Xelq'ara 7 teshkilat xitayning rabiye qadirni eyibligen bayanatini ret qildi

• Muxbirimiz qanatning bu heqtiki toluq melumati
• Download story audio

Rabiye qadir xanim

Xelq'ara rafto kishilik hoquq teshkilati, xitayda kishilik hoquq teshkilati, kishilik hoquq sariyi fondi, tinchliq we adalet teshkilati, xeter astidiki milletlerni qoghdash teshkilati we wakaletsiz milletler teshkilati qatarliq 7 xelq'ara teshkilat teripidin 16‏-mart küni élan qilin'ghan birleshme bayanatta, xitay hökümitining Uyghur milliy herikitining rehbiri rabiye qadir xanim we dunya Uyghur qurulitiyigha qaratqan "bölgünchi" we "térrorchi" dégen'ge oxshash eyibleshliri ret qilin'ghan.

Birleshme bayanatta shundaqla "xitay hökümitining bolupmu xelq'ara térrorchiliqqa qarshi urush yolgha qoyulghandin buyan, sherqiy türkistandiki kishilik hoquq depsendichiliklirige qarshi élip bériliwatqan naraziliq pa'aliyetlirini bölgünchilik we térrorluq heriketliri dep körsitishke tirishiwatqanliqi hemmimizge ayan bir mesile " déyilgen.

Xitay hökümitining eyibleshliri

Köpchilikke melum bolghandek, 6‏- mart küni xitayning yawropa ittipaqidiki bash elchisi rabiye qadir xanim we dunya Uyghur qurultiyi heqqide bir bayanat élan qilip, ularni térrorchilar bilen munasiwiti bar dep, eyibligen idi.

Xitay hökümitining bayanatida, xitay hökümiti teripidin térrorchi teshkilatlar tizimlikige kirgüzülgen, sherqiy türkistan azadliq teshkilati we dunya Uyghur yashliri qurultiyi pa'aliyetchilirining dunya Uyghur qurultiyining asasliq orunlirida wezipe alghanliqi ilgiri sürülgen.

Rabiye qadir xanim we dunya Uyghur qurulitiyining xelq'ara jama'etning qollishigha érishish üchün nöwette kishilik hoquq we démokratiyni özlirige shu'ar qiliwalghanliqini tekitligen xitay hökümitining bayanatida mundaq déyilgen:

"Ularning özining tor bétige asaslan'ghanda, ‘dunya Uyghur qurultiyining meqsiti, démokratik prinsiplar asasida, tinch wastilar arqiliq Uyghur xelqining erkinliki, démokratiyisi, insan heq-hoquqliri we sherqiy türkistanning musteqil siyasiy kelgüsi üchün köresh qilidu’. Bolupmu, mushu organ 2005 ‏- yili neshir qilghan ‘myunxén xitabnamisi’ din we rehberlirining bayanatliridin, dunya Uyghur qurulitiyi meqsidining ‘musteqil sherqiy türkistan qurush’ ikenlikini körüwalghili bolidu ".

Xitay hökümiti bayanatida, yawropa parlaménti we ezaliridin, rabiye xanim we dunya Uyghur qurultiyi wekilliri bilen körüshmesliki we ularni qobul qilmasliqi telep qilin'ghan. Bayanatta shundaqla yawropa parlaménti ezalirining rabiye xanim we dunya Uyghur qurultiyi wekilliri bilen uchrishishi xitay- bilen yawropa ittipaqi otturisidiki munasiwetlerge selbiy tesir yetküzü'idighanliqi alahide eskertilgen.

Insan heqliri teshkilatlirining inkasi

Lékin 16‏- mart küni rafto kishilik hoquq teshkilati, wekaletsiz milletler teshkilati, xitayda kishilik hoquq teshkilati, xeter astidiki milletlerni qoghdash teshkilati, kishilik hoquq sariyi fondi, chégrizh tinchliq we adalet teshkilati qatarliq 7 xelq'araliq kishilik hoquq teshkilati teripidin élan qilin'ghan birleshme bayanatta, "rabiye qadir xanim we dunya Uyghur qurultiyi, tinch yol we démokratik prinsiplar asasida xitay hökümitining Uyghurlargha qaratqan qattiq qol siyasitige naraziliq bildürüwatidu" déyilgen.

Xitay hökümitining b d t ning térrorchiliq toghrisidiki qarar layihisige qarshi chiqqanliqi tekitlgen'gen bayanatta, "térrorchiliqqa qarshi élip bériliwatqan küreshte, kishilik heq-hoquqliri dexli teruzge uchrimasliqi kérek. Rabiye xanimning riyasetchilikidiki dunya Uyghur qurultiyi we uning rehberliri mushu prinsiplarning emelge ishishi üchün pa'aliyet élip bériwatidu. Biz rabiye xanim rehberlikidiki dunya Uyghur qurultiyining pa'aliyetlirini qollap-quwetleshtin pexirlinimiz " déyilgen.

Xitay hökümitining rabiye xanim we dunya Uyghur qurultiyini térrorchiliqqa chétish herikitining alliqachan xelq'ara jama'et aldida meghlub bolghanliqi tekitlen'gen bayanatta," biz yawrupa parlaminti ezaliridin hemde yawrupa ittipaqi xadimliridin xitay da'irilirige kim bilen körüshüp, kim bilen uchrishish mesiliside özliri erkin qarar bireleydighanliqini, xitay‏- yawrupa ittipaqi munasiwetlirining bozulushigha yawrupa ittipaqi ezalirining siyasiy öktichiler bilen körüshüshi emes, xitay hökümitining kishilik hoquq we adalet ölchemlirige hörmet qilmighanliqining seweb boludighanliqini bildürüp qoyushini telep qilimiz" déyilgen. (Qanat)