Amérikida Uyghur mesilisige bolghan qiziqish kücheymekte

2007-10-16
Élxet
Pikir
Share
Print

Rabiye-150.jpg
Rabiye qadir xanim pragda. UAA Photo

Amérikida Uyghur mesilisige bolghan qiziqish künséri kücheymekte. Yéqinda, Uyghurlar heqqidiki qarar layihisining amérika dölet mejlisi tashqi ishlar komitétida, mezkur komitétning jumhuriyetchi we démokratlar partiyisidin kélip chiqqan ezaliri teripidin birdek awaz bilen qobul qilinishi, buning bir ispati hésablinidu. Buningdin sirt yen, amérika hökümet da'iriliriningmu Uyghur mesilisige bolghan qiziqishi barghanséri küchiyiwatqan bolup, Uyghur milliy herikitining rehbiri we dunya Uyghur qurultiyining re'isi rabiye xanim bilen amérika hökümet da'iriliri otturisidiki uchrishishlar köpeymekte.

Rabiye qadir xanimning prézidént bush we lora bush xanim teripidin qobul qilinishi

Amérika prézidénti jorj bush, bu yil 5‏- iyun, chéx jumhuriyitining paytexti praga shehiride, Uyghur milliy herikitining rehbiri we dunya Uyghur qurultiyining re'isi rabiye qadir xanim bilen uchriship, rabiye xanimgha yuqiri baha bergendin kéyin, rabiye xanim we dunya Uyghur qurultiyi bilen amérika hökümiti hem amérika dölet mejlisi otturisidiki alaqe we munasiwetler téximu kücheydi.

Uyghur milliy herikitining rehbiri rabiye qadir xanimning, praga shehiride, amérika prézidénti jorj bush teripidin qobul qilinishidin uzun ötmeyla, amérika siyasiy sehnisidiki tesiri künséri küchiyiwatqan, bérmidiki démokratik küchlerni qollash toghrisidiki teshebbusliri bilen siyasiy da'irilerning diqqitini tartishqa bashlighan, prézidént bushning ayali lora bush xanim, rabiye qadir xanimni aq sarayda qobul qildi.

Rabiye qadir xanimning prézidént bush we lora bush xanim teripidin qobul qilinishi bilen birge, amérika dölet mejliside Uyghurlar heqqidiki qarar layihisini qobul qilish mesilisi qaytidin munazire qilinishqa bashlidi. Mushu yil 6‏-ayda amérika dölet mejlisi tashqi ishlar komitétining nopuzluq ezaliri teripidin sunulghan, Uyghurlar heqqidiki qarar layihisi, 9‏- ayda amérika dölet mejlisi tashqi ishlar komitétida munazirisiz halda mezkur komitét ezalirining mutleq köpchilikning qollishi bilen qobul qilindi.

Rabiye qadir xanim yene aq sarayda bezi muhim erbablar bilen uchrashqan

Igileshlerge qarighanda, amérika dölet mejlisining bezi ezaliri, Uyghurlar heqqide tashqi ishlar komitétida qobul qilin'ghan qarar layihisini, amérika dölet mejlisining omumiy yighinigha sunushni pilanlimaqta. Eger, bu qarar layihisi amérika dölet mejlisi awam palatasining omumiy yighinida qobul qilinsa, qanun'gha aylinidu we amérika hökümiti qarar layihiside Uyghurlar heqqide otturigha qoyulghan teleplerning ijra qilinishi üchün, heriketke ötüshke mejbur bolidu.

Amérika dölet mejlisi xitay ishliri komitéti, amérika xelq'ara diniy erkinlik komitéti qatarliq, amérika hökümitige xitaygha qaratqan siyasetni belgileshte, muhim teklip we tewsiyiler sunidighan teshkilatlarmu Uyghurlar mesilisige alahide köngül bölüwatqan bolup, ular xitaydiki weziyet toghrisida élan qilghan doklatlirida, xitay hökümitining Uyghurlargha qaratqan siyasitini qattiq tenqid qilip, amérika hökümitidin Uyghurlargha qaratqan siyasitini özgertishi üchün xitay hökümitige bésim ishlitishini telep qilmaqta. Amérika dölet mejlisi xitay ishliri komitéti teripidin, 10‏-ayning 15‏- küni élan qilin'ghan doklat, mezkur komitétning Uyghur mesilisige qanchiliq jiddiy qarawatqanliqining janliq misali hésablinidu.

Uyghur milliy herikitining rehbiri we dunya Uyghur qurultiyining re'isi rabiye qadir xanimning, praga shehiride prézidént jorj bush teripidin qobul qilinishi bilen, aq saray bilen Uyghur milliy herikiti otturisida qurulghan alaqe künséri küchiyiwatqan bolup, 10‏- ayning 15‏- küni yeni prézidént bushning tibetning diniy we siyasiy dahiysi dalay lamani aq sarayda qobul qilishidin bir kün burun, rabiye qadir xanim yene aq sarayda bezi muhim erbablar bilen uchrashqan.

Dunya Uyghur qurultiyi ijra'iye komitéti re'isi alim séyf, bu qétimqi uchrishishta rabiye qadir xanimning aq saraydiki mes'ul erbablar bilen Uyghur milliy dawasining tereqqiyatini muhakime qilghanliqini bildürdi.

Buningdin sirt yene amérika hökümitige, tashqi siyaset mesiliside yol körsitidighan, her qaysi tetqiqat institutliriningmu Uyghurlargha bolghan qiziqishi alahide köpeygen bolup, amérikida her da'im dégüdek Uyghurlar heqqide ilmiy muhakime yighinliri ötküzülmekte hemde amérika metbu'atlirida künde dégüdek Uyghurlar heqqide xewer, maqale we mulahiziler élan qilinmaqta. (Ömer qanat)

Pikirler (0)
Share
Toluq bet