Xitay hökümiti "amantidin" ni öy qushlirigha ishlitishke terghip qilghanliqini ret qildi


2005-06-22
Share

Xitay yéza igilik ministirliqi seyshenbe küni Uyghur aptonom rayonining sanji oblastidiki bir baqmichiliq férmisida ejellik qush zukam wirusi bayqalghanliqini élan qilip, da'irilerning baqmichilarni ademlerge ishlitidighan zukam wirusigha qarshi turush dorisini öy qushlirigha ishlitishke terghip qilghanliqini ret qildi.

Dunya sehiye teshkilatidiki mutexessislerning agahlandurushiche, ademlerge ishlitidighan zukam wirusigha qarshi turush dorisi "amantidin" ni öy qushlirigha ishlitish, haywan bedinidiki wirusning berdashliq bérish küchini ashuriwétidiken.

Qush zukam wirusi ademlerge yuqmighan

Sanjida bayqalghan qush zukam wirusi xitay boyiche ikki ay ichide 3 - qétim, Uyghur aptonom rayonida 2 - qétim bayqilishi bolup hésablinidu. Xitay hökümiti tunji qétim chöchektiki bir baqmichiliq férmisida bayqalghan mezkur wirusning kontrol astigha élin'ghanliqini jakarlighan. B d t yimek ichmek we zira'et orginining ashkarilishiche, sanjidiki baqmichiliq férmisida qush zukam wirusi bilen yuqumlan'ghan ghaz we ödekler sani 128 bolup, H5N1 tipliq zukam wirusida ölgen öy qushlirining sani 63 ke yétidiken.

Zukam wirusi bayqalghan pérma we sanji etrapidiki jaylarda 1500 qush öltürüwétilgen. B d t yimek - ichmek we zira'et orginining xitaydiki wekili nureddin monaning bildürüshiche, xitay yéza igilik ministirliqi sanjida bayqalghan wirusning kontrol qilin'ghanliqini shundaqla hazirgha qeder ademler yuqumlunush ehwali bayqalmighanliqini bildürgen.

Xitay hökümiti "washin'gton pochra géziti" ning xewirini ret qildi

Xitayda dihqanlarning öy haywanlirigha amantidinni ishletkenliki toghrisidiki xewer, dunya sehiye teshkilatining diqqitini qozghidi. Emma xitay tashqi ishlar ministirliqi, "washin'gton pochta géziti" ning xitay hökümiti baqmichilarni ademlerge ishlitidighan zukam wirusigha qarshi turush dorisi amantidinni, öy haywanliridiki qush zukam wirusini dawalash üchün ishlitishke righbetlendürgen, dégen xewiri toghra emes, dep körsetti.

Xitay tashqi ishlar ministirliqining bayanatchisi lyu jyenchaw, "jonggo hökümiti ademlerge ishlitidighan zukam wirusigha qarshi turush dorisini, öy haywanliridiki qush zukam wirusi shundaqla haywanlardiki késellikke qarshi ishlitishke yol qoyghan emes," dep tekitligen. Emma lyu jyenchawning eskertishiche, xitay hökümiti weqeni tekshürüdiken.

Amantidinni öy qushlirigha ishlitish xelq'ara tibbiy ölchemge xilap

Dunya sehiye teshkilati, xitayda déhqanlarning amantidinni öy qushlirigha ishletkenliki rast bolushi mumkin, dep guman qilmaqta. Xitay yéza igilik ministirliqidiki emeldarlar, déhqanlar mezkur dorini haywanlargha oghriliqche ishletken bolushi mumkin, dep körsetti. Mutexessislerning agahlandurushiche, amatidinni öy qushlirigha ishletse ademlerge kar qilmaydighan bolup qalidiken.

Dunya sehiye teshkilatining xitaydiki wekili xenk békidam, " bu yerdiki endishimiz, eger ademlerge ishlitidighan wirusqa qarshi dorini haywanlargha ishletse, haywanlardiki wirus dora bilen özlishiwalidu. Waqitning ötüshi bilen bu ademlerge kar qilmaydighan bolup qalidu," dep körsetti.

Xitay d s t xadimlirining Uyghur ilida tekshürüsh élip bérishini ret qilghan

Bu arida dunya sehiye teshkilatining bir tekshürüsh ömiki düshenbe küni xitaygha yétip barghan. Tekshürüsh ömiki xitayning chingxey ölkisidiki qush zukam wirusi bayqalghan rayonlarda tekshürüsh élip baridiken. "Wall stre'et jo'urnal" gézitining ashkarilishiche, béyjing hökümiti tekshürüsh ömikining Uyghur aptonom rayonidiki qush zukam wirusi bayqalghan rayonlarda tekshürüsh élip bérishigha ruxset qilmighan.

Dunya sehiye teshkilatining xitaydiki bayanatchisi roy wadiyening tekitlishiche, tekshürüsh ömiki chöchek bilen sanjidiki qush zukam wirusi bayqalghan jaylarda tekshürüsh élip bérishni ümid qilidiken. "Wall stre'et jo'urnal" xitay hökümitining Uyghur aptonom rayonida tekshürüsh élip bérishke néme üchün yol qoymighanliqini chüshendürmigen. Emma roy wadiye, Uyghur aptonom rayonida tekshürüsh élip bérish ümidini " da'iriler telipimizni tézraq testiqlighan bolsa yaxshi bolatti," dep tilgha aldi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet