Rabiye qadir xanim awstraliye parlamént ezaliri we tashqi ishlar minstirliqi emeldarliri bilen körüshti


2008-02-22
Share

Uyghur milliy herikitining rehbiri we dunya Uyghur qurultiyining re'isi rabiye qadir xanim, awstraliyide. RFA Photo

Dunya Uyghur qurultiyining mes'ullirining bayan qilishiche, awstraliye Uyghur jem'iyitining orunlashturushi bilen, 19‏- féwral küni awstraliye ziyaritini bashlighan Uyghur milliy herikitining rehbiri we dunya Uyghur qurultiyining re'isi rabiye qadir xanim, sédniy shehiridiki pa'aliyitini axirlashturup, 21‏- féwral küni awstraliyining paytexti kambéra shehirige bérip, lor férgison we maykél denbi qatarliq awstraliye parlamént ezalirining orunlashturushi bilen, awstraliye parlaméntining nurghunlighan ezaliri bilen körüshken hemde ulargha Uyghurlarning nöwettiki ehwali we xitay hökümitining Uyghurlargha qaratqan siyasiti heqqide melumat bergen.

Rabiye qadir xanim we dunya Uyghur qurultiyi wekilliri shuningdek awstraliye tashqi ishlar minstirliqining yuqiri derijilik xadimliri uchrashqan shundaqla kambéradiki amérika elchixanisining mes'ulliri teripidin kütüwélin'ghan.

Rabiye qadir xanimning bu qétimqi awstraliye ziyaritini orunlashturghan, awstraliye Uyghur jem'iyitining re'isi we dunya Uyghur qurultiyining awstraliyidiki wekili höseyin ependim, rabiye qadir xanimning kambéradiki uchrishishliri heqqide toxtilip ötti. Rabiye xanim we dunya Uyghur qurultiyi wekilliri kambéradiki pa'aliyiti axirlashturup, 22‏-féwral küni Uyghurlar bir qeder zich orunlashqan awstraliyining adalayd shehirige yétip kelgen.

Dunya Uyghur qurultiyi ijra'iye komitétining re'isi alim séyitof ependi rabiye xanimning adalayd shehiride, shu sheherde yashawatqan Uyghur jama'iti shundaqla awstraliye hökümet xadimliri we adalayd shehiridiki kishilik hoquq teshkilatliri mes'ulliri bilen körüshidighanliqini bildürdi.

Dunya Uyghur qurultiyi mes'ullirining éytishiche, rabiye qadir xanimning awstraliye ziyariti 29‏- féwral künigiche dawamlishidiken. (Ömer qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet