Рабийә қадир ханим австралийә парламент әзалири вә ташқи ишлар минстирлиқи әмәлдарлири билән көрүшти

2008-02-22
Елхәт
Пикир
Share
Принт

Rabiye-Xanim.-150.jpg
Уйғур миллий һәрикитиниң рәһбири вә дуня уйғур қурултийиниң рәиси рабийә қадир ханим, австралийидә. RFA Photo

Дуня уйғур қурултийиниң мәсуллириниң баян қилишичә, австралийә уйғур җәмийитиниң орунлаштуруши билән, 19‏- феврал күни австралийә зияритини башлиған уйғур миллий һәрикитиниң рәһбири вә дуня уйғур қурултийиниң рәиси рабийә қадир ханим, седний шәһиридики паалийитини ахирлаштуруп, 21‏- феврал күни австралийиниң пайтәхти камбера шәһиригә берип, лор фергисон вә майкел дәнби қатарлиқ австралийә парламент әзалириниң орунлаштуруши билән, австралийә парламентиниң нурғунлиған әзалири билән көрүшкән һәмдә уларға уйғурларниң нөвәттики әһвали вә хитай һөкүмитиниң уйғурларға қаратқан сиясити һәққидә мәлумат бәргән.

Рабийә қадир ханим вә дуня уйғур қурултийи вәкиллири шуниңдәк австралийә ташқи ишлар минстирлиқиниң юқири дәриҗилик хадимлири учрашқан шундақла камберадики америка әлчиханисиниң мәсуллири тәрипидин күтүвелинған.

Рабийә қадир ханимниң бу қетимқи австралийә зияритини орунлаштурған, австралийә уйғур җәмийитиниң рәиси вә дуня уйғур қурултийиниң австралийидики вәкили һөсәйин әпәндим, рабийә қадир ханимниң камберадики учришишлири һәққидә тохтилип өтти. Рабийә ханим вә дуня уйғур қурултийи вәкиллири камберадики паалийити ахирлаштуруп, 22‏-феврал күни уйғурлар бир қәдәр зич орунлашқан австралийиниң адалайд шәһиригә йетип кәлгән.

Дуня уйғур қурултийи иҗраийә комитетиниң рәиси алим сейитоф әпәнди рабийә ханимниң адалайд шәһиридә, шу шәһәрдә яшаватқан уйғур җамаити шундақла австралийә һөкүмәт хадимлири вә адалайд шәһиридики кишилик һоқуқ тәшкилатлири мәсуллири билән көрүшидиғанлиқини билдүрди.

Дуня уйғур қурултийи мәсуллириниң ейтишичә, рабийә қадир ханимниң австралийә зиярити 29‏- феврал күнигичә давамлишидикән. (Өмәр қанат)

Пикирләр (0)
Share
Толуқ бәт