Rabiye qadir xanim gollandiye pochta kort latariyisi üchün amet simwoli qilindi


2007-01-31
Share

Gollandiye xelq'ara kechürüm teshkilati teripidin neshir qilinidighan ayliq zhornalning bu yilliq tunji sanida gollandiyide 2007-yili tarqitilidighan milli pochta kart latariyisi tonushturulghan bolup, Uyghur milli herikitining rehbiri, ataqliq kishlik hoquq pa'aliyetchisi rabiye qadir xanim milli pochta kort latariyisining en'enisige köre, bu yilliq latariyining amet simwoli qilip tallan'ghan.

Gollandiyide yashaydighan ghalip ependining chüshendürüshiche "milli pochta kort latariyisi" gollandiyide tarqitilidighan, tarixi eng uzun we tesiri eng chong latariye oyuni bolup, buningda latariyining qiziqturush küchini ashurush üchün her yili xelq'arada belgilik tesiri bar hem öz ishida utuqqa érishken birer dangliq shexsni amet simwoli süpitide tallap alidiken.

Bu qétimqi latariyini gollandiye kechürüm teshkilati we bashqa 52 ammiwi teshkilatlar birliship tarqatqan bolup, omumi qimmiti 2 milyard yawru iken.

Kechürüm teshkilati tarqatqan zhornalning pochta kort latariyisini tonushturghan mexsus sehipisige rabiye qadir xanimning doppa kiyip turghan jiddi we jesur qiyapettiki yoghan bir parche süriti bérilgen, uning astigha chong herpler bilen "bu xanimda bir amet bar, sizdimu bir amet bar" dégen sözler yézilghan, undin kéyin milli pochta kort latariyisining xelq'ara kechürüm teshkilati, kishlik hoquq ishliri we rabiye qadir xanim bilen bolghan baghlinishi tonushturulghan.

Buningda aldi bilen pochta kort latariyisidin qilin'ghan kirimning asasliqi dunyadiki kishlik hoquqni yaxshilash xizmetliri hemde kishlik hoquq üchün küreshküchi teshkilat we shexsler üchün serp qilinidighanliqi éytilghan, andin kéyin rabiye qadir xanimni tonushturup, uning Uyghur xelqining heq-hoquqlirini qoghdash yolida xitay hökümiti teripidin naheq jazalinip alte yil türmide yatqanliqi, 2005 –yili xelq'araninmg küchlük bésimi astida xitay türmisidin azat bolghanlighini, hazir bolsa tonulghan kishlik hoquq pa'aliyetchisi süpitide amérikida aktip kishlik hoquq xizmiti bilen shughulliniwatqanliqi sözlen'gen, axirda rabiye qadir xanimning xitay türmisidin azat bolishi we bügünkidek tonulghan kishlik hoquq pa'aliyetchisige aylinishida xelq'ara kechürüm teshkilatining oynighan roli alahide tilgha élin'ghan, shuningdek bu yilliq latariye oyunliridin kirgen kirimningmu yene oxshashla kishlik hoquq ishliri üchün ishlitilidighanlighi ilgiri sürülgen.

Ghalip ependining qarishiche, rabiye qadir xanimning bu yilliq pochta kart latariyisining amet simwoli süpitide tallap élinishi Uyghurlar üchün ehmiyetlik bir weqe bolup, bu mahiyette Uyghur mesilisining we Uyghur milli herikitining rehbiri rabiye qadir xanimning gollandiye we xelq'arada keng diqqet étibargha we qollashqa érishiwatqanliqining alamiti iken (abdusemet)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet