Uyghur aptonom rayonida ejellik qush zukami bayqaldi

• Muxbirimiz erkinning bu heqtiki melumati
• Download story audio

Xitay hökümiti peyshenbe küni Uyghur aptonom rayonining chöchek shehiridiki bir ghaz férmisida, qush zukam wirosi bayqalghanliqini élan qildi. Bu yéqinqi bir ay ichide ejellik qush zukam wirosi tarqilish weqesining xitayda 2 - qétim bayqilishi bolup hésablinidu.

Xitay yéza igilik ministirliqi ötken ayda Uyghur aptonom rayonigha chégridash chingxeyde qush zukam wirosi bayqalghanliqini jakarlap, 1000 larche qushning mezkur zukam wirosida ölgenlikini élan qilghan.

Wiros bayqalghan jay qamal qilindi

Xitay yéza igilik ministirliqining ashkarilishiche, chöchektiki ghaz férmisida ejellik zukam wirosi bilen yuqumlan'ghan ghazlarning sani 1500 etrapida bolup, buning 406 si ölgen. 1042 Sida késellik alamiti bayqalghan.

Ejellik zukam wirosining kéngiyip kétish xewpidin ensirigen da'iriler, mezkur férmidiki 13000 dane ghazni öltürüwetken. Xitay yéza igilik ministirliqining bayanatchisining bildürüshiche, yerlik da'iriler késellik bayqalghan jayni qamal qilip, dézinfiksiyilesh élip barghan shundaqla etraptiki öy haywanlirigha késelning aldini élish waksinilirini urghan.

Öy haywanliri baziri taqalghan

Biz mushundaq bir weqening barliqini angliduq, hazir chöchektiki öy haywanliri baziri taqiwétildi.

Chöchektiki bir xitay tijaretchi xotun, da'irilerning chöchek shehiridiki öy haywanlirini sétish bazirini taqighanliqini bildürdi. U téléfon ziyaritimizni qobul qilip, u bu heqtiki su'alimizgha " biz mushundaq bir weqening barliqini angliduq, hazir chöchektiki öy haywanliri baziri taqiwétildi," dep jawab berdi. Emma uning tekitlishiche, bu xewerni u chöchektiki gézit we radi'o - téléwizorlarda anglimighan.

Xitay döletlik qush zukam wirosi tejribixanisining ashkarilishiche, Uyghur aptonom rayonining chöchek shehiridiki ghaz férmisida öy haywanlirining ölüsh weqesini H5N1 tipliq ejellik qush qukam wirosi keltürüp chiqarghan bolup, da'iriler yuqumlinish weqesini dunya sehiye teshkilati, b d t ning zira'et we yéza igilik orgini shundaqla xongkong we teywendiki munaswi'etlik organlargha uqturghan.

Hazirghiche ademlerde bayqalmidi

Chöchek wilayetlik késelliklerning aldini élish ponkitidiki bir xadimi, ejellik qush zukami chöchek shehirining 30 kilométir nérisidiki sherq shamili kommunasida bayqalghanliqini bildürdi.

Téléfon ziyaritimizni qobul qilghan sehiye xadiming ashkarilishiche, da'iriler késelliklerning aldini élish ponkitidiki bir guruppa xadimni weqe yüz bergen jaygha ewetken. U xadim yene, hazirgha qeder qush zukam wirosining ademlerge yuqush ehwali bayqalmighanliqini bildürdi. Emma késellik ehwali tekshürüsh guruppisi qaytip kelgendin kéyin melum bolidiken.

Xongkonggha öy haywanliri éksport qilishni toxtatti

Bu xewer rayonda chiqidighan Uyghurche we xitay tilidiki gézit - zhornal we metbu'atlarda peyshenbe künige qeder élan qilinmidi. Emma bu arida xitay hökümiti Uyghur aptonom rayonidin xongkonggha ghaz qatarliq öy qushliri éksport qilishni toxtatqan.

Xongkong sehiye parawanliq we yimek - ichmekler idarisi bayanatchisining tekitlishiche, xitay yéza igilik ministirliqi chöchektiki ghaz férmisida ejellik qush zukam wirosi bayqalghanliqini xongkong da'irilirige uqturghan. Emma xongkong sehiye parawanliq we yimek - ichmek idarisidiki da'iriler, xongkong, Uyghur aptonom rayonidin öy qushliri import qilmaydighanliqi üchün, chöchektiki qush zukam wirosi xongkongning ammiwi sehiye ishlirigha tesir körsetmeydighanliqini bildürdi.

Ejellik qush zukam wirosi, ötken ayning bashliri chingxeyning gangsa qatarliq jaylirida bayqalghan idi. Xitay yéza igilik ministirliqi, 5 - ayning 26 - küni mezkur zukamda ölgen qushlarning 1000 din ashidighanliqini élan qilghan. Emma xitay hökümiti chingxey bilen chöchektiki qush zukam wirosini bir- biri bilen munasiwetsiz ayrim - ayrim weqe, dep körsetmekte. (Erkin)