Хитай һөкүмити "амантидин" ни өй қушлириға ишлитишкә тәрғип қилғанлиқини рәт қилди


2005-06-22
Share

Хитай йеза игилик министирлиқи сәйшәнбә күни уйғур аптоном райониниң санҗи областидики бир бақмичилиқ фермисида әҗәллик қуш зукам вируси байқалғанлиқини елан қилип, даириләрниң бақмичиларни адәмләргә ишлитидиған зукам вирусиға қарши туруш дорисини өй қушлириға ишлитишкә тәрғип қилғанлиқини рәт қилди.

Дуня сәһийә тәшкилатидики мутәхәссисләрниң агаһландурушичә, адәмләргә ишлитидиған зукам вирусиға қарши туруш дориси "амантидин" ни өй қушлириға ишлитиш, һайван бәдинидики вирусниң бәрдашлиқ бериш күчини ашуриветидикән.

Қуш зукам вируси адәмләргә юқмиған

Санҗида байқалған қуш зукам вируси хитай бойичә икки ай ичидә 3 - қетим, уйғур аптоном районида 2 - қетим байқилиши болуп һесаблиниду. Хитай һөкүмити тунҗи қетим чөчәктики бир бақмичилиқ фермисида байқалған мәзкур вирусниң контрол астиға елинғанлиқини җакарлиған. Б д т йимәк ичмәк вә зираәт оргининиң ашкарилишичә, санҗидики бақмичилиқ фермисида қуш зукам вируси билән юқумланған ғаз вә өдәкләр сани 128 болуп, H5N1 типлиқ зукам вирусида өлгән өй қушлириниң сани 63 кә йетидикән.

Зукам вируси байқалған перма вә санҗи әтрапидики җайларда 1500 қуш өлтүрүветилгән. Б д т йимәк - ичмәк вә зираәт оргининиң хитайдики вәкили нурәддин монаниң билдүрүшичә, хитай йеза игилик министирлиқи санҗида байқалған вирусниң контрол қилинғанлиқини шундақла һазирға қәдәр адәмләр юқумлунуш әһвали байқалмиғанлиқини билдүргән.

Хитай һөкүмити "вашингтон почра гезити" ниң хәвирини рәт қилди

Хитайда диһқанларниң өй һайванлириға амантидинни ишләткәнлики тоғрисидики хәвәр, дуня сәһийә тәшкилатиниң диққитини қозғиди. Әмма хитай ташқи ишлар министирлиқи, "вашингтон почта гезити" ниң хитай һөкүмити бақмичиларни адәмләргә ишлитидиған зукам вирусиға қарши туруш дориси амантидинни, өй һайванлиридики қуш зукам вирусини давалаш үчүн ишлитишкә риғбәтләндүргән, дегән хәвири тоғра әмәс, дәп көрсәтти.

Хитай ташқи ишлар министирлиқиниң баянатчиси лю җйәнчав, "җоңго һөкүмити адәмләргә ишлитидиған зукам вирусиға қарши туруш дорисини, өй һайванлиридики қуш зукам вируси шундақла һайванлардики кесәлликкә қарши ишлитишкә йол қойған әмәс," дәп тәкитлигән. Әмма лю җйәнчавниң әскәртишичә, хитай һөкүмити вәқәни тәкшүрүдикән.

Амантидинни өй қушлириға ишлитиш хәлқара тиббий өлчәмгә хилап

Дуня сәһийә тәшкилати, хитайда деһқанларниң амантидинни өй қушлириға ишләткәнлики раст болуши мумкин, дәп гуман қилмақта. Хитай йеза игилик министирлиқидики әмәлдарлар, деһқанлар мәзкур дорини һайванларға оғрилиқчә ишләткән болуши мумкин, дәп көрсәтти. Мутәхәссисләрниң агаһландурушичә, аматидинни өй қушлириға ишләтсә адәмләргә кар қилмайдиған болуп қалидикән.

Дуня сәһийә тәшкилатиниң хитайдики вәкили хәнк бекидам, " бу йәрдики әндишимиз, әгәр адәмләргә ишлитидиған вирусқа қарши дорини һайванларға ишләтсә, һайванлардики вирус дора билән өзлишивалиду. Вақитниң өтүши билән бу адәмләргә кар қилмайдиған болуп қалиду," дәп көрсәтти.

Хитай д с т хадимлириниң уйғур илида тәкшүрүш елип беришини рәт қилған

Бу арида дуня сәһийә тәшкилатиниң бир тәкшүрүш өмики дүшәнбә күни хитайға йетип барған. Тәкшүрүш өмики хитайниң чиңхәй өлкисидики қуш зукам вируси байқалған районларда тәкшүрүш елип баридикән. "Валл стрәәт җоурнал" гезитиниң ашкарилишичә, бейҗиң һөкүмити тәкшүрүш өмикиниң уйғур аптоном районидики қуш зукам вируси байқалған районларда тәкшүрүш елип беришиға рухсәт қилмиған.

Дуня сәһийә тәшкилатиниң хитайдики баянатчиси рой вадийәниң тәкитлишичә, тәкшүрүш өмики чөчәк билән санҗидики қуш зукам вируси байқалған җайларда тәкшүрүш елип беришни үмид қилидикән. "Валл стрәәт җоурнал" хитай һөкүмитиниң уйғур аптоном районида тәкшүрүш елип беришкә немә үчүн йол қоймиғанлиқини чүшәндүрмигән. Әмма рой вадийә, уйғур аптоном районида тәкшүрүш елип бериш үмидини " даириләр тәлипимизни тезрақ тәстиқлиған болса яхши болатти," дәп тилға алди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт