һазир чөчәктики өй һайванлири базири тақиветилди.

Чөчәктики бир хитай тиҗарәтчи хотун, даириләрниң чөчәк шәһиридики өй һайванлирини сетиш базирини тақиғанлиқини билдүрди. У телефон зияритимизни қобул қилип, у бу һәқтики суалимизға " биз мушундақ бир вәқәниң барлиқини аңлидуқ, һазир чөчәктики өй һайванлири базири тақиветилди," дәп җаваб бәрди. Әмма униң тәкитлишичә, бу хәвәрни у чөчәктики гезит вә радио - телевизорларда аңлимиған.

Хитай дөләтлик қуш зукам вироси тәҗрибиханисиниң ашкарилишичә, уйғур аптоном райониниң чөчәк шәһиридики ғаз фермисида өй һайванлириниң өлүш вәқәсини H5N1 типлиқ әҗәллик қуш қукам вироси кәлтүрүп чиқарған болуп, даириләр юқумлиниш вәқәсини дуня сәһийә тәшкилати, б д т ниң зираәт вә йеза игилик оргини шундақла хоңкоң вә тәйвәндики мунасвиәтлик органларға уқтурған.

Һазирғичә адәмләрдә байқалмиди

Чөчәк вилайәтлик кесәлликләрниң алдини елиш понкитидики бир хадими, әҗәллик қуш зуками чөчәк шәһириниң 30 километир нерисидики шәрқ шамили коммунасида байқалғанлиқини билдүрди.

Телефон зияритимизни қобул қилған сәһийә хадимиң ашкарилишичә, даириләр кесәлликләрниң алдини елиш понкитидики бир гуруппа хадимни вәқә йүз бәргән җайға әвәткән. У хадим йәнә, һазирға қәдәр қуш зукам виросиниң адәмләргә юқуш әһвали байқалмиғанлиқини билдүрди. Әмма кесәллик әһвали тәкшүрүш гурупписи қайтип кәлгәндин кейин мәлум болидикән.

Хоңкоңға өй һайванлири експорт қилишни тохтатти

Бу хәвәр районда чиқидиған уйғурчә вә хитай тилидики гезит - жорнал вә мәтбуатларда пәйшәнбә күнигә қәдәр елан қилинмиди. Әмма бу арида хитай һөкүмити уйғур аптоном районидин хоңкоңға ғаз қатарлиқ өй қушлири експорт қилишни тохтатқан.

Хоңкоң сәһийә параванлиқ вә йимәк - ичмәкләр идариси баянатчисиниң тәкитлишичә, хитай йеза игилик министирлиқи чөчәктики ғаз фермисида әҗәллик қуш зукам вироси байқалғанлиқини хоңкоң даирилиригә уқтурған. Әмма хоңкоң сәһийә параванлиқ вә йимәк - ичмәк идарисидики даириләр, хоңкоң, уйғур аптоном районидин өй қушлири импорт қилмайдиғанлиқи үчүн, чөчәктики қуш зукам вироси хоңкоңниң аммиви сәһийә ишлириға тәсир көрсәтмәйдиғанлиқини билдүрди.

Әҗәллик қуш зукам вироси, өткән айниң башлири чиңхәйниң гаңса қатарлиқ җайлирида байқалған иди. Хитай йеза игилик министирлиқи, 5 - айниң 26 - күни мәзкур зукамда өлгән қушларниң 1000 дин ашидиғанлиқини елан қилған. Әмма хитай һөкүмити чиңхәй билән чөчәктики қуш зукам виросини бир- бири билән мунасивәтсиз айрим - айрим вәқә, дәп көрсәтмәктә. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт