Rabiye qadir xanimning xitay elchixanisining inkasigha jawabliri

2007-12-14
Élxet
Pikir
Share
Print

rabiye-amnesty-150.jpg
Uyghur dawasining sürgündiki rehbiri rabiye qadir xanimning türmidiki 2 - oghli ablikim abduréhimning salametliki nacharlashqan bolup, bu rabiye qadir xanim we uning a'ile tawabati ichide endishe qozghimaqta. AFP Photo

Uyghur milliy herikitining rehbiri, dunya Uyghur qurultiyining re'isi rabiye qadir xanim, 12 ‏-dékabir küni xitay hökümitige xitap qilip, mehbuslargha mu'amile qilishta insaniy bolushqa, ten salametlikide mesile körülgen oghli ablikim abduréhimge türme sirtida dawalinish imkaniyiti bérishke chaqirghan idi. Washin'gtondiki xitay elchixanisi, 13 ‏- dékabir küni rabiye qadir xanimning chaqiriqigha inkas qayturdi.

Elchixana bayanatchisi wang bawdong teripidin qayturulghan inkasta, ablikim abduréhim mesilisining qanun boyiche bir terep qilinidighanliqi bildürülüp mundaq déyilgen :"junggodiki mehbuslarning késel bolup qalghanda dawalinish hoquqi bar؛ buning bilen bille, késel halitidimu, türmining qa'ide -tüzümlirige boysunush mejburiyiti bar. Junggoning qanunida, mehbuslargha ten jazasi bérish we mehbuslarni xorlash cheklen'gen. Emma mehbuslar tüzümge boysunmisa jazalinidu."

Mezkur inkasta, rabiye qadir xanimni " sherqiy türkistan bölgünchisi" dep atighan wang bawdong " bular shinjangni junggodin bölüwélish meqsitige yétish üchün dawamliq herxil ighwalarni tarqitip turidu, junggo hökümitige haqaret qilidu. Meqsiti, dunya jama'itining hésdashliqigha érishish" dep bildürgen.

Bu munasiwet bilen, hazir bélgiyide ziyarette boluwatqan rabiye qadir xanimni ziyaret qilduq. Rabiye xanim, xitayning türme tüzümliri heqqide toxtaldi.

Rabiye qadir xanim xitay elchixanisining inkasidiki "mehbuslar türme tüzümige boysunushi kérek" dégen sözini mahiyette "Uyghur pa'aliyetchilirini heq dewadin waz kéchishi kérek déginidur" dep körsetti.

Rabiye qadir xanim, bir millet bext sa'adetke érishishi üchün choqum bedel tölishi kéreklikini, Uyghur milliy herikitining yol bashchisi bolush süpiti bilen aldi bilen özining andin a'ilisining bu bedelni töleshke her waqit teyyar ikenlikini yene bir yene qétim eskertip ötti. (Shöhret hoshur)

Pikirler (0)
Share
Toluq bet