Rabiye qadir xanim we hemrahliri adilayid shehirige yitip kélip pa'aliyitini bashliwetti

Rabiye qadir xanim we d u q ning bir qisim rehberliri kambiradiki awstraliye parlaméntida parlamént ezaliri we sinatorliri bilen körüshti we muxbirlargha axbarat élan qilish yighini achti.
Ixtiyariy muxbirimiz bextiyar
2011-03-24
Share
Rabiye-Xanim-Alim-Siyitof-Mahammat-Alalar-Micheol-Damby-305.jpg Rabiye qadir xanim, alim seyitof we muhemmed imin elalar awstraliye parlamént ezasi micha'el danby bilen bille. 2011-Yili 24-mart.
RFA/Bextiyar

5‏-Nöwetlik Uyghur siyasiy pa'aliyetchilirini terbiyilesh kursigha yétekchilik qilish üchün awstraliyide ziyarette boluwatqan Uyghur milliy herikitining rehbiri rabiye qadir xanim we uning hemrahliri 23‏-mart küni sédniy shehiridiki pa'aliyetlirini ayaghlashturup kambira shehirige yitip keldi.

Rabiye xanim we dunya Uyghur qurultiyining bir qisim rehberliri kambiradiki awstraliye parlaméntida bir qisim parlamént ezaliri we sinatorliri bilen körüshti we muxbirlargha axbarat élan qilish yighini achti. Bu heqte awstraliye Uyghur jem'iyitining re'isi muhemmet imin ela ependi mundaq dédi: 3-ayning 23‏-küni dunya Uyghur qurultiyining re'isi rabiye qadir xanim bashchiliqidiki dunya Uyghur qurultiyining we awstraliye Uyghur jem'iyitining bir qisim wekilliri awstraliye féwral parlaméntining bir qisim ezaliri bilen uchrashti. Uchrishish jeryanida rabiye xanim awstraliye yéshillar partiyisining rehbiri sinator bob brown ependi bilen körüshüp 2009-yildiki 5-iyul qirghinchiliq weqesi we undin buyanqi Uyghurlarning ehwali, xitay hökümitining Uyghur xelqi üstidin dawamlashturuwatqan milliy qirghinchiliqliri heqqide keng da'iride melumat berdi, buninggha jawaben sinator bob brown ependi Uyghurlar mesilisi heqqide bir qanun layihisi tüzüp awstraliye parlaméntigha sun'ghanliqini éytti.

Rabiye xanim shu küni yene, maykol dandi, lori forgusun we filip raddok qatarliq parlamént ezaliri bilen körüshüp, oxshashla Uyghurlarning bügünki ehwali heqqide söhbetleshti hemde awstraliye parlamént ezalirining kelgüside sherqi türkistan mesiliside qandaq ishlarni qilalaydighanliqi toghrisida sistémiliq pilanlarni tüzüshti. Sa'et 12:30 din 1:30 giche muxbirlargha axbarat yighini achti, bu axbarat yighinigha gézit, zhurnal, radi'o, téléwizor qatarliq axbarat organlirining 30 gha yéqin muxbirliri, parlamént ezalirining yardemchiliri we parlaménttiki Uyghur mesilisige qiziqidighan 40 tin artuq kishi qatnashti. Bu pa'aliyetni parlamént ezaliridin maykol danbi ependi we lori férgusun ependiler orunlashturdi we yétekchilik qildi. Rabiye qadir xanim muxbirlarning Uyghurlar mesilisi heqqide sorighan so'allirigha nahayiti éniq we etrapliq jawab berdi hemde dunyaning, bolupmu awstraliye hökümitining némilerni qilishi lazimliqini etrapliq sherhlidi. Kambiradiki ziyaret axirida rabiye qadir xanim we uning hemrahliri bilen alte neper parlamént ezasi kambiradiki dangliq réstoranlarning biride kechlik ghizada birge boldi.

  Kambiradiki ziyaritini axirlashturup 3-ayning 24-küni adélayd shehirige yitip kelgen rabiye qadir xanim bashchiliqidiki dunya Uyghur qurultiyining rehberlirini awstraliye sherqi türkistan jem'iyitining re'isi abdulghopur mömin ependi we jem'iyetning hey'et ezaliri hemde bir qisim Uyghur jama'iti ayrodromda kütüwaldi. Adilayid shehiri awstraliyige köchmen bolup kélip yashawatqan sherqi türkistanliqlar birqeder köp olturaqlashqan sheher bolup, mushu sheherni merkez qilip pa'aliyet élip bériwatqan awstraliye sherqi türkistan jem'iyitining orunlashturushi bilen Uyghur siyasiy rehberlirini terbiyilesh kursning ikkinchi basquchi chüshtin kéyin sa'et 2 de resmiy bashlandi. Pa'aliyetke sherqi türkistan jem'iyitining katipi nurmuhemmet türkistani riyasetchilik qildi. Rabiye xanim ichilish nutqi sözlidi. Abdulghopur mömin ependi söz qilip dunyaning herqaysi jayliridin kelgen méhmanlarni qarshi alidighanliqini bildürdi. Herqaysi döletlerdin kelgen wekiller öz dölitidiki Uyghurlarning ehwali, Uyghur dewasidiki tutqan orni, pa'aliyet da'irisi we mumkinchiliki hemde tarixi heqqide toluq melumatlar berdi, bügünki pa'aliyetke 100 ge yéqin kishi qatnashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet